20 iyunda Azərbaycan Milli Elmlər Akademiyasının Nəsimi adına Dilçilik İnstitutunda Elmi Şuranın iclası keçirilib. İclasda institutun 2024-cü il üçün 6 aylıq hesabatı dinlənilib.

İclasda müəssisənin direktoru filologiya elmlər doktoru, professor Nadir Məmmədli tədqiqat işlərinin “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”nın icrası ilə bağlı olduğunu deyib. Nadir Məmmədli bildirib ki, he­sa­bat ilinin­ 6 ayı ərzində institutun 13 şö­bə­ və 1 laboratoriyasında 1 istiqamət üzrə, 14 prob­lem, 20 möv­­­­­­­­zu, 96 iş yerinə yetirilməktədir.   

Müəssisənin elmi katibi filologiya elmləri doktoru, dosent Aynel xanım Məşədiyeva hesabat məruzəsilə çıxış edib. Aynel Məşədiyeva bildirib ki, hesabat ilinin 6 ayı ərzində Dilçilik İnstitutunun əməkdaşlarının 5 monoqrafiyası, 6 kitabı, 150 (30-u xaricdə dərc olmaqla (Türkiyə, Rusiya, Çexiya, Ukrayna, Özbəkistan, Qazaxıstan, Qırğızıstan)) məqaləsi çap olunmuşdur. 

Elmi müəssisənin şöbə müdirləri 2024-cü ilin altı ayı ərzində görülən işlər barədə hesabatla çıxış ediblər. Şöbə müdirləri institutun bir neçə əməkdaşının fəlsəfə və elmlər doktoru elmi dərəcəsi aldığını da diqqətə çatdırıb.

Hesabatda 2024-cü ildə institutda keçirilən beynəlxalq görüşlər,  konfrans, seminar və tədbirlər, kadr hazırlığı, elektron elmin vəziyyəti və mətbuatda və sosial mediada institutun fəaliyyəti  barədə də məlumat verilib.

İclasın sonunda AMEA Humanitar Elmlər Bölməsi tərəfindən təhkim edilən Rəyasət Heyətinin elmi katibi dosent Səfa Qarayev çıxış edərək Dilçilik  İnstitutunun böyük ənənələrə malik olduğunu söyləyib və hesabat yarımilində elmi müəssisənin fəaliyyətini müsbət qiymətləndirib. Həmçinin Türk dünyasının ən qiymətli kitablarından biri olan Mahmud Kaşğarinin məşhur “Divanü lüğat-it-türk” əsərinin I, II və III cildlərinin çapının   da institutun nəşrləri içərisində  elmi əhəmiyyəti ilə diqqəti çəkdiyini Səfa Qarayev  vurğulayıb. 

İclasın qərarı ilə hesabat qənaətbəxş sayılaraq qəbul edilib.