Xalqımın ürəyinə çəkilən dünyanın ən ağır dağı – Xocalı dağı illərdir ki yandırır, yaxır... O qədər də uzaq olmayan tarixdə – 1992-ci il fevralın 25-dən 26-na keçən gecə törədilən qətliam insanlığın ən eybəcər nümunəsini – erməniliyin simasını bütün çılpaqlığı ilə açıb göstərdi.
Xocalının al-qana bələndiyi həmin müdhiş gecədə bir ana da balaları ilə Vətəndən baş götürüb qaçırdı. Kürəyinə ermənilərin qanını axıtdığı 11 yaşlı oğlunun meyitini bərk-bərk sarımışdı... yanında 10 yaşlı oğlu, 8 yaşlı çəlimsiz, ayaqyalın qızı da qaçırdı.
Nuridə Ələkbərovanın o vaxtdan baxışları soyuqdur, xəyalı şaxtalı meşədə, dağda, dərədə gəzir. “İllər elə bil qocaltmır bizi – ürəyi dağlı Xocalının yaralı qəlbli analarını...”, – deyir.
Elə o vaxtdan, qandonduran gecədən indiyədək hər səhəri özü ilə danışa-danışa açır. Axşamçağılar həyəcan keçirir. Şaxtalı gecələrdə özünə yer tapa bilmir. 11 yaşlı oğlu durur gözünün qabağında...
Onunla evində görüşdük, dünyanın yükünü çəkən gözləri yenə dolmuşdu. Həmin gecəni xatırladı, çalışdı ki, xatirələri nizamlasın, ipə-sapa düzsün. N.Ələkbərova o gecənin dəhşətli anlarının yaddaşına əbədi köçdüyünü deyir: “Elə bil hər şey bugünkü kimidir. Yoldaşım postda növbədə idi. Təlaşla təxminən gecə saat 11-də evə gələrək, tez uşaqları oyatmağımı və qonşumuz Ələsgər (Ələsgər Novruzov, Azərbaycanın Milli Qəhrəmanı) müəllimin evinin zirzəmisinə getməyimizi tapşırdı. Dedi ki, ermənilər rusların 366-cı alayı ilə birləşib tanklar, “BTR”-lərlə hücum çəkiblər. Bir neçə saat zirzəmidə qaldıq. Birdən kəndçimiz Murad – onun da bacı və qardaşını həmin gecə öldürdülər – yanımıza gəlib dedi ki, tez çıxın, meşəyə qaçın.
Başa düşdük ki, artıq evə dönüb isti paltar götürə bilməyəcəyik. Hamı qışqırıb meşəyə tərəf üz tutdu. Ermənilər artıq kəndi yandırmağa başlamışdılar. Böyük oğlum 5-də, ikincisi 4-də, qızım isə 2-ci sinifdə oxuyurdu. Qızım ayağındakı çəkələkləri yolda itirmişdi. Meşənin qalınlığı, qaranlıq, şaxta, palçıq irəliləməyə imkan vermirdi. Ermənilər kimi tuturdularsa, olmazın amansızlıqla öldürürdülər. Kimin barmağında üzük var idi, barmağını kəsirdilər. Hamilə qadınların qarnını cırıq-cırıq edirdilər.
Bəzi yerlərini buz bağlamış Qarqar çayını keçərkən, əsl fəlakətlə üzləşdik. Yarıbuzlu su bəzən dizə, bəzən isə qurşağa qədər çıxırdı. Yaralanan, ölən, yarıyolda qalan... insanların yalvarış dolu ah-nalələri göyə qalxırdı. Səhər tezdən meşədən çıxanda hava yavaş-yavaş işıqlaşırdı. Müsibət isə qabaqda imiş. Əsgəranla Naxçıvanikin arasında qalmışdıq. Çox təhlükəli yer idi. Birdən düşmən ağır silahlar ilə hücuma keçdi. İrəlidə düzənlik idi, daldalanmağa, gizlənməyə yer olmadığından kimi geri – meşəyə sarı qaçdı, azdı. Traktor arx kimi bir yer qazmışdı. Biz isə onun içərisi ilə sürünə-sürünə gedirdik. Güllə ilə vurulan insanlar ayaqlarımızın altında çabalayırdılar. Uşağını belinə şələləyən, qucağına götürənlərdən neçəsinə güllə dəyib həm özünü, həm uşağını öldürdü. Birdən yaxın qonşumuz Məlahətin ətürpədən qışqırığını eşitdim. Dönüb baxanda əri və ikinci sinifdə oxuyan qızının al qanın içində olduğunu gördüm. Bacımın qaynı Talehi vurmuşdular. Qollarının üstündə uşaq çox körpə idi. Qışqıraraq ətrafdakılara yalvarırdı ki, ölürəm, körpəmi də aparın”.
Donuq baxışlar ilə sanki xatırlayırmış kimi bir müddət dinmədi. Amma yox... elə xəyalındakıları dilə gətirə bilmirdi. Oğlunun ürəyinə güllə dəydiyini axı necə danışsın?
Doluxsunub “Səxavət yıxılanda elə bildim ki, güllədən qorunmaq üçün uzanıb. Qaldıranda dedi ki, mama, məni tərpətmə, güllə dəyib, ağrıyıram. Paltonu açanda onu qan apardığını gördüm. Balamı bir az qolumun üstündə sürüdüm. Qışqırırdı ki, ağrıyıram. Heç 20 dəqiqə aparmamışdım ki, birdən əlləri üzümə sarı uzandı. Qucağımdaca keçindi. Birdən elə bil qəlbim daşa döndü. Sakitcə ona baxırdım. Yanımdan keçənlər “Onu yerə qoy. İki uşaqla qaç”, – deyirdilər.
“Bir müddət hərəkətsiz qaldım. Elə bilirdim ki, getsəm, arxamca qışqıracaq ki, məni niyə qoyub getdin. Soyuqdan donan qızım da, oğlum da ağlayırdılar. Qardaşım ağır yaralanmışdı. Sürünürdü, bizə çatıb uşaqlarımı da arxası ilə sürüməyə başladı. Kəndimizdə Elxan adında oğlan var idi. Rəhmətlik Aslan kişinin oğlu. Onun da bacısını yaralamışdılar. Baş yaylığımı verib uşağın meyitini kürəyimə bərk-bərk bağlamasını istədim”, – deyə davam edir.
Kürəyində meyit bir neçə saat sürünüb. Ağrıya dözə bilməyib, ayağa qalxaraq güllələrin yağdığı düzənliklə irəliləyib.
Nuridə Ələkbərova yüz dəfə ölüb-dirildiyini deyir: “Hər dəfə güllə atılanda ölüb dirilirdim. Deyəsən, daha qızım da ağrı hiss etmirdi. Qar coraba yapışıb, buza çevriləndə əlimlə onu təmizləyib, yenə davam edirdik.
Ağdamın Şelli kəndinə çatanda kürəyimdən uşağı açan bir oğlan elə bildi ki, onun öldüyünü bilmirəm: “Anam, uşaq yatıb, qoy dincəlsin”, – dedi. Mən isə sakitcə “Bilirəm, yatmayıb, ay oğul, ölüb. Meyit gətirirəm”, – dedim. Kollar, ağaclar saçımı, paltarlarımı didik-didik etmişdi. Ətrafdakıların mənim haqqımda “Başına hava gəlib”, – pıçıltılarını eşidirdim.
Həmin gün uşağı dəfn etmək istəyiblər. Nuridə ana isə qoymayıb: “Onu bir gecə bağrıma basdım. Amma soyuq əllərini, ayaqlarını qızdıra bilmədim”.
N.Ələkbərovanın yoldaşı Təvəkkül həmin gecə kəndin özünümüdafiə batalyonunda düşmənə qarşı ölüm-dirim savaşına girmişdi. Uşaqlarını isə Xocalıya əmanət etmişdi. O, doğma torpağını, yurdu isə balalarını qoruyurdu. Əhd-peyman bağlamışdılar.
O müdhiş gündə Təvəkkül Ələkbərov qeyri-bərabər döyüşdə düşmənə qarşı qəhrəmancasına döyüşüb, canını Vətən yolunda qurban verib. Başı müsibətlər çəkən Xocalı da əhdinə xilaf çıxmayıb. Bu gün yaşayır, mübarizə aparır, sakinlərinə qovuşacağı günü gözləyir.
Leyla QURBANOVA