“Bizim günlərdə Azərbaycan və Türkiyə dil, din, tarix, mənşə birliyi və qardaşlığı ilə çətinlikləri birlikdə aşıb, yaxşı və pis gündə həmrəy olmanın nümunəsini bütün dünyaya göstərib. Türkiyənin dövlət başçısı Rəcəb Tayyib Ərdoğanın növbəti dəfə prezident seçildikdən sonra ilk səfər etdiyi müstəqil dövlətin Azərbaycan olması bu gerçəyi bir daha sübut etdi”. Türkiyənin Milliyyətçi Hərəkat Partiyasından (MHP) millət vəkili seçilmiş, MHP-nin Türk dünyası və beynəlxalq əlaqələr üzrə sədr müavini Kamil Aydın “Xalq qəzeti”nə bu açıqlamasının davamında bildirdi:
– Bu birliyin əsasını Türkiyə Cümhuriyyətinin qurucusu Qazi Mustafa Kamal qoyub. Qurucu liderimiz Atatürk Türkiyə xaricində yaşayan soydaşlarımızla mənəvi körpülərimizi qoruyub saxlamağın, dilimizə, inancımıza, kökümüzə sahib çıxmağın, zamanı gələndə türk xalqları və toplumlarının bizə yaxınlaşmasını gözləmədən bizim onları himayə etməyimizin vacibliyini vəsiyyət edib.
Türkiyə 44 gün davam edən İkinci Qarabağ müharibəsində bütün səviyyələrdə azərbaycanlı qardaşlarının yanında oldu, Qarabağın azadlığı üçün bütün imkanlarını səfərbər etdi. Son 20 ildə ölkələrimizin prezidentlərinin ulu öndər Heydər Əliyevin “Bir millət, iki dövlət” şüarını rəhbər tutaraq fəaliyyət göstərməsi Azərbaycan və Türkiyə ilə yanaşı, türk dövlətlərinə də tarixi qələbə qazandırır. Bununla da türk dövlətləri birliyinin əhəmiyyəti bir daha artır. Hətta regional təhlükələrə görə türk birliyindən çəkinən ölkələr də Qarabağ savaşı zamanı ortaya qoyduğumuz məqsəd və qətiyyətlə hesablaşmalı oldu. Öndərlərimiz Atatürk və Heydər Əliyevdən bizə miras qalan qardaşlıq ənənələrini prezidentlər Rəcəb Tayyib Ərdoğan və İlham Əliyev yüksək səviyyədə davam etdirirlər.
2021-ci il iyunun 15-də azadlığına qovuşmuş qədim türk şəhərində qəbul edilmiş Şuşa Bəyannaməsini xatırlayan Kamil Aydın dedi:
–Azərbaycan və Türkiyə dövlətləri tərəfindən imzalanmış bu sənəddə iki ölkənin siyasi, iqtisadi, sosial, mədəni, humanitar, səhiyyə, təhsil, gənclər və idman sahələrində, digər tərəfdən isə müdafiə məsələsində strateji ortaqlığı təsdiqlənib. Əldə edilən irəliləyişlərin ardından ölkəmizdə əsrin fəlakəti kimi tanınan zəlzələlərdən sonra Azərbaycan “Dostlar gözlənilmədən, çağırılmadan gəlir” məramı ilə köməyə tələsən ilk ölkə oldu. Zəlzələ bölgəsinə həm axtarış-xilasetmə, həm də maddi-texniki dəstək göndərən və əllərindən gələn köməyi əsirgəməyən azərbaycanlı soydaşlarımızın bizim üçün etdikləri iki ölkənin yaxşı və pis günlərdə bir yerdə olduğunun ən bariz nümunəsidir”
Azərbaycan Türkiyədə keçirilən 14 may prezident və parlament seçkilərində, eləcə də mayın 28-də prezident seçkilərinin ikinci turunda da mənəvi dəstəyi ilə Türkiyədə demokratik seçkilərin qələbə çalmasına töhfə verdi. Türkiyə üçün həyati əhəmiyyət kəsb edən bu prosesdən sonra dövlətimizin başçısının dəvəti ilə ölkəmizə səfər edən Azərbaycan Prezidenti İlham Əliyev vurğuladı ki, iki ölkə arasında dostluq və qardaşlıq münasibətləri daimi və sarsılmazdır.
Kamil Aydın Türkiyə Prezidentinin Azərbaycana son rəsmi səfərinin əhəmiyyətini qısaca belə ifadə etdi:
–Azərbaycan rəhbəri İlham Əliyevin Türkiyənin dövlət başçısı Rəcəb Tayyib Ərdoğanla, eləcə də nümayəndə heyətləri arasında keçirilən görüşlərində ikitərəfli, regional məsələlərlə yanaşı, beynəlxalq aləmin gündəm daşıyan mövzuları da diqqət mərkəzində oldu. Bu səfər dünyada bənzəri olmayan dostluq və qardaşlığımızı yeni bir səviyyəyə qaldırdı. Biz tezliklə dünyaya yeni bir uğur zirvəsindən baxacağıq.
Mehparə SULTANOVA,
“Xalq qəzeti”
Ankara
