Bu il sentyabrın 1-də keçiriləcək parlament seçkilərinə hazırlıq işləri davam edir. Deputat mandatı qazanmaq uğrunda mübarizə gündən-günə güclənir. Artıq bir neçə gündən sonra deputatlığa namizədlər zəruri olan seçki sənədlərini DSK-lara təqdim etməyə başlayacaqlar. Bu, Mərkəzi Seçki Komissiyasının “Milli Məclisə növbədənkənar seçkilərin keçirilməsi üzrə əsas hərəkət və tədbirlərin Təqvim Planı”nda da öz əksini tapıb.
Seçki Məcəlləsinə əsasən, irəli sürülmüş namizədlərin qeydə alınması üçün namizəd və ya siyasi partiyanın, siyasi partiyalar blokunun səlahiyyətli nümayəndəsi səsvermə gününə ən çoxu 50 və ən azı 30 gün qalmış saat 18:00-dək müvafiq seçki komissiyasına irəli sürülmüş namizədin müdafiəsi üçün toplanmış seçici imzaları olan imza vərəqələrini, seçici imzaları toplanmasının yekunu haqqında Mərkəzi Seçki Komissiyasının müəyyənləşdirdiyi formada tərtib edilmiş protokolun 2 nüsxəsini, Məcəllənin 53.3-cü və 54.8-ci maddələrinə uyğun olaraq namizəd haqqında təqdim edilmiş məlumatlarda dəyişikliklər barədə bildirişi, namizədin gəlirlərinin miqdarı və mənbələri barədə məlumatı, mülkiyyət hüququ əsasında namizədə məxsus əmlak barədə məlumat və namizədin ilkin maliyyə hesabatını (seçici imzaları toplanmasının təşkilinə sərf edilən vəsait haqqında məlumatlar göstərilməklə) təqdim etməlidir.
İşğaldan azad edilmiş ərazilərdə əlavə seçki məntəqələri formalaşdırılıb
İşğaldan azad edilmiş ərazilərdə məskunlaşan, eləcə də uzunmüddətli bərpa, tikinti-quruculuq və abadlıq işlərində çalışan çoxsaylı seçicilərin seçki hüquqlarının təmin edilməsi prioritet vəzifələrdəndir. Keçmiş məcburi köçkün soydaşlarımızın dədə-baba yurdlarına qayıtmaları nəticəsində həmin ərazilərdə məskunlaşanların sayı getdikcə çoxalır. Bu baxımdan həmin ərazilərdə yeni seçki məntəqələrinin yaradılması zərurətə çevrilib.
MSK sədrinin müavini Rövzət Qasımov bildirib ki, azad olunmuş ərazilərdə 8 əlavə seçki məntəqəsinin yaradılması qərara alınıb. Növbədənkənar parlament seçkilərində 34 daimi seçki məntəqəsi fəaliyyət göstərəcək. R.Qasımovun sözlərinə görə, azad olunmuş ərazilərdə müvəqqəti seçki məntəqələri də yaradılacaq.
Azad edilmiş ərazilərdə prezident seçkilərində 26 daimi, 21 müvəqqəti seçki məntəqəsi fəaliyyət göstərmişdi.
ATƏT Azərbaycanda seçkiləri müşahidə edəcək
Azərbaycanda keçirilən seçkilər həmişə beynəlxalq aləmin diqqət mərkəzində olub. Bu il keçiriləcək növbədənkənar parlament seçkilərinin də böyük maraq doğuracağı istisna deyil. ATƏT PA-nın mətbuat xidmətinin yaydığı məlumatda bildirlir ki, qurumun nümayəndələri sentyabrda keçiriləcək parlament seçkiləri ilə bağlı müşahidəçilər missiyasının formalaşdırılması üçün hazırlıq işlərinə başlayıb.
Məlumatda bildirilir ki, ATƏT PA seçkilərə dəvət aldığını təsdiqləyib və missiya göndərməyi planlaşdırır. Təşkilati işlərə yenicə başlanılıb. Müşahidəçilərin sayı son qeydiyyat tarixindən sonra, yəni seçki gününə bir neçə həftə qalmış müəyyən ediləcək. Həmçinin qeyd edilib ki, seçki günü ATƏT PA missiya rəhbərlərinin iştirakı ilə mətbuat konfransı keçirəcək.
17 siyasi partiyanın səlahiyyətli nümayəndəsi təsdiqlənib
MSK-dan verilən məlumata görə, sentyabrın 1-də keçiriləcək növbədənkənar parlament seçkilərində iştirak etmək üçün indiyədək 156 nəfər deputatlığa namizədliyini irəli sürüb. Onlardan 71 nəfərin namizədliyinin irəli sürülməsi təsdiqlənib.Bir nəfər öz ərizəsi ilə seçkilərə qatılmaqdan imtina edib.
MSK 17 siyasi partiyanın 458 səlahiyyətli nümayəndəsini təsdiqləyib.
Artıq seçkiləri izləmək istəyən müşahidəçilər də müraciət edirlər. Bu vaxta qədər 128 nəfər müşahidə aparmaq üçün müraciət edib və onlar müsbət cavab alıblar.
Hazırladı:
Əliqismət BƏDƏLOV
XQ
