Otuz il köçkün həyatı yaşadı, aşırı çətinliklərlə qarşılaşdı, ancaq öz statusunu saxlamağı bacardı. Bütün əziyyətlərə baxmayaraq, daşıdığı şərəfli adı və sənət dünyasındakı yerini qorudu. Şuşasız yaşadı, ancaq səhnəsiz qalmadı Şuşa teatrı. 

Mədəniyyət paytaxtımızın azadlığına qovuşması Şuşa Dövlət Musiqili Dram Teatrını (ŞDMDT) doğma ünvanda yeni­dən coşğun yaradıcılıq mühitinə qaytar­dı. Bu gün həm paytaxt Bakıda, həm də əziz Şuşada rəngarəng repertuarla çıxış edən teatr 150-ci mövsümünü də uğurla geridə qoydu. 

Teatrın direktor müavini, Əməkdar artist Azad Məmmədov bizə təmsil etdiyi sənət ocağının ötən mövsümdə iş fəaliy­yəti, yenilikləri və qastrolları barədə mə­lumat verdi. 

– 150-ci mövsümün açılışını “Molla Nəsrəddini tapın” əsərinin premyerası ilə etdik və yeni səhnə əsəri – “Dağılan tifaq” tamaşası ilə yekun vurduq. Ümumilikdə, ötən mövsüm teatrın yaradıcı heyəti bir neçə yeni səhnə əsəri hazırladı. Belə ki, Əbdürrəhim bəy Haqverdiyevin “Dağılan tifaq”, Xalq yazıçısı Elçinin “Şekspir” və Asif Kəngərlinin “Bəla” əsərlərinə, Ağad­din Babayevin “Üç qardaş” (“İki qardaş və Divin nağılı”) pyesinə, habelə Astrid Lindqrenin “Balaca və Karlson” əsərinə səhnə həyatı verdi. Eyni zamanda, 44 günlük Vətən müharibəsində qazanılan şanlı qələbənin 3-cü ildönümü ilə əlaqə­dar Azərbaycan və türk şairlərinin şeirləri əsasında hazırlanmış yeni səhnə əsəri “Dəmir yumruq” ədəbi-bədii kompozisi­yası nümayiş olundu. 

Onu da öyrəndik ki, ötən mövsümdə sənət ocağının kollektivi Şamaxı, Quba, Lənkəran, Masallı, Füzuli şəhərlərində qastrol səfərlərində olub və bir sıra festi­vallarda çıxış edib. Bu il ŞDMDT-nin hə­yatında əlamətdar bir hadisə də yaşanıb – teatra aparıcı status verilib və bu, yara­dıcı heyəti daha da ruhlandırıb. 

Azad Məmmədov söylədi ki, ötən mövsüm sənət ocağı bir beynəlxalq teatr bayramında – Türkmənistanın paytaxtı Aşqabad şəhərində keçirilən “Xoşbəxtlik dövrünün teatr sənəti” adlı IV Beynəlxaq Teatr Festivalında ölkəmizi təmsil edib və Xalq yazıçısı İlyas Əfəndiyevin “Boy çiçəyi” əsəri əsasında səhnələşdirilən ey­niadlı tamaşanı göstərib. Əməkdar artist yaradıcı heyətin Şuşa şəhərində keçirilən festivallarda, mədəni tədbirlərdə də bö­yük həvəslə çıxış etdiyini bildirdi.

– Bildiyiniz kimi, dövlətimiz dünyaya səs salan Böyük Zəfəri qazandıqdan və suveren ərazisini tam bərpa etdikdən sonra Şuşamızda beynəlxalq tədbirlərin təşkili ənənə halını alıb. Biz Şuşa teatrı olaraq, “Xarıbülbül” festivalında, “Vaqif Poeziya Günləri”ndə müxtəlif kompozisi­yalarla çıxış edirik. Builki poeziya bayra­mında teatrın baş rejissoru, Əməkdar artist Loğman Kərimovun quruluşunda İlqar Fəhminin qələmə aldığı “Füzuli hüc­rələri” və “Vaqiflə səyahət” ədəbi-bədii kompozisiyaları ilə təmsil olunduq. İn­diyədək azad Şuşada 10-dan artıq səhnə əsəri təqdim etmişik. Bundan sonra daha böyük layihələrlə çıxış edərək, teatrımı­zın əvvəlki şan-şöhrətini geri qaytaraca­ğıq. Bunun üçün bütün gücümüzü səfər­bər etmişik. İstər paytaxt tamaşaçıları, istərsə də şuşalı teatrsevərlərin etimadını doğrultmağa davam edəcəyik. 

Ceyhun ALIŞLI