“Atəşgah məbədi” iştirak etdiyimiz ənənəvi ədəbi-musiqili tədbirlər formatından xeyli fərqli, amma unudulmaz bir söz axşamına evsahibliyi edib. Orada təşkil olunan “Həmin gün...” adlı poeziya gecəsində Heydər Əliyev Fondunun vitse-prezidenti, ictimai xadim Leyla Əliyeva da iştirak edib.
Müasir poeziyamızın tanınan isimlərindən olan şair-publisist, “Söz” ədəbi dərnəyinin rəhbəri Nigar Həsənzadə qonaqları salamlayaraq, şeir çələngindən nümunələr səsləndirdi. Sonra Əməkdar artistlər Firdovsi Atakişiyev və Gülzar Qurbanova Leyla Əliyevanın və Nigar Həsənzadənin şeirlərini söylədilər. Bədii-estetik cəhətdən olduqca nizamlı, ürəkoxşayan və düşündürücü şeirlər hər kəsi duyğulandırdı. Leyla Əliyevanın şeirlərini doğma dilimizə Adil Cəmil, Nigar Həsənzadənin şeirlərini isə Salam Sarvan tərcümə ediblər.
Qiraətçilərin ardınca “Sənət” uşaq musiqili incəsənət qrupu Ümummilli lider Heydər Əliyevin sevdiyi və öz ifasında eşitdiyimiz məşhur “Küçələrə su səpmişəm” xalq mahnısının müşayiəti ilə səhnəyə daxil oldu. Onlar həzin milli rəqs nümayiş etdirərək gecəni daha da canlandırdılar. Sonra səhnəyə məhdud fiziki imkanlı gənc estrada müğənnisi Murad Sadıx çıxdı və ecazkar səsi ilə hər kəsi heyran qoydu.
Leyla Əliyevanın özünəməxsus çıxışı ədəbi-musiqili gecənin ən maraqlı məqamı oldu. Onun öz yazdığı şeiri məxsusi ifa etməsi gecənin bütün iştirakçılarını təsirləndirdi.
Beləcə, dəqiqələr, saatlar Bakının ən qədim məkanlarından birində keçirilən poeziya gecəsinin şirinliyində əridi. ”Həmin gün...” ədəbiyyat, mədəniyyat və mənəviyyat üçlüyünün gözəl vəhdəti kimi yadda qaldı.
Anar TURAN
XQ