Xocalı soyqırımı Azərbaycan tarixinə ən dəhşətli və faciəli səhifələrdən biri kimi daxil olub. Bu hadisə təkcə xalqımıza deyil, bütün insanlığa, bəşəriyyətə qarşı yönəlmiş ən ağır cinayətlərdən biridir. Öz ağlasığmaz qəddarlığı və qeyri-insani cəza üsulları ilə bir vəhşilik aktıdır.
Qar qırmızı qana boyandı
Xocalılılar qanlı faciəni ürəkağrısı ilə xatırlayırlar. Azad Abbasov deyir ki, post-patrul xidmətinin polis nəfəri kimi xidmətdə olub. “Xocalı şəhəri mühasirədə idi. Sonuncu helikopter 1992-ci il yanvarın 28-də gəlmişdi. Şuşa şəhərinin səmasında mülki helikopterin vurulması və nəticədə 40 nəfərin həlak olmasından sonra isə bu əlaqə də kəsilmişdi. Şəhərə elektrik verilmirdi. Bütün avtomobil yolları ermənilərin nəzarətinə keçmişdi. Şəhərdən çıxıb Ağdama, Şuşaya getmək mümkün deyildi. Bizi qarşıda çətinlikər gözləyirdi, hər gün vəziyyət ağırlaşır, ərzaq çatışmırdı: nə un, nə çay vardı. Çay dəmləmək üçün dağlardan yığdığımız kəklikotundan istifadə edirdik.
Həmin vaxt şəhərdə 3 minə yaxın insan qalmışdı. Çünki Xocalı mühasirədə qaldığı 4 aydan artıq zaman ərzində əhalinin xeyli hissəsi şəhərdən çıxmaq məcburiyyətində qalmışdı.
Ermənilər isə cəbhə xəttinə canlı qüvvə və zirehli texnika yığır, yaxınlıqdakı erməni kəndlərində döyüş mövqeyi tuturdular. Biz bunları görürdük, amma inanmırdıq ki, hücuma keçərlər.
Texnikanın əsas hissəsi 366-cı alaya məxsus idi. Düşmən onlardan istifadə edərək tez-tez azərbaycanlıların yaşayış məntəqələrini atəşə tuturdu. Bu vəziyyət fevralın 25-dək davam etdi. Fevralın 25-də isə Xocalı şəhəri ətrafında fərqli vəziyyət yarandı. Səhər saatlarında 366-cı alayın texnikasının səsi daha gur eşidildi. Axşama doğru isə şəhər artilleriya və ağır hərbi texnikadan atəşə tutuldu. Fikirləşdim ki, atəş uzun çəkməz, yenə sakitlik yaranar. Amma yanıldım. Axşam Xankəndi, Daşbulaq, Noraguh və Əsgəran istiqamətindən Xocalıya hücum oldu. Öndə 366-cı alayın hərbi texnikası, onların ardınca rus-erməni silahlı dəstələri Xocalını odlu məngənə arasına aldılar. Şəhər hər tərəfdən müxtəlif növ silahlardan güclü atəşə tutuldu.
Xocalının müdafiəsi əsasən atıcı silahlar ilə silahlanmış yerli özünümüdafiə dəstəsi, milis və Milli Ordunun döyüşçülərindən təşkil olunmuşdu. Bacardığımız qədər müqavimət göstərdik.
Artıq gecə saat 11-ə işləmiş 366-cı alayın texnikası və ermənilər Xocalının mərkəzinə doğru irəliləyirdilər. Qaçıb canını qurtarmağa macal tapmayan xocalı-lılar: qocalar, qadınlar, uşaqlar gülləbaran edilir, zirehli texinakanın altında qalırdılar. Evlər od tutub yanırdı. Şəhərdə ən çox “Fin evlər”də yaşayanlar vəhşiliyin qurbanı oldular. Onlar düşmənin hücumundan xəbərsiz idilər. Çünki güllə səsləri hər axşam eşidilirdi və inanmırdılar ki, ermənilər şəhərə girərlər. Bir də “Zapravka” deyilən yerdə ölənlər çox idi.
Aeroportun rəisi Əlif Hacıyev Şuşaya, Ağdama Xocalıdakı vəziyyət barədə dalbadal məlumat verir, kömək üçün xahiş edirdi. Ümid edirdik ki, bizə kömək gələcək, amma gəlmədi. Vəziyyət isə hər an pisləşirdi. Belə bir durumda, Ağdam rayonunun mərkəzinə çatmaq ümidi ilə şəhərdən çıxmağa məcbur olduq.
Əlif Hacıyevin dəstəsinə qoşulub meşə yolu ilə Ağdama üz tutduq. Şəhərdən çıxanda dəstəmizdə, ən azı, 1200, bəlkə də 1500 adam vardı və Kətik meşəsi ilə Ağdam istiqamətinə gedirdik. Qabaqda döyüşçülər, arxada qoca, qadın və uşaqlar hərəkət edirdilər. O vaxt subay idim və yanımda anam, iki bacım və böyük bacımın iki oğlu vardı. “Xocalı” batalyonunun komandiri Tofiq Hüseynovun ata-anası, iki qardaşı və həyat yoldaşı da bizim dəstədə idi.
Yolda bacımın 18 günlük uşağı ağladı, nə qədər çalışsaq da, sakitləşdirə bilmədik. Düşmən uşağın səsindən yerimizi müəyyənləşdirə bilərdi. Ona görə bizdən xahiş etdilər ki, onu susduraq. Anam körpəni əlimdən alıb kolluğa atdı. Vicdanım götürmədi, geri qayıdıb uşağı kolluqdan çıxartdım, amma ağlamağı kəsmədi. Körpə ikinci dəfə kolluğa atıldı. Meşənin içi ilə xeyli yol getmişdik, dönüb bacıma baxanda ağladığını gördüm və yenə geri qayıdıb uşağı kolluqdan götürdüm, qalın ədyala bükdüm. Sakitləşdi, Şelliyə çatanadək səsi çıxmadı.
Kətik dağının ətəyinə çıxanda artıq səhər saat 6-ya qalmışdı. Meşədən çıxan kimi ermənilərin iki postu arasındakı sahəyə düşdük. Postlardan biri “Donuz ferması” deyilən yerin yaxınlığında, ikincisi isə boz təpəlikdə yerləşirdi. Hər iki postdan və yaxınlıqdakı Naxçıvanik kəndindən ermənilərin çarpaz atəşinə tuş gəldik. Camaat pərən-pərən düşdü. Nəticədə 200-dən çox adam öldürüldü, onların qanı qarı qırmızıya boyadı. Həlak olanların arasında Tofiq Hüseynovun ailə üzvləri (5 nəfər) də vardı. Cəhənnəmi orada yaşadım. Xocalılıların ah-naləsi hər tərəfi bürümüşdü: qışqıran, ağlayan, inildəyən, üstəlik də güllə səsi. Sanki qiyamət yaşanırdı. Nə irəli gedə, nə də geri meşəyə qayıda bilirdik.
Döyüşçülər ratsiya ilə vəziyyətimizi bildirir, kömək istəyirdilər. Kömək isə gəlmirdi. Silahı olanlar döyüşə girərək sağ qalanların qaçıb meşədə gizlənməsinə şərait yaratdılar. Orada çoxlu sayda əsir düşənlər də oldu.
Fevralın 27-si səhər tezdən ailəliklə Şelliyə gəldik və bizi Aqil adlı bir nəfər evinə dəvət etdi. Ədyala bükülü uşağın səsi çıxmırdı, sanki ölmüşdü, bu səbəbdən də yumağı həyətdə qoyub içəri girdim. Ev sahibinin balaca qızı bunu gördü və anasının yanına qaçıb yumağı göstərərək, “Dayı ora nəsə qoydu”– dedi. Anası da yumağı götürüb işəri gətirdi, xeyli açmalı oldu, sonra ona sakit-sakit baxan uşağı gördü. İki gün səsi çıxmayan uşaq Allahın mərhəməti sayəsində sağ qalmışdı.
Məncə, o vaxt Şuşa və Ağdam tərəfindən erməni mövqeləri atəşə tutulsaydı, onların qüvvələri parçalana bilərdi, pərakəndəlik yaranardı, nəticədə bu qədər itki olmazdı.
Ertəsi gün Ağdama gəldik. Dörd gün ərzində Ağdama Xocalıda qətlə yetirilmiş 200 azərbaycanlının meyiti gətirildi, onlarla meyit təhqirə məruz qalmışdı. Şəfa kişinin başının dərisini soymuş, oğlu Muradın qızıl dişlərini çəkmiş, gözlərini çıxarmışdılar. Yaşarın isə burnunu və qulağını kəsmişdilər. Təvəkkülün qollarını məftillə bağlayıb təkərin üzərinə qoyub yandırmışdılar. Hafizin isə başını kəsmişdilər”.
Ermənilər vəhşicəsinə onlarla Xocalı sakininin başının dərisini soymuş, başlarını və bədəninin digər orqanlarını kəsmiş, uşaqların gözlərini çıxarmış, hamilə qadınların qarnını yarmışdılar. Bəziləri isə diri-diri yandırılmışdı. Çox dəhşətli mənzərə idi, unudulması mümkün deyil, unuda da bilmərik.
Azad Abbasov deyir: “Baxmayaraq ki, 31 il keçib, o dəhşəti unutmaq çox çətindir. Xatırladıqca halım pisləşir, ürəyimə kədər çökür, kürəyimdən soyuq tər axır.
Neçə illərdir bizim həsrətlə baxdığımız kimi, inanın, ondan da böyük həsrətlə o torpaqlar bizi gözləyir.
Bundan sonra neçə il yaşayacağımı bilmirəm... Son günlərimi Xocalıda yaşamaq istəyirəm”.
Pünhan ƏFƏNDİYEV,
“Xalq qəzeti”nin bölgə müxbiri