Türkiyənin Ərzurum şəhərində Atatürk Universitetinin ev sahibliyi ilə “Ortak Türk fəlsəfi düşüncəsinin dahisi: Nizami Gəncəvi” adlı Beynəlxalq Elmi Simpozium keçirilib. Tədbir Azərbaycan Respublikasının Ankaradakı Səfirliyi nəzdində fəaliyyət göstərən Azərbaycan Mədəniyyət Mərkəzi, TİKA, Türk Mədəniyyəti və İrsi Fondu və Nizami Gəncəvi Vəqfinin birgə əməkdaşlığı çərçivəsində təşkil olunub.
Simpoziumda Azərbaycan və Türkiyədən tanınmış alimlər, nizamişünaslar, yazıçılar və ictimaiyyət nümayəndələri iştirak ediblər. Tədbirdə türk-İslam düşüncəsinin inkişafında mühüm rolu olan Nizami Gəncəvinin zəngin ədəbi-fəlsəfi irsi, ortaq mədəni dəyərlər sistemindəki yeri və bəşəri ideyaları geniş müzakirə olunub.
Tədbir çərçivəsində Atatürk Universitetinin professoru Nimet Yıldırımın Nizami Gəncəvinin “Sirlər xəzinəsi” və “İsgəndərnamə” poemalarını orijinaldan türk dilinə tərcümə etdiyi nəşrlərin təqdimatı keçirilib.
AMEA Gəncə Bölməsinin elmi işlər üzrə sədr müavini, filologiya üzrə fəlsəfə doktoru, dosent Əlimuxtar Muxtarov simpoziumda “Nizami Gəncəvi və Gəncə” mövzusunda məruzə ilə çıxış edib. Alim dahi şairin əsərləri və qədim mənbələrə istinad edərək onun doğma Gəncəyə dərin bağlılığını göstərən faktları iştirakçıların diqqətinə çatdırıb. O vurğulayıb ki, Nizami Gəncəvinin əsərlərində milli mənsubiyyət və vətənpərvərlik ideyaları bu gün də öz aktuallığını qoruyur.
Ə.Muxtarov çıxışı zamanı Nizami Gəncəvinin irsinə göstərilən dövlət qayğısından, ümummilli lider Heydər Əliyevin, Prezident İlham Əliyevin və Birinci vitse-prezident Mehriban Əliyevanın bu istiqamətdə həyata keçirdikləri mühüm təşəbbüslərdən bəhs edib. O, Nizami məqbərəsinin qorunması və təbliği sahəsində görülən işləri əks etdirən foto-sənədləri də təqdim edib.
Simpoziumda Atatürk Universitetinin rektoru professor Dr. Ahmet Hacımüftüoğlu, Azərbaycanın Ankaradakı Səfirliyinin müşaviri Dr. Füzuli Məcidli, professor Nimet Yıldırım və digər alimlər çıxış edərək Azərbaycan və Türkiyə arasında elmi-mədəni əməkdaşlığın əhəmiyyətini vurğulayıblar. Qeyd olunub ki, Azərbaycan Mədəniyyət Mərkəzinin dəstəyi ilə həyata keçirilən “Nizami Gəncəvinin Xəmsəsinin türkcəyə qazandırılması” layihəsi iki qardaş ölkə arasında elmi və mədəni körpü rolunu oynayır.
Simpozium Nizami Gəncəvi Vəqfinin həmtəsisçisi Arzu Təbrizli və Atatürk Universitetinin əməkdaşı Şeyda Arısoyun moderatorluğu ilə davam edib. Tədbirdə Azərbaycan və Türkiyədən bir sıra alimlər məruzələrlə çıxış ediblər.
Bakı Dövlət Universitetindən Əsmətxanım Məmmədova “Nizami Gəncəvi yaradıcılığı üzərinə filoloji tədqiqatlar”, Azərbaycan Dövlət Pedaqoji Universitetindən Fərrux Rüstəmov “Nizami Gəncəvinin əxlaq dərsləri”, Atatürk Universitetindən Coşkun Erdoğan “Nizami Gəncəvi və Şeyx Nizami Vəqfi üzərinə araşdırmalar”, Türk Mədəniyyəti və İrsi Fondunun əməkdaşı Fərid Hüseyn “Nizami Gəncəvi yaradıcılığında ölüm fəlsəfəsi”, Ədəbiyyat İnstitutundan Təhminə Bədəlova “Nizami Gəncəvinin əsərlərində Türkistanın sərhədləri”, tarixçi alim Əkbər Nəcəf “Şeir hüququ: Nizami Gəncəvinin şeiri məşrulaşdırma cəhdi”, ilahiyyatçı Ağa Hacıbəyli “Nizami Gəncəvi yaradıcılığında həqiqi məhəbbət: Leyladan Mövlaya gedən sevda”, Atatürk Universitetindən Rəcai Kızıltunç “Nizaminin dünya mədəniyyət irsinə qoyduğu miras” və Şeyda Arısoy “Türkiyədə Nizami bibliyografiyası” mövzularında çıxış ediblər.
Simpozium iştirakçıları qeyd ediblər ki, Nizami Gəncəvinin yaradıcılığı təkcə tarixi deyil, həm də müasir düşüncə dünyasına istiqamət verən bəşəri məzmun daşıyır.
Tədbir çərçivəsində Azərbaycan və Türkiyəli alimlər tədqiqat əsərlərini və ədəbiyyat, tarix, mədəniyyət sahələrinə dair kitablarını bir-birlərinə və universitet kitabxanasına hədiyyə ediblər, həmçinin Ərzurumun tarixi məkanlarını ziyarət ediblər.
Hamlet Qasımov
XQ-nin bölgə müxbiri
Gəncə
