Allahverdi İsrafilov sirk “Oskar”ına layiq görülmüş ilk azərbaycanlıdır. Bu günlərdə Bakıdakı Rus evində sənətkarla təşkil olunan görüşdə də qeyd olunduğu kimi, o, neçə-neçə yaddaqalan sirk proqramının təşkilatçısı, Monako, Çin, Fransa, İtaliya və Rusiya Federasiyasında keçirilmiş beynəlxalq festivallarının Qran-pri və digər mükafatların laureatıdır.
Görüşdə Allahverdi İsrafilov Bakı Dövlət Sirkinin yaxın vaxtlarda tamaşaçılar üçün hazırladığı maraqlı proqramlardan bəhs edib. O, məşhur İsrafilovlar sülaləsinin layiqli təmsilçisidir. Atası və əmisi Bakı Dövlət Sirkində çalışıblar. Biri heyvanlarla işləyib, digəri isə hava gimnastı olub. Özü isə ilk dəfə 1992-ci ildə – 14 yaşında ikən sirk manejinə çıxıb və Sabir Səmədovun rəhbərlik etdiyi “Azərbaycan cigitləri” atçılıq-akrobatika ansamblında parlaq gələcəyinə inam yaradıb. Kəmərlərdə “Od adamı” adlı solo hava nömrəsi uğurlu alınıb. Sonra sənət karyerasını Rusiyada davam etdirib və oranın müxtəlif sirklərində işləyib, peşəkarlıq səviyyəsini daha da təkmilləşdirib. Ailə qurduğu həmkarı Qalina Qolovaçeva ilə birlikdə “Hava adajiosu” adlı heyrətamiz hava nömrəsi təqdim edib, bir çox mükafatlara layiq görülüb. Avropa ölkələrində, Yaponiyada, hətta Avstraliyada qastrol səfərləri uğurlu keçib.
Allahverdi İsrafilovun dedikləri: “Sirk sənətində ustalaşmaq üçün bu sahəni ürəkdən sevməlisən. Təşəbbüskar olmalısan ki, fərqli performans göstərə biləsən. Axı, ən çətin tryuklar tamaşaçıların daha çox alqışını qazanır”.
Monte-Karloda keçirilən nüfuzlu Dünya Beynəlxalq Sirk Festivalı ilə bağlı xatirələrini bölüşən sənətkar bildirib ki, oraya Monako şahzadəsi Stefaninin dəvəti ilə Azərbaycan nümayəndəsi kimi gedib. Videokadrlarda Azərbaycan bayrağı da görünür. Allahverdigilin nömrəsi “Sən gəlməz oldun” kompozisiyasının sədaları altında hazırlanmışdı. Şahzadə Stefani musiqidən çox təsirlənmişdi, hətta çıxış zamanı mahnını zümzümə edirdi. Həmin festivalda o vaxtkı Roma Papası XVI Benediktlə də görüşüb. Festival çərçivəsində “Ümumdünya Katoliklər Günü” ilə əlaqədar çıxış edəndən sonra onlara pul təqdim edilib. Amma sirk ustası o pulu geri qaytarıb ki, xeyriyyə məqsədilə təşkil olunmuş tədbirdən kommersiya məqsədi güdmək olmaz. Onun bu jesti çox bəyənilib.
Papa Allahverdinin hansı dindən olduğunu soruşub. O isə cavab verib ki, müsəlmanam və bizim adətimizə görə, Allahla, məscidlə əlaqəli hər hansı iş, tədbir pulla ölçülmür.
Ulu yaradan da onu hər zaman qoruyub. Deyir ki, gərək bu sənətin əsl fanatı olasan ki, insanları heyrətləndirmək adına təhlükəli tryukları icra edə biləsən. Çıxış zamanı yoldaşının əlindən tutduğu bir fotonu göstərib izah edir ki, orada onun əlindən yox, bir barmağından tutaraq, tryuku sona qədər həyata keçirib. Bu isə son dərəcə risklidir. Elə olub ki, bir tamaşada 4 belə nömrə oynayıb.
Sirk ustasının bir qız övladı var, amma valideynlərinin sənətini davam etdirmir, çünki atası onun da belə təhlükələrlə üzləşməsini istəməyib. Axı, özü dəfələrlə yıxılıb, zədələr alıb. Qızı rəssamlıqla məşğuldur.
Artıq 10 ildir ki, Allahverdi İsrafilov daha artist kimi çıxış etmir. Böyük arenada son çıxışı Çində keçirilən festivalda olub, çünki istər-istəməz, yaş öz işini görür. “40 yaşında gimnast üçün havada tryuklar etmək çox çətinləşir. Cəhd etsən də, əvvəlki səviyyədə olmayacaq və illərlə qazandığın adını, nüfuzunu saxlaya bilməyəcəksən. 2014-cü ildən “Sirk Triumf” şirkətinin həm bədii rəhbəri, həm də baş direktoruyam. Rəhbərliyim altında həm rus, həm də xarici artistlərin iştirak etdiyi 50-dən artıq sirk proqramı hazırlanıb və indiyə kimi dünyanın bir çox ölkələrinə qastrol səfərlərimiz olur”.
Azərbaycan sirkinin böyük tarixi olduğunu söyləyən sənətkar imkan düşən kimi vətənə gəlməyə can atır. Burada bacısı, digər qohumları yaşayırlar. Elə olur ki, bəzən 1 ayda 3 dəfə, bəzən də 3 ildə 1 dəfə Bakıya gəlir. Dövlət sirkinə əlindən gələn köməkliyi göstərməkdən məmnundur. Artıq paytaxtımızda bir neçə proqram işləyib. Uzun illərdən sonra ilk dəfə Azərbaycan Dövlət Rəqs Ansamblı ilə birlikdə Qarabağ atları ilə vətənpərvər ruhlu proqram yaradıb. Hazırda milli koloritdən istifadə etməklə, xaricdə ölkəmizi layiqincə təmsil edəcək nömrələr hazırlanır. Gəncədə ən böyük və daimi sirk şapitosu (sökülüb yığılan arena) quraşdırıb.
Allahverdi İsrafilov çalışır ki, özünün dünya təcrübəsindən istifadə edərək Azərbaycanda sirk sahəsində maraqlı işlərə imza atılsın, bu sənətin populyasiyası genişlənsin. Məsələn, Bakıda sirk studiyası yaradılmasını və dünyaya çıxaracaq səviyyədə sirk kollektivinin, daha peşəkar truppanın formalaşmasını istəyir.
Ə.ƏLİYEV
XQ