Cəfər Cabbarlı adına Gənclər Kitabxanasında Azərbaycan Ədəbiyyat Fondu və “Azərbaycan–Türkiyə Sosial Tərəqqiyə Yardım” İctimai Birliyinin təşkilatçılığı ilə “Müharibə dövrü ədəbiyyatı” mövzusunda dinləmələr keçirilib.

Məclisin ümumi ruhunda özünü qa­barıq göstərən başlıca amil o oldu ki, gənclərin Qarabağın azadlığı uğrunda mübarizə ruhunda tərbiyə olunmasında dövlət siyasəti ilə paralel olaraq, milli ədəbiyyatın da mühüm rolu var. Məhz Azərbaycan ədəbiyyatı xalqımızın Vətən müharibəsində tarixi Zəfər qazanması­na mənəvi stimul verib. Müzəffər Ali Baş Komandanımız İlham Əliyevin rəhərliyi ilə hər cür igidlik nümunəsi göstərməyə hazır olan yeni nəslin təmsilçiləri üçrəngli bayrağımızı Şuşanın, Laçının, Kəlbəcə­rin ən uca zirvələrinə taxıblar. Bu isə həm də müstəqillik və Vətən anlayışlarının daha dərindən dərk olunması yönümün­də milli ədəbiyyatımızın xalq qarşısında xidməti kimi dəyərləndirilir.

Azərbaycan Ədəbiyyatı Fondunun di­rektoru, Beynəlxalq Yazıçılar Gildiyasının üzvü, tanınmış yazıçı, Əməkdar jurnalist Varis Yolçuyev dinləmələrin məqsəd və məramını açıqlayaraq dedi ki, 44 günlük Vətən müharibəsində və ondan sonra torpaqlarımızın işğaldan azad olunması mövzusu daha da aktuallaşıb. “Son illər­də bu barədə çoxlu dəyərli əsərlər yazı­lıb, amma müqəddəs savaşı, xalqımızın mübarizə əzmini, ordumuzun qəhrəman­lığını dünya ədəbi platformasına çıxara biləcək bədii nümunələr hələ yetərincə deyil. Gəlin, müharibə mövzusunun ədə­bi müstəvidə daha dolğun işıqlandırılma­sı ilə bağlı qarşıda duran vəzifələrdən danışaq”.

Sonra ictimai birliyin sədri, rəssam Nigar Helmi Abbasbəyli özünün bir sıra ölkədə nümayiş olunan “Qarabağ mirası” sərgisindən bəhs etdi. Qeyd olundu ki, mədəniyyətin bütün sahələrində, o cüm­lədən də bədii ədəbiyyatda müharibə mövzusunun aparıcı rolu daha da güc­ləndirilməli, bizə qarşı mənfur düşmənin apardığı mədəni soyqırımı faktları hər vasitə ilə ifşa olunmalıdır.

Azərbaycan Aşıqlar Birliyinin sədri, Əməkdar elm xadimi, Dövlət mükafatı laureatı, filologiya elmləri doktoru Məhər­rəm Qasımlı çıxışında görkəmli ədib Mir Cəlal Paşayevin müharibə mövzu­sunda qələmə aldığı əsərlərini nümunə göstərərək, bunun hazırkı ədəbi nəsil üçün əsl örnək olduğunu konkret misal­larla əsaslandırdı.

Xalqımızın mübarizələrlə dolu şərəfli tarixi haqqında bir neçə sanballı əsərin müəllifi olan yazıçı, Əməkdar mədəniy­yət işçisi Yunus Oğuz müasir ədəbi pro­sesdə müharibə mövzusunun tutduğu yerdən, yazılan əsərlərin təbliği, xarici dillərə tərcüməsi kimi məsələlərdən da­nışdı. Azərbaycan Yazıçılar Birliyi Güney Azərbaycan şöbəsinin rəhbəri Sayman Aruz, filologiya elmləri doktoru Esmira Fuad, filologiya üzrə fəlsəfə doktoru, jur­nalist Şərəf Cəlilli, kitabxananın direktoru Aslan Cəfərov, Qarabağ müharibəsi ve­teranı, Əməkdar jurnalist Əntiqə Qonaq da çxışlarında mövzuya dair fikirlərini bö­lüşdülər, maraqlı təkliflər səsləndirdilər.

Gənc şair Cavid Qasımov müharibə mövzusunda yazdığı şeiri oxudu, şəhid ailələrinin üzvləri və başqaları çıxış et­dilər. Müharibə mövzusunun ədalət və sülh problemi ilə vəhdət təşkil etdiyinə və yazarların bədii nümunələrə məhz bu aspektdən yanaşmalı olduqlarına diqqət cəlb edildi. Qələbəni bədii dillə əsaslan­dıran, təsəlli verən müharibə ədəbiyya­tının qəlbləri tərpədə bilməsi, hər kəsi yaxşı mənada həyəcanlandırması üçün yazarların bütün istedad və bacarıqlarını səfərbər etməsinin vacibliyi dönə-dönə vurğulandı. 

Ə.ƏLİYEV
XQ