2020-ci il Vətən Müharibəsi başlanan gündən Azərbaycan Ordusunun qəhrəman oğulları doğma torpaqlarımızı qarış-qarış xilas etməyə başladılar. Xalqımız ayaqüstə idi. Hamı işğal olunmuş yurd yerlərimizinin harayına qalxmışdı. Analar qoşa oğullarını hərb meydanına göndərmişdilər. Belə ailələrdən biri də Vətən Müharibəsi Qəhrəmanı Azər Abdullazadənin ailəsi idi. İki qardaş müharibənin ölüm kabusundan qorxmayaraq qəhrəmanlıqla döyüşüb və qardaşlardan biri Vətənin ən ali mükafatına layiq görülüb. 2019-cu ildən əsgəri xidmətə yollanan Azər 2020-ci ilin 27 sentyabr tarixindən döyüşlərə qatılır. Amma valideynlərinə heç bir informasiya vermir. Çünki qardaşının amansız müharibənin içində olmasını anası, atası həyəcanla yaşayırdı, belə olan halda Azər özünün də döyüşlərdə iştirakını gizlətməli olur, arxa xətdə, ehtiyatda olduğunu bildirir. Amma qəhrəmanlıqla, rəşadətlə yazılan döyüş əməliyyatlarında xüsusi olaraq seçilməsi, tankçı kimi adı dillər əzbəri olması, hərb meydanında düşmənə qan uddurması Azəri məğlubedilməz bir döyüşçü kimi məşhurlaşdırır. Azərin atası, əmisi Birinci Qarabağ Müharibəsində iştirak ediblər. Əmisi leytenant Natiq Abdullayev 1993-cü ildə Ağdərədə gedən döyüşlərdə şəhid olub, atası isə həmin ağır illərdə Azərbaycan Ordusunun formalaşmadığı, silah-sursatsız vaxtında ağır yaralanıb, 1-ci qrup əlildir. Ona görə də Azər uşaqlıqdan Vətən,Torpaq ağrısının acısını valideynlərinin, qohumlarının simasında yaşadığına görə erməni daşnaklarından qisas almağa söz vermişdi. 19 yaşında “ Vətən Müharibəsi Qəhrəmanı” adına layiq görülən Azər Abdullazadə haqqında oxucularımıza ətraflı məlumat veririk.
Azər Abdullazadə 2001-ci ildə Tərtər rayonunun Cəmilli kəndində anadan olub. 2019-cu ilin aprel ayında həqiqi hərbi xidmətə çağırılıb. Hərbi xidmət müddətinin qurtarmasına bir neçə gün qalmış Vətən Müharibəsi başlayıb. Döyüşlərdə tankçı kimi qəhrəmancasına iştirakı komandanlığın diqqətində olub.Füzuli istiqamətində gedən savaşda yaralansa da, qısa bir müalicədən sonra yenidən müharibəyə qatılıb. Cəbrayıl istiqamətində düşmənin zitehli texnikalarını, atəş nöqtələrini darmadağın edib. Düşmənin tankları ilə döyüş zamanı göstərdiyi cəsarət, həyatı bahasına qazandığı qələbə əsgəri xidmətinin ən şanlı anlarıdır.Tankın üzərinə quraşdırılmış 7,62mm pulemyotundan istifadəni yüksək səviyyədə,peşəkarlıqla idarə etdiyinə görə daşnakların xeyli sayda canlı qüvvəsini məhv edib. Düşmən tankı ilə üz-üzə gəldiyi vaxt bir neçə saniyənin içində döyüşün taleyini həll edən bu cəsur atıcı verilən koordinatlarla irəliyə doğru döyüş tapşırığını yerinə yetirməsi ilə xüsusi olaraq seçilib. Azərin yaddaşında müharibənin dəhşətləri bu gün də yaşayır. Onun dediyinə görə, Cəbrayıl uğrunda gedən döyüşlər çox ağır idi. Cəbrayılda ermənilərin elə sığınacaqları var idi ki, düşmən inana bilməzdi ki, biz həmin yerlərə girə bilərik. Azğınlaşmış daşnaklar çalışırdılar ki, bizi minalanmış sahəyə istiqamətləndirsinlər. Biz isə onların hiyləsini anlayaraq düşmənin ən çox istifadə etdiyi yollarla gedirdik. Bir çox yerlərdə isə bizdən əvvəl irəliləyən ordumuzun qəhrəman hərbçiləri yolları açmışdılar. Həm də döyüş texnikamız son dərəcə müasir tələblərə cavab verirdi. Tanklarımızın qabaq hissəsində öz minatəmizləyəni olduğuna görə təhlükəsizliyimizə nəzarət edirdik. Bu təcrübə ilə minalı yollardan canımızı qurtarırdıq. Müharibənin yazılmamış qanunlarından biri də budur ki, hücum vaxtı saniyənin belə həlledici an olduğunu unutmamalısan. Xəritələrlə irəliləyirdik. Atıcı olaraq düşmənin hədəflərini vuraraq yolları açırdım. Ermənilərin bizə mərmi belə atmağına imkan vermirdim.Tank atıcısı kimi əsgəri xidmətim vaxtı mükəmməl bilgilərə yiyələnmişdim. Buna görə komandirlərimə minnətdaram.
Azərin son döyüşü:
Onlar tankda 3 nəfər olublar. Tank komandiri, atıcı və mexanik. Ağir döyüş nəticəsində tank parçalanır, komandir leytenant Murad Nağıyev şəhid olur, qəhrəman mexanik Elsevər Hümbətov ağır yaralanmasına baxmayaraq Azəri qan içində xilas edir. Onların hər ikisini Füzulidə yerləşən hərbi hospitala yerləşdirirlər. Azər komaya düşür. Ona görə onu Bakıya hərbi hospitala gətirirlər. 5 gün komada qalan əsgər Azər Abdullazadə həyata qayıdır. Tankın içindən ağır dərəcədə yanıqla çıxdığına görə üz dərisi bir neçə dəfə əməliyyat olunur , sağ gözünü isə tamamilə itirir, sol gözü isə çox zəifləyir. Başında və bədənində çoxlu qəlpələr olan Azər ölümə qalib gəlir. Hətta Azər Azərbaycan Ordusuna qayıtmağa can atsa da sağlamlığı onu bu niyyətdən məhrum edir. Bu gün onun sağlamlığı dövlətimizin himayəsindədir. Azər Abdullazadə “Vətən Müharibəsi” adı verilən 83 nəfərdən biridir. Bu şərəfli adın verilmə xəbərini xəstəxanada olarkən eşidib. Azər bu adla həm də ona görə fəxr edir, qürur keçirir ki, əsgəri xidməti dövrünün başa çatmasına bir neçə gün qalmış Vətən Müharibəsinin başlanması ilə həyatının yeni bir tarixi yazılıb. Ali Baş Komandanın əmri ilə Müzəffər Azərbaycan Ordusunun Zəfər tarixini yazan əsgərlərinin cərgəsində Vətənin ən ali mükafatına layiq görülüb. Bu ailə döyüşçülər ailəsidir. Ailədə 2 qardaş 1 bacı olan Azərin qardaşı da 2020-ci ilin Vətən Müharibəsinin iştirakçısıdır O, Suqovuşan, Murovdağ, Talış istiqamətində gedən döyüşlərdə qalibiyyət yazan igidlərimizdəndir. Bu il Zəfərimizin 5 illik yubiley tarixində bu ailənin də sevinc payı, mənəvi haqqı ölçüyəgəlməzdir.
Azərbaycanın hərb tarixini yazan belə şərəfli tərcümeyi-hala malik yüzlərlə ailələr var ki, onlar milli mənsubiyyətimizin, milli özünüdərkimizin qürur mənbəyidir.
Kəmalə Abdinova
XQ
