Dünən Bakı Konqres Mərkəzində Azərbaycan Turizm Agentlikləri Assosiasiyasının təşkilatçılığı ilə “Turizm sənaye subyektlərinin ilin yekunları və COP29 ərəfəsində çağırışlar” mövzusunda forum keçirilib.
Turizm sahəsi üzrə ixtisaslaşmış agentliklərinin təmsilçilərini bir araya gətirən forumda sözügedən sektorun uğurları və perspektivləri nəzərdən keçirilib. Assosiasiyanın İdarə Heyətinin sədri Göydəniz Qəhrəmanov çıxışında ötən ilin ölkə turizmin inkişafı üçün uğurlu olduğunu və turizmin qeyri-neft sektorunun bir qolu kimi xüsusi mərkəzə çevrildiyini bildirib. Müstəqillik dövründə Ümummilli lider Heydər Əliyevin turizmə ayırdığı xüsusi diqqət sayəsində bu sahənin tərəqqi mərhələsinə qədəm qoyduğunu söyləyən sədr deyib ki, Prezident İlham Əliyev qayğısı ilə turizm sahəsi daha da inkişaf edib və beynəlxalq aləmə inteqrasiyası güclənib.
Natiqin sözlərinə görə, pandemiya dövrü nəzərə alınmasa, Azərbaycana səfər edən əcnəbilərin sayı son illər 3 dəfə artıb. Mehmanxana və mehmanxana tipli gecələmələrin sayında 8 dəfə artım müşahidə olunub.
Azərbaycan Hotel Assosiasiyası İdarə Heyətinin sədri Eldar Əlimuradov rəhbərlik etdiyi qurumun fəaliyyətindən bəhs edərək deyib ki, ölkə rəhbərliyinin bu sahəyə önəm verməsi turizm sektorunda canlanmaya səbəb olub. Onun sözlərinə görə, 2011-ci ildən sonra turizmin inkişafı yeni mərhələyə qədəm qoymuşdur. Azərbaycanda bir çox beynəlxalq hotel brendləri təmsil olunur. Hazırda ölkəmizdə 757 hotel fəaliyyət göstərir. Postpandemiya dövründə hotelçilik sahəsi yenidən dirçəlib.
Azərbaycan Turizm Bələdçiləri Assosiasiyasının Baş katibi Tural Musayev bələdçilik fəaliyyətinin turizmin inkişafına təkan verən əsas xidmət sektoru olduğunu qeyd edib. O bildirib ki, ötən dövr ərzində ölkəmizdə turizm bələdçilərin sayı 9 dəfə artıb.
Azərbaycan Turizm Blogerləri Assosiasiyası İdarə Heyətinin sədri Azər Qəribov səyahət etdiyi ölkələrin adət-ənənələri və fərqli xüsusiyyətlərindən söhbət açaraq, Azərbaycanın COP29-a ev sahibliyi edəcək ölkə kimi seçilməsinin əhəmiyyəti barədə danışıb.
Forum çərçivəsində turizm sənayesində ixtisaslaşmış assosiasiyalar birgə bəyanat qəbul ediblər. Sənəddə dövlət başçısının apardığı siyasətə tam dəstək ifadə olunub. Sonra forum işini “Turizmin inkişafında biznes-dövlət əməkdaşlığı, son 20 il ərzində əldə edilən uğurlar” və “COP29 ərəfəsində imkanlar və çağırışlar, turizm sənayesindən gözləntilər” adlı panel müzakirələrlə davam etdirib.
Ə.DOSTƏLİ
XQ