Azərbaycan Dövlət Akademik Filarmoniyasında Azərbaycan Milli Konservatoriyasının nəzdində Musiqi Kolleci (Asəf Zeynallı adına Musiqi Məktəbi) tələbələrinin Ümummilli Lider Heydər Əliyevin anadan olmasının 101-ci ildönümünə həsr olunmuş konsert keçirilmişdir.
Kollecin direktoru Əməkdar incəsənət xadimi, professor Nazim Kazımov müxbirimizə bildirib:
Son 3 ayda bu konsert proqramına ciddi hazırlıqlarımız, nəhayət, başa çatdı və bu sınaqdan da uğurla çıxdıq. Azərbaycan xalqı çox xoşbəxtdir ki, onun Heydər Əliyev kimi dahi Lideri olub. Xalqımızın yetişdirdiyi elə dahi şəxsiyyətlər vardır ki, onların həyat və fəaliyyətləri, qoyub getdikləri zəngin irs daim yad edilir və gələcək nəsillər ondan bəhrələnirlər. Belə şəxsiyyətlərdən biri də xalqımızın ümummilli lideri, müstəqil Azərbaycan dövlətinin qurucusu Heydər Əliyevdir. Azərbaycan tarixinin 30 ildən artıq bir dövrü, bu illər ərzində xalqımızın ictimai-siyasi, iqtisadi və mədəni həyatının bütün sahələrinin dirçəlişi Ulu öndərin adı ilə sıx bağlıdır. Azərbaycan elminin, təhsilinin, mədəniyyətinin, eləcə də incəsənətinin və musiqisinin inkişafına Heydər Əliyevin göstərdiyi diqqət və qayğı indi də öz bəhrəsini verməkdədir.
Azərbaycanda musiqi təhsili verən məktəbdə azərbaycanlı balalarının oxuması Üzeyir Hacıbəylinin ən böyük arzusu olub. O, musiqi təhsili arzusunda olan azərbaycanlıların bu arzu və istəklərini həyata keçirməyə çalışırdı. Bu böyük arzunun həyata vəsiqə almasında Ulu öndərin böyük qayğısı həmişə bizə qol-qanad verib, yaradıcılıq uğurlarımızın möhkəmlənməsində musiqiçilərimizə geniş imkanlar yaradıb. Ulu öndərin müəyyən etdiyi Azərbaycanın inkişaf strategiyası hazırda Prezident İlham Əliyev tərəfindən uğurla davam etdirilir.
2001-ci ildən Azərbaycan Milli Konservatoriyası nəzdində Musiqi Kolleci kimi fəaliyyətimizi davam etdiririk. Bu gün Azərbaycan Dövlət Akademik Filarmoniyasında tələbələrimizin ümummilli lider Heydər Əliyevin anadan olmasının 101-ci ildönümünə həsr edilmiş konserti Ulu öndərin xatirəsinə dərin hörmətimizin nümunəsidir.
Əlavə edəki ki, Konsertdə Azərbaycan Dövlət Xalq Çalğı Alətləri Orkestrinin bədii rəhbəri və baş dirijoru, Xalq artisti Ağaverdi Paşayevin, Əməkdar artist, dirijor İlahə Hüseynovanın müşayiətilə gənc istedadlar öz ifalarını təqdim etdilər. Həmçinin bəstəkar Fikrət Əmirovun “Azərbaycan elləri”, Səid Rüstəmovun “Alagöz”, Oqtay Kazıminin “Məhəbbət” əsərləri tələbələr tərəfindən ifa olunub. Respublika müsabiqəsi laureatı, II kurs tələbəsi İradə Məmmədova Baba Vəziroğlunun “Azərbaycan” şeirini söylədi.
Konsert proqramında Avropa bəstəkarlarının da əsərləri səsləndirildi.
XQ