Türkiyədəki Azərbaycan səfirliyinin nəzdindəki Mədəniyyət Mərkəzinin layihəsi ilə qardaş ölkənin bölgələrində milli mədəniyyətimiz, tariximiz, ədəbiyyatımız, Azərbaycan dilinin təbliği, habelə mədəni əlaqələrimizin daha da möhkəmləndirilməsi istiqamətində gərəkli addımlar atılır. Marmaris və Antalya şəhərlərində təşkil olunan “Azərbaycan mədəniyyəti və sənəti günü” də bu sıradandır. 

Tarixi turizm şəhəri olan Marmarisdə açıq havada, qədim amfiteatr səhnəsində keçirilən “Elvedasız şarkılar” adlı möh­təşəm konsert proqramı təqdim olunub. Yerli sakinlərin və turistlərin iştirak etdiyi mərasimdə öncə Azərbaycan mədəniyyə­tinə dair videomaterial nümayiş etdirilib.

Marmaris valisi Nurullah Kaya və Azərbaycan Mədəniyyət Mərkəzinin di­rektoru Samir Abbasov əsl sənətin bay­ramına çevrilmiş məşhur musiqi layihəsi “Elvedasız şarkılar” proqramı haqqında danışıb, Azərbaycan musiqi sənəti ilə yaxından tanışlıq baxımından bu kimi təd­birlərin əhəmiyyətini qeyd ediblər. Sonra 6 min nəfərlik qədim amfiteatr səhnəsində məşhur sənətçi Bora Gencerin təşkilatçılı­ğı ilə keçirilən “Elvedasız şarkılar” adlı konsert təqdim olunub. Səhnəni hər iki ölkə sənətçiləri bölüşüblər. Azərbaycandan proqramda Xalq artisti Gülyanaq Məmmə­dova, Azərbaycanın Əməkdar artistləri Ra­mil Qasımov, tarzən Sahib Paşazadə, gənc azərbaycanlı müğənnilər Aynur İsgəndərli, Vüsalə Əskərova, habelə Azərbaycan Mə­dəniyyət Mərkəzinin Xalq Rəqsləri An­samblı yer alıb. 

Mərkəzdən müxbirimizə verilən məlu­mata görə, layihə Türkiyədəki səfirliyimi­zin və Antalya–Azərbaycan Mədəniyyət və Həmrəylik Dərnəyinin dəstəyi ilə reallaşıb. Eyni təqdimat Antalya şəhərində Nazim Hikmət Mədəniyyət və Konqre Mərkəzin­də “Azərbaycanın təsviri sənəti” adlı sər­gisinin açılışı ilə baş tutub. Sərgidə Azər­baycandan “FR Collection” kolleksiyasına aid gətirilən qadın baş geyimi – qədimi kəlağayılar və digər milli geyimlərimiz nü­mayiş olunub, eyni zamanda, Azərbaycan qadın rəssamlarının əsərlərindən ibarət sər­gi tədbir iştirakçılarında böyük maraq do­ğurub. Nümayəndə heyətimiz – incəsənət ustalarımız Antaliya televiziya kanalının da qonağı olub, Azərbaycan–Türkiyə qar­daşlığına həsr edilən musiqili verilişdə mə­harətlərini göstəriblər. 

Layihə üzrə, Antalyadakı Akdeniz Uni­versitetində Azərbaycanşünaslıq Mərkəzi­nin təşkili məsələləri də müzakirə olunub, kitabxanalara Azərbaycana dair nəşrlər hə­diyyə edilib. 

XQ