Şimali Kipr Türk Cümhuriyyəti Yaxın Şərq Universiteti Rumi Araşdırmaları İnstitutunun təşkilatçılığı ilə Şərqin mütəfəkkir şairi Mövlana Cəlaləddin Ruminin vəfatının 750-ci ildönümü münasibətilə beynəlxalq elmi konfrans keçirilib.
Şimali Kiprin Yaxın Şərq Universitetində baş tutan 8-ci beynəlxalq Rumi konfransında Şimali Kipr, Türkiyə, Azərbaycan, İran, Tacikistan, Özbəkistan, Pakistan, Türkmənistan, Rusiya, Bosniya və Herseqovina, İraq, Misir və Braziliyadan alim və tədqiqatçılar iştirak edirdilər.
Konfrans açılış mərasimi və plenar iclasdan sonra panellərdə məruzə və müzakirələrlə davam edib.
Nizami Gəncəvi adına Milli Azərbaycan Ədəbiyyatı Muzeyinin əməkdaşları da konfransa distant formada qoşularaq məruzələrlə çıxış ediblər. Muzey əməkdaşlarının iştirak etdiyi bölmə öz işinə tarix elmləri doktoru, professor Şahin Fərzəliyev “Cəlaləddin Rumi və Şəms Təbrizinin dostluğu və Mövlananın “Xamuş” təxəllüsü ilə bağlı bəzi qeydlər” məruzəsi ilə başlayıb. Beynəlxalq əlaqələr və dünya muzeyləri şöbəsinin böyük elmi işçisi, filologiya üzrə fəlsəfə doktoru Gülnar Əqiq “Mövlana Cəlaləddin Ruminin poeziyası dünya xalqlarını birləşdirən bir dəyər kimi”, Qədim və orta əsrlər Azərbaycan ədəbiyyatının tədqiqi və təqdimi şöbəsinin böyük elmi işçisi, filologiya üzrə fəlsəfə doktoru Nərmin Əliyeva isə “Cəlaləddin Rumi rübailərinin rübai ənənəsi kontekstində özünəməxsus yeri” adlı məruzələrlə çıxış ediblər.
XQ