Atıcılarımızın hədəfləri “onluq”dur
Azərbaycanda daha bir nüfuzlu yarış start götürüb. Bu dəfə Avropada ən böyük atıcılıq komplekslərindən biri olan Bakı Atıcılıq Mərkəzi stend və güllə atıcılığı üzrə Dünya kuboku yarışına ev sahibliyi edir.
Dünyanın ən güclü snayperlərinin mübarizə apardığı turnirə bu dəfə 85 ölkədən 700 idmançı qatılıb. Azərbaycanı turnirdə 43 atıcı təmsil edir. Bu il gənc idmançılarımızın yüksək nəticələr əldə etdiklərini nəzərə alsaq, bu yarışın komandamız üçün uğurlu olacağını demək olar.
Azərbaycan Atıcılıq Federasiyasının baş katibi Emin Cəfərov jurnalistlərə açıqlamasında bu il yarışın formatının ötənilkindən bir qədər fərqləndiyini deyib. O, 25 və 50 metr məsafələrə atışların iki dəfə keçiriləcəyini vurğulayıb. Qeyd edilib ki, buna səbəb fevralda İspaniyadakı Dünya kuboku yarışında sözügedən atışların müəyyən səbəblərdən keçirilməməsidir. Baş katib maraqlı turnirə şahidlik edəcəyimizə əmin olduğunu bildirib. O, idmançılarımıza, xüsusilə gənclərə inandığını söyləyib.
Atıcılıq Federasiyasının vitse-prezidenti, Olimpiya çempionu Zemfira Meftahətdinova ölkəmizin güclü yarışlara yüksək səviyyədə ev sahibliyini etdiyini deyib. O bildirib ki, Dünya kuboku nüfuzlu turnirdir və bu yarışda rəqabət, təbii ki, gərgin olacaq:
– Yarışın davam edəcəyi günlərdə maraqlı rəqabətin, idman mübarizəsinin şahidi olacağımıza əminik. Atıcılarımız ölkəmizi hər zaman nüfuzlu turnirlərdə layiqincə təmsil edirlər. Əli Hüseynli, Nurlana Cəfərova, Nigar Nəsirova kimi istedadlı atıcılarımız lisenziya turnirlərində öz qüvvələrini sınadılar. Onların lisenziya qazanmaq üçün şansları var idi. Finala qədər irəliləmişdilər. Nəticələr onu göstərir ki, bu idman növü Azərbaycanda kifayət qədər inkişaf edib. İnanırıq ki, idmançılarımız nailiyyətləri ilə bizi sevindirəcəklər.
Beynəlxalq İdman Atıcılıq Federasiyasında (ISSF) Texniki Komitənin üzvü Abdulla Al Hammad ölkəmizdə təşkil olunan yüksək səviyyəli tədbirlərə görə Azərbaycan Prezidenti İlham Əliyevə öz təşəkkürünü bildirib:
– Azərbaycana gəlmək mənim üçün hər zaman xoşdur. Ölkənizdə müxtəlif növ idman yarışları yüksək səviyyədə təşkil olunub. Dünyanın müxtəlif ölkələrində olmuşam. İnanın, bu cür şərait hər yerdə olmur. Belə qonaqpərvərliyə və təşkilatçılığa görə minnətdarlığımı bildirirəm. Qarşıda bizi çox maraqlı mübarizə gözləyir. Ümid edirəm ki, bu dəfəki Dünya kubokundan da məmnun qalacaqsınız.
Abdulla Al Hammad yarış iştirakçılarının öz güclərindən maksimum istifadə etmələri üçün hər bir şəraitin yaradıldığını qeyd edib.
Beynəlxalq İdman Atıcılıq Federasiyasının Tüfəng Komitəsinin sədri Deyvid Qudfelou ilk dəfə Bakı Atıcılıq Mərkəzində olduğunu, müasir üslublu kompleksin onda dərin təəssürat yaratdığını qeyd edib. Bakıya ilk dəfə səfər edən britaniyalı qonaq şəhərimizin gözəlliyini, xalqımızın qonaqpərvərliyini vurğulayıb. Bildirilib ki, Azərbaycanın belə idman tədbirlərinə evsahibliyi etmək üçün kifayət qədər təcrübəsi var. Deyvid Qudfelou yarışın qaydalarında dəyişikliyin olmadığını da diqqətə çatdırıb:
– Olimpiada ili olması baxımından hansısa dəyişikliklər nəzərdə tutulmayıb. “Paris-2024”dən sonra müəyyən dəyişikliklərin olacağı gözlənilir. İnanıram ki, Dünya kubokunda iştirak edən atletlərin hər biri burada mübarizə aparmaqdan zövq alacaqlar.
Məlumat üçün bildirək ki, mayın 1-də qeyri-rəsmi məşqlərlə başlayan turnirin ikinci günündə yalnız bir növdə təsnifat mərhələsi olub. Belə ki, pnevmatik tapança ilə 10 metr məsafədən atəş açma yarışlarında qarışıq komandalar mübarizə aparıblar. Azərbaycanın iki cütlüyü – Nigar Nəsirova ilə Ruslan Lunyov, Leyli Əliyeva ilə Vladislav Kalmıkov hədəf önünə keçiblər. Ümumilikdə isə 28 cüt yarışa qatılıb. Bu növdə final mərhələsi mayın 3-də keçiriləcək.
Dünya kubokunda atıcılar, ümumilikdə stend atıcılığının dairəvi və səngər növlərində mübarizə aparacaqlar. Güllə atıcıları isə pnevmatik tapança (10 m), kiçikçaplı tapança (25 m), pnevmatik tüfəngdən (10 m, 50) atəşaçma yarışlarında iştirak edəcəklər.
Qeyd edək ki, Dünya kuboku mayın 12-dək davam edəcək.
Leyla QURBANOVA
XQ
