Azərbaycan–Ermənistan münasibətlərinin nizamlanmasına yönələn danışıqların intensivləşməsi fonunda həm rəsmi İrəvanın ayrı-ayrı təmsilçiləri, həm də ölkənin müxtəlif siyasi ekspertləri daha çox Qarabağ erməniləri ilə bağlı məsələnin üzərində dayanırlar. Mövcud xüsusda onların Bakı ilə dialoqunda, ümumən hüquq və təhlükəsizlik müstəvisində hansısa beynəlxalq mexanizmlərin tətbiqi məsələsindən söz açırlar.
Aydındır ki, belə bir mexanizm Ermənistanın Qarabağ kartından ən son tutacaq yeridir. Bir halda ki, əvvəllər qaldırılan status məsələsi tarixin arxivinə gömülüb, üstəlik, hazırkı vəziyyətdə Azərbaycan diktə edən tərəfdir, vurğuladığımız məsələdə üstünlüyə nail olmaq İrəvan üçün, həm də mənəvi əhəmiyyət daşımaqdadır. Baş nazir Nikol Paşinyan administrasiyası mövcud istiqamətdə, azacıq da olsa, uğur qazanıb, daxili ictimai rəyə Qarabağ ermənilərinin taleyinə biganə yanaşmadığını isbatlamaq və beləliklə, rəqiblərini susdurmaq niyyəti güdür.
Əlbəttə, Paşinyanın komandası yekdil deyil, xaricdəki müxtəlif siyasi dairələrə bağlı şəxslərdən təmsil olunub. Bu mənada həmin komandanın daxilində Qarabağ erməniləri ilə bağlı məsələni erməni avantürizminin davamına siyasi sərmayə kimi təsəvvürə gətirənlər də var. Məsələn, onlar düşünürlər ki, əgər mövcud istiqamətdə beynəlxalq mexanizmlər dövriyyəyə girsə, gələcəkdə o mexanizmlərə istinad edərək, yenidən bölgəyə sahiblənmək mümkündür. Hər halda Nikolun özünün də belə bir düşüncədə olmadığını söyləmək üçün heç bir əsas yoxdur. Nəzərə alsaq ki, Paşinyan gündə bir fikir dəyişmək təbiətinə malik qeyri-ciddi və səmimiyyətdən uzaq personadır, onun da eyni fikirdə ola biləcəyi istisna sayılmamalıdır.
Fakt budur ki, hazırda erməni siyasilərin Xankəndi–Bakı dialoqu kimi qabartdıqları məsələ müstəvisində beynəlxalq mexanizm yoxdur, üstəlik təcrübədə də bir müstəqil ölkənin öz tabeçiliyindəki xalqa xüsusi münasibətinin çərçivələrini müəyyənləşdirən təcrübəyə rast gəlinmir. O zaman belə bir prosedurun Azərbaycana yanaşmada tətbiqi də mümkünsüzdür. Həm də ona görə mümkünsüzdür ki, buna razılıq vermərik.
İstər ölkəmizin Prezidentinin, istərsə də xarici siyasət rəsmilərinin fikirlərindən anlaşılan Bakının mövqeyinin qətiliyidir – Qarabağ erməniləri Azərbaycanın tərkibindəki digər xalqlar kimi yaşam hüquqlarına malikdirlər, onlara münasibətdə hansısa əlahiddə imtiyazın tətbiqindən söhbət açıla bilməz. Kim istəsə, ölkəmizin yurisdiksiyası altında ömür sürəcək, istəməyənlər bölgəni tərk edib getməyə məhkumdurlar.
***
Azərbaycan dövləti iki dəfə Qarabağın erməni icmasının nümayəndələrini Bakıya danışıqlara dəvət edib. Məlum olduğu kimi, dəvətlər geri çevrilib. Ancaq nəzəri baxımdan hesab edək ki, onlar paytaxtımıza gəliblər. Nəzəri baxımdan onu da düşünək ki, Azərbaycanla Ermənistan arasında sülh müqaviləsi imzalanıb. Bunun reallaşacağı təqdirdə, kimsə ümid etməsin ki, Qarabağ erməniləri qədim Hindistandakı kimi kasta halına gələcəklər.
Yeri gəlmişkən, məsələyə Hindistandakı tarixi iyerarxiya prizmasından yanaşsaq, hələlik Qarabağ erməniləri bizim gözümüzdə pariyalardır. Yəni toxunulmazlardır. Ancaq yada salaq ki, pariyaları toxunulmaz edən onların üstünlüyü deyil, murdarlığı idi. Bəli, Qarabağın erməni əhalisi də hazırda bölgədəki separatçıların tabeçiliyində olmağa razılıq verdiklərindən, buna müqavimət göstərmədiklərindən, nəzərimizdə murdardırlar. Belələrinə isə ölkəmizdə yer yoxdur. Ancaq humanistlik göstərib onları pariyalıqdan çıxarmaq istəyirik, şans veririk. Şans isə heç də həmişə ələ düşmür.
Bəli, Qarabağ ermənilərinin Bakıya dəvət edilmələri daimi ola bilməz. Azərbaycan Prezidenti İlham Əliyev də Laçında yerli əhali ilə görüşündə məsələ ilə bağlı qəti mövqeyini ortaya qoyub: "Biz oraya (Xankəndi - red) heyət göndərmişdik. Mənim nümayəndəm gedib onlarla (erməni azlığının nümayəndələri - red) birinci görüş keçirib və ondan sonra onları dəvət etmişik Bakıya ki, gəlin danışaq. Onlar bundan imtina etdilər. Bundan sonra ikinci dəfə biz onları dəvət etmişik Bakıya. Yəni, Qarabağda yaşayan erməni azlığının nümayəndələrini. Ondan da imtina etdilər. Daha üçüncü dəvət olmayacaq. Ya özləri boyunlarını büküb gələcəklər, ya da ki, indi hadisələr başqa cür inkişaf edəcək".
Hesab edirik ki, həm Qarabağ erməniləri, həm də Ermənistan rəhbərliyi dövlətimizin başçısının “hadisələr başqa cür inkişaf edəcək” fikrinə ciddi diqqət yetirməlidirlər. Həm də ona görə ki, cənab İlham Əliyev elə həmin görüşdə hər zamankı prinsipiallığı ilə bildirmişdi: “...Mənim sözüm qətidir, bunu hər kəs bilir, həm Azərbaycanda, həm dünyada, o cümlədən Ermənistanda. Nəyi deyiriksə, onu da edirik. Bir dənə də olsun sözümüz, necə deyərlər, havada qalmayıb, bu söz də havada qalmayacaq...”
***
Əlbəttə, hazırda Ermənistanda “Qarabağın müstəqilliyi”, eləcə də Qarabağ erməniləri ilə bağlı məsələnin beynəlxalq mexanizmlərinin olacağını düşünənlərin səsi daha çox çıxmaqdadır. Ancaq mövcud istiqamətdə reallıqları nəzərə alıb fikir bildirənlərə də rast gəlinməkdədir. Sonuncu kəsimin sırasında, ümumən Azərbaycan Prezidentinin hər sözünü və cümləsini havaya atmadığını deyənlər, dövlətimizin başçısının söylədiklərini yerinə yetirdiyini bildirib isterik duruma düşənlər də var, cənab İlham Əliyevin fikirlərindən rasional nəticə çıxaranlar da.
İsterik duruma düşənlərin bildirdiklərinə o qədər də önəm vermək lazım deyil. Çünki belələri bir qayda olaraq, vəziyyətin çıxılmazlığı görüntüsü yaradıb baş nazir Nikol Paşinyanı müqəssir sayır, Ermənistandakı mövcud iqtidarın hakimiyyətdən uzaqlaşmasının vacibliyi motivlərinə köklənirlər. İkincilərin isə məsələlərə nisbətən soyuq başla yanaşdıqlarını görmək mümkündür. Belələrindən biri İrəvan Mətbuat Klubunun rəhbəri, politoloq Boris Navasardyandır.
B.Navasardyan bildirir ki, erməni xalqı həm Ermənistan, həm də Qarabağın erməni əhalisi üçün az-çox pozitiv nəticə əldə etmək istəyirsə, maksimal dərəcədə realist olmalıdır. “Başa düşmək lazımdır ki, kollektiv Qərb Qarabağ ermənilərinin hüquq və azadlıqlarına təminat baxımından beynəlxalq mövcudluğa dair məsələnin üzərində inad göstərməyəcəkdir. Məsələnin öhdəlik şəklində belə qoyuluşunu nə Brüssel, nə Vaşinqton, nə də digər Qərb paytaxtları tərəfindən görürük. Mənim baxışıma görə, gündəmdə qalan Azərbaycan tərəfindən mümkün təklifdir. Azərbaycanın öz konstitusiyasına əsasən Qarabağ ermənilərinin hüquq və təhlükəsizliyi baxımından hansı mexanizmi təklif etməsi əsasdır. Bu (konstitusiya - red), çox ümumidir, heç nə demir. Ölkə hansı konkret mexanizmləri, yaxud hansı konkret prosesləri həyata keçirmək istəyir? Bu mənada hesab edirəm ki, Bakıda iş aparılır. Ola bilər, bu iş ictimaiyyətə açıqlanmır. Ancaq aparılır və hansısa mərhələdə Azərbaycan danışıqlar prosesinin iştirakçılarına şərtlərini təklif edə bilər”.
Bəli, B.Navasardyanın məntiqini müəyyən qədər real saymaq mümkündür. O, çox doğru vurğulayır ki, (Fransa xaric) kollektiv Qərb tərəfindən Qarabağ ermənilərinin hüquq və təhlükəsizliyinə dair hansısa beynəlxalq mexanizmi nəzərdə tutan təklif irəli sürülmür. Aİ Şurasının rəhbəri Şarl Mişelin açıqlamaları da bunu göstərməkdədir. Ancaq demək olmaz ki, vasitəçilər Navasardyan və onun fikrini bölüşənlərin söylədiklərini düşünmürlər. Psixoloji baxımdan yanaşsaq, onlar bir tərəfdən Ermənistanın bu məsələdə hara qədər gedəcəyini gözləyirlər, digər tərəfdən isə Azərbaycanı qıcıqlandırmaq istəmirlər və bir növ, hazırkı qüvvələr balansı baxımından qızıl orta prinsipinə riayət edirlər. Erməni politoloqun detallarının azacıq təsvir etdiyi prosesə dair gözləntiləri mümkündür.
***
Danışıqların qarşılıqlı kompromiss məntiqinə yanaşsaq, vasitəçilərin Azərbaycanın vəziyyəti yumşaltmaq və belə demək mümkünsə, sülh yolunu rəvanlaşdırmaq üçün məhz Qarabağ erməniləri mövzusunda nələri təklif edəcəyini gözləmələri mümkündür. Bu, elə bir təklif olmalıdır ki, vasitəçilər Ermənistana onun da mövqeyinin nədəsə nəzərə alındığını söyləyə bilsinlər. Əlbəttə, əgər təklif olacaqsa, bu təklifin Bakının öz prinsiplərindən geri çəkilməsi kimi interpretasiyası da mümkünsüzdür.
Ancaq hələlik təklif yox, haqqında yuxarıda söz açdığımız dəvət var. Bir daha bildirək ki, söhbət Qarabağ ermənilərinin Bakıya dəvətindən gedir. Bu baxımdan Azərbaycan rəsmiləri vurğunu sosial məsələlər üzərinə qoyurlar, Qarabağın erməni əhali yaşayan hissələrində çoxdandır yığılıb qalmış problemlərin öyrənilməsini prioritet vəzifə kimi müəyyənləşdirirlər. Belə görünür, Bakıdan konkret təklif məntiqi məhz dəvət müstəvisində işə düşə bilər.
Sonda iki məsələyə diqqət yetirək. Birincisi, qeyd edək ki, vaxtilə, yəni sabiq Sovetlər Birliyi dönəmində Qarabağ erməniləri imtiyazlı təbəqə olublar. O dövrü xatırlayanlar bildirirlər ki, Xankəndidə və keçmiş Dağlıq Qarabağ Muxtar Vilayətinin müxtəlif yerlərində yaşamış ermənilərin əmək haqları respublikanın digər yerlərində yaşayanlardan yüksək olub. Bunun hansı prinsip əsasında gerçəkləşdirildiyi məlum deyil. Hər bir halda hazırda belə ayrı-seçkilik tətbiq oluna bilməz. Həm də ona görə ki, biz xüsusi yanaşmanın sonradan hansı “istəkləri” doğurduğunun, 30 ilə yaxın müddətdə torpaqlarımızın işğalda qaldığının şahidiyik. Bu mənada vasitəçilərin də Qarabağ ermənilərini bizə yenidən, loru dildə desək, şirin satmağa cəhd göstərmələri əbəsdir.
İkinci məqamı qabartmaqla isə söylədiklərimizlə əlaqədar bir növ ümumiləşdirmə aparmaq istərdik. Hazırda Azərbaycan-Ermənistan nizamlaması baxımından, danışıqlar masasına, müəyyən mənada dürtülmüş kimi görünən Qarabağ ermənilərinin hüquq və təhlükəsizliyi, habelə onların təhlükəsizliyi seqmenti gündəmə gətirilirsə, vasitəçilərin bu barədə söz açmadıqlarını, Ermənistan rəsmilərinin isə onun üzərinə gəldiyini görürük. Hesab edirik ki, mövcud məqam sülh prosesinin diplomatik əsəb davasını şərtləndirməkdədir. Hər bir halda Azərbaycanın davaya, daha doğrusu, özünün haqq davasına təmkinlə yanaşıb prinsiplərini qoruyacağı şübhəsizdir.
Ə.CAHANGİROĞLU, “Xalq qəzeti”