Azərbaycan Dövlət Akademik Milli Dram Teatrı Mədəniyyət Nazirliyinin dəstəyi ilə Gürcüstanda Nodar Dumbadze adına IV Beynəlxalq Teatr Festivalında ölkəmizi təmsil edir.
Teatrın mətbuat xidmətindən verilən məlumata görə, Ozurgeti şəhərində iyulun 15-dək davam edəcək festivalda Azərbaycan və Gürcüstanla yanaşı, İspaniya, Qazaxıstan, Ukrayna, Portuqaliya və Özbəkistandan olan teatrlar da iştirak edirlər.
Festivalın proqramına tamaşalar, kitab təqdimatları, Avrasiya Teatr Assosiasiyası təsisçilərinin görüşü daxil edilib. Tədbirlərə iyulun 15-də Ozurgetidə Aleksandr Tsutsunava adına Peşəkar Dövlət Dram Teatrının 155 illik yubileyinə həsr olunmuş bayram gecəsi və mükafatlandırma mərasimi ilə yekun vurulacaq.
Azərbaycan Dövlət Akademik Milli Dram Teatrı məşhur gürcü yazıçısı Qoderzi Çoxelinin eyniadlı hekayəsi əsasında səhnələşdirilən “Küknarlara məktub” tamaşası ilə çıxış edib. Boris Şukin adına Teatr İnstitutunun məzunu Nigar Güləhmədovanın quruluşçu rejissoru olduğu səhnə əsəri müharibədən qayıdan, kürəyində küknar ağacı bitən yaralı əsgərin cəmiyyətə uyğunlaşa bilməməsi, hamı kimi normal həyatı yaşamağı bacarmaması haqqındadır. Ətrafında olan insanlar onu cəmiyyətə uyğunlaşdırmaq istəsələr də, bütün cəhdlər boşa çıxır. Yaralı əsgər cəmiyyəti yox, təbiəti seçir, ağaca və torpağa çevrilir. Müəllifin mövqeyinə görə, ən ciddi qayıdış təbiətə olmalıdır.
Tamaşanın quruluşçu rəssamı Samirə Həsənova, işıq üzrə rəssamı Rafael Həsənov, musiqi tərtibatçısı Kamil İsmayılov, rejissor assistenti Dilbər İsmayılovadır. Əməkdar artistlər Elşən Rüstəmov, Almaz Amanova, Ayşad Məmmədov, aktyorlar Rüstəm Rüstəmov, Ramin Şıxəliyev, Dilarə Nəzərova, Elçin Əfəndi, Firuzə Balayeva, Lalə Süleymanova rollarının öhdəsindən bacarıqla gəliblər. Səhnə əsəri festivalın münsiflər heyəti, eləcə də tamaşaçılar tərəfindən böyük maraqla və alqışlarla qarşılanıb.
***
Tbilisidəki M.F.Axundzadə adına Azərbaycan Mədəniyyəti Muzeyində Şuşa şəhərinin 2023-cü il üçün “Türk dünyasının mədəniyyət paytaxtı” seçilməsi ilə əlaqədar fotosərgi açılıb.
Ekspozisiyada Şuşanın füsunkar gözəlliyini, Azərbaycan və dünya mədəniyyətinə, incəsənətinə maraqlı və unudulmaz incilər bəxş etmiş tarixi şəxsiyyətlərin fotoları nümayiş etdirilib. Sərgini ziyarət edənlərə Şuşa açıqcaları paylanılıb.
Layihə rəhbəri Fərhad Abdulov sərgini ziyarət edənlərə layihənin məqsədi barədə məlumat verib. Bildirib ki, sərgi Azərbaycan Respublikasının Gənclər Fondunun dəstəyi ilə "Uşaq və Yeniyetmələrə Dəstək” (UYD) İctimai Birliyi tərəfindən icra olunan “Shusha, the cultural capital of Azerbaijan, in photos” (Azərbaycanın mədəniyyət paytaxtı Şuşa fotolarda) adlı beynəlxalq fotoqrafiya layihəsi çərçivəsində gerçəkləşib.
Geniş maraq doğuran layihənin məqsədi Şuşanın tarixinin və mədəni irsinin yerli, türk və gürcü gəncləri arasında təbliğ edilməsindən ibarətdir.
Hazırladı:
Əli ƏLİYEV,
“Xalq qəzeti”
