Azərbaycan incəsənət ustaları  Özbəkistan ali məktəblərinin tələbələri üçün ustad dərsləri keçiblər

post-img

Azərbaycanın Özbəkistandakı səfirliyinin nəzdindəki Heydər Əliyev adına Mədəniyyət Mərkəzinin (AMM) Özbəkistan Dövlət İncəsənət və Mədəniyyət İnstitutu, habelə Yunus Rəcəbi adına Özbəkistan Milli Musiqi Sənəti İnstitutu ilə birgə Mədəniyyət Mərkəzinin təşəbbüsü, Beynəlxalq Muğam Mərkəzinin dəstəyi ilə Azərbaycanın mədəniyyəti, incəsənəti, ədəbiyyatı və tarixinə aid mövzuların Özbəkistan ali məktəblərinin tədris proqramlarına salınması razılaşdırılıb. Bu layihə çərçivəsində Azərbaycanın Xalq artisti Zabit Nəbizadə, Azərbaycan Respublikasının Əməkdar artistləri Sahib Paşazadə və Xəyyam Məmmədov tərəfindən  tələbələrə mühazirələr oxunub və ustad dərsləri keçirilib.

Mühazirədən əvvəl azərbaycanlı artistlər fakültələrdə tədrisin təşkili ilə tanış olub, müəllim heyəti ilə görüşüb, müzakirə və fikir mübadiləsi ediblər. 

Zabit Nəbizadə və Xəyyam Məmmədov mənəvi zənginliyin, təhsilin və tərbiyənin artırılmasında Azərbaycan milli muğam sənətinin və özbək milli makom sənətinin əhəmiyyətindən danışıblar. Azərbaycan muğamları, xalq mahnıları, təsnifləri haqqında geniş məlumat verərək onların ifa üslubu, muğamda qəzəl seçimi xüsusiyyətlərini  tamaşaçılara izah ediblər. Ustad dərsləri çərçivəsində muğamlarımız ifa olunub, dəstgah anlayışı, şöbələrin ardıcıllığı ustalıqla dinləyicilərə çatdırılıb.

Sahib Paşazadə  rast, şur, segah, cahargah, bayati-şiraz, humayun və şüştər muğamlarının xarakter, ifa xüsusiyyətləri, başqa ölkələrin muğamlarından fərqli cəhətləri haqqında professor və tələbə heyətinə məlumat verib. Bundan başqa tar ifaçılığında Azərbaycan bəstəkarlarının əsərlərinin interpretasiyası üslubu, alətin texniki və bədii imkanları barədə danışıb,  Azərbaycan bəstəkarlarının bir neçə əsərini ifa edib. Hər ifadan sonra  əsərin ifa traktovkası, dinləyicilərə catdırılması da izah olunub.

Qeyd edək ki, bir neçə gün davam edən ustad dərslərində Özbəkistan Mədəniyyət Nazirliyinin nümayəndələri, müəllimlər, tələbələr və jurnalistlər iştirak edib.

 

Qulu Kəngərli

XQ-nin Türküstan üzrə xüsusi müxbiri

Daşkənd 









Mədəniyyət