“Qorqud Ata” festivalı
Azərbaycanın ev sahibliyi ilə keçirilən “Qorqud Ata” Türk Dünyası Film Festivalı çərçivəsində Azərbaycan, Türkiyə, Özbəkistan, Qazaxıstan, Qırğızıstan və Türkmənistanla yanaşı, Qaqauz Yeri (Moldova), Tatarıstan, Saxa-Yakutiya, Dağıstan (Noqay), Kabardin-Balkar, Çuvaşıstan, Qaraçay-Çərkəz, Tuva və Başqırdıstandan (Rusiya Federasiyası) 32 bədii, sənədli və animasiya filmləri təqdim olundu. Maraq doğuran filmlərdən biri də türkiyəli kinematoqrafçıların çəkdiyi “Ulduz tozu” oldu.
Ekran işində iki qardaşın - Kənan və Mustafanın həyat hekayəsindən bəhs olunur. Evlərinin çardağında uzanıb söhbət edən qardaşlar göy üzündə parlayan bir cüt ulduz görürlər. Yaşca kiçik olan Kənan böyük ulduzu seçir. Onlar bir-birlərinə söz verirlər ki, kimin ulduzu sönmək istəsə, digəri buna imkan verməyəcək. Yaşamaq və bu həyatda mübarizə aparmaq üçün daim bir-birinə dəstək olacaqlar.
Onlar hər gün dostları ilə birgə futbol oynayır, söhbət edir və əylənirlər. Bir gün Almaniyada yaşayan dayıları Firudin onlara qonaq gəlir. Böyük qardaş Mustafaya velosiped, kiçik qardaş Kənana isə bir qutu şokolad hədiyyə edir. Kənan bundan məmnun olmayıb, Mustafanın paxıllığını çəkməyə başlayır. Hər gün yaraşıqlı və bahalı velosipedə minmək arzusu ilə alışıb yansa da, qardaşı buna imkan vermir. Bir gün xəlvəti velosipedlə kənd yoluna çıxan Kənan dərəyə yuvarlanır. Bunu eşidən valideynləri tez hadisə yerinə gedirlər. Kənanı təcili xəstəxanaya aparırlar.
Qardaşını itirmək qorxusu ilə üzləşən Mustafa etdiyi hərəkətdən çox peşman olur. “Kaş ki, vaxtında icazə verəydim velosiped sürməsinə, indi belə olmazdı” - deyə düşünür. Çardaqda uzanaraq fikirlər selinə qərq olan Mustafa qardaşının seçdiyi nəhəng ulduzun hərəkət etdiyini görür. Cəld yerindən qalxıb velosipedinə minir və ulduzun ardınca sürməyə başlayır. Onu yerə düşməyə qoymayan Mustafa ulduzu ovuclarının arasına alır. Qeybdən bir səs: “məni burax, qardaşın yaşayacaq, onun taleyi hələ qabaqdadır” - deyir. Mustafa qardaşının tezliklə sağalması üçün dua edir və əlindəki ulduzu səmaya doğru uçurur. Həmin an ulduzdan qopan zərrəciklər yerə səpələnməyə başlayır. Bu zaman onun gözlədiyi ən böyük möcüzə baş verir, qardaşı sağalır...
Filmin rejissoru Ahmet Sönmezdir. Filmdə rolları Süleyman Biçen, Berat Çağan, Serdar Özer, Açelya Devrim Yılhan, Toprak Can Adıgüzel və digər aktyorlar canlandırırlar.
Festival digər filmlərin nümayişi ilə də yaddaqalan oldu. Cəfər Cabbarlı adına “Azərbaycanfilm” kinostudiyasının “TRT” və “Sinema evi” ilə müştərək istehsalı olan “Məryəm” filmi də yüksək dəyərləndirildi.
Mədəniyyət Nazirliyinin müşaviri Orxan Fikrətoğlu filmin təqdimatında bildirdi ki, “Məryəm” filmi gənc nəsil üçün çox vacib və nümunəvi bir ekran əsəridir. Bu film sevgi, vəfa tarixçəsidir.
Ekran əsərində Məryəm adlı qızın uzun illər sonra atasını görmək üçün Azərbaycana gəlişi təsvir olunur. Ailəsi ilə birgə yaşadığı kəndə gələn gənc qız atasını ucqar bölgədə yerləşən psixiatrik xəstəxanada tapır. Avtobus sürücüsü olmuş bu adam uzun illər əvvəl keçirdiyi ağır qəzadan sonra yaddaşını itirərək psixiatriya xəstəxanasına yerləşdirilir. Məryəm isə onun yaddaşını bərpa etmək üçün var gücü ilə çalışır. Uşaq vaxtı atası ilə birgə keçirdiyi ən xoş anları xatırlatmağa çalışan qızcığaz birgə çəkdikləri fotoşəkilləri ona göstərir, hər gün xəstəxanaya gələrək atasının yaddaşını oyatmağa başlayır. Başına gələn hadisələri az da olsa xatırlamağa çalışan ata uzun zamandan sonra qızını tanımağa başlayır. Filmdə göstərilən hadisələr Məryəmin xəstəxananın baş həkimi ilə üz-üzə gəlməsi və qarşısına çıxan çətinliklər ətrafında cərəyan edir.
“Azərbaycanfilm” kinostudiyasının istehsal etdiyi "Məryəm" tammetrajlı bədii filminin prodüseri Fariz Əhmədov, təsvir üzrə rejissoru Orxan Abbasov, rəssamı isə Zaur Abdullayevdir. Filmdə rolları aktyorlar Təhminə Rafaella, Ayşad Məmmədov Ərtoğrul Kamal, Zaur Şəfiyev, Qəmər Məmmədova, Nurəddin Mehdixanlı ifa edirlər. Bakıda keçirilən film nümayişləri, müxtəlif tədbir və təqdimatlarla davam edən III “Qorqud Ata” Türk Dünyası Film Festivalı dünən sona çatdı.
Fidan SALMANLI
XQ