Azərbaycan Yazıçılar Birliyinin ədəbi-bədii nəşri olan aylıq “Ulduz” jurnalının sentyabr sayı işıq üzü görüb. Jurnalın bu nömrəsi Türkiyənin “Gənc ürəklər” dərgisinə həsr edilib.
“Ulduz”un və “Gənc ürəklər”in birgə layihəsinə əsasən, dərc olunan yeni sayda 51 türk müəllif yer alır. Türkiyə türkcəsində yayılan əsərlərin əsas qayəsi budur: “Dildə, fikirdə, işdə birlik!” “Gənc ürəklər”in baş redaktoru Mühterem Şahin bildirib ki, tezliklə Azərbaycan ədiblərinin əsərlərindən ibarət xüsusi sayımız çap olunacaq. Azərbaycan türkcəsində dərci nəzərdə tutulan “Gənc ürəklər” “Ulduz” jurnalının göndərdiyi materiallar əsasında işıq üzü görəcək. Bu təşəbbüs dərgilərin “İki millət, bir dövlət!” şüarını rəhbər tutmasının təzahürüdür.
Ortaq əlifbanın artıq arzudan gerçəyə çevrildiyi tarixi günlərdə ədəbi gənclik nəşrlərinin birgə əməkdaşlığı Azərbaycan–Türkiyə qardaşlığının bariz nümunəsidir.
XQ
