Körpə arzuları qan gölündə boğulmuş Zəhra Quliyevanın pak ruhuna
Çocuqluq qana bələnib,
Sağlam şüur xəstələnib,
Humanistlik güllələnib...
Qətliamlar qocalır -
Davam edir Xocalı.
Yenə “söz verilir” topa,
Gücsüzdür siyasi “zopa”,
Susur hay - küylü Avropa...
Qətliamlar qocalır -
Davam edir Xocalı.
Yalanın qurumur dili,
Ağıllı olubdur dəli,
Düşmənin kimliyi bəlli...
Qətliamlar qocalır -
Davam edir Xocalı.
Çıxan bütün qəzetlərin,
Görüntülü kasetlərin
Ahı göyə ucalır...
Qətliamlar qocalır -
Davam edir Xocalı.
Fakt yayılır “şəkil-şəkil”,
Yoxdur haqqa qahmar vəkil,
Artıq uçmur Əkil - Bəkil...
Qətliamlar qocalır -
Davam edir Xocalı.
Yağlı vədlər “ütülənir”,
Siqaret tək tüstülənir,
Ölüm himni bəstələnir...
Qətliamlar qocalır -
Davam edir Xocalı.”
Yıxılıb dünyanın evi,
Saxlayan yox qatil divi,
Bəşərə səslənir Givi:
Qətliamlar qocalır -
Davam edir Xocalı,
Davam edir Xocalı!
Giya PAÇXATAŞVILI