Mayın 24-də Sahibə Qafarovanın sədrliyi ilə Milli Məclisin yaz sessiyasında növbəti plenar iclası keçirildi.
Əvvəlcə deputatlar cari məsələlərdən danışdılar. Çıxış edənlər Ermənistanda ictimai-siyasi gərginliyin davam etməsindən və bunun əsas təşkilatçısının keşiş Baqrat Qalstanyan adında keşişin olduğunu bildirdilər. Qeyd edildi ki, o, yenidən “izdihamlı” mitinqlər təşkil etməyi planlaşdırır.
Deputatlar İkinci Qarabağ müharibəsində erməni keşişlərin əlində silah gördüklərini və tarix boyu azərbaycanlılarla ermənilərin dinc şəraitdə yaşamasına mane olan əsas qurumlardan birinin də erməni kilsəsi olduğunu diqqətə çatdırdılar. Kilsə bu gün də eyni siyasəti davam etdirir. Əslində, dinlərin əsas vəzifələrindən biri də xalqlar arasında sülhü və barışı təmin etmək olub. Heç bir din insanlığı müharibəyə və düşmənçiliyə çağırmayıb. Ancaq keşiş Baqrat Qalstanyan erməni cəmiyyətinə sülhün alternativinin müharibə olduğunu deyir və insanları müharibəyə çağırır.
Qeyd edildi ki, müharibədən bezmiş erməni xalqı bu saxtakar keşişə və onun arxasında qorxaqcasına gizlənən köhnə rejimin qalıqlarına öz yerini göstərməlidir: “Ermənistanın yeganə çıxış yolu Azərbaycan və Türkiyə ilə normal münasibətlərin qurulmasından keçir. Bunu erməni cəmiyyətinin böyük əksəriyyəti başa düşdüyündən baqratların arxasınca getmir və onları dəstəkləmir” – deyə çıxışlarda bildirildi.
Sonra S.Qafarova iclasda 7 qanun layihəsinin müzakirəsinin planlaşdırıldığını diqqətə çatdırdı. Birinci məsələ – Gender bərabərliyinin təmin edilməsinə nəzarəti həyata keçirən icra hakimiyyəti orqanının 2023–cü ildə fəaliyyəti haqqında Ailə, Qadın və Uşaq Problemləri üzrə Dövlət Komitəsinin sədri Bahar Muradova məlumat verdi.
O, Dövlət Komitəsinin 2023-cü ildə öz əsasnaməsində müəyyən edilmiş istiqamətlər üzrə vəzifələrini uğurla həyata keçirdiyini bildirdi. Dedi ki, komitə il ərzində bütün dövlət orqanları ilə səmərəli əməkdaşlıq edib, beynəlxalq və qeyri-hökumət təşkilatları ilə birgə layihələr həyata keçirib, 2023-cü ildə normativ hüquqi bazanın təkmilləşdirilməsi sahəsində önəmli addımlar atılıb: “2023-cü il ərzində Dövlət Komitəsinin Uşaq və Ailələrə Dəstək Mərkəzləri tərəfindən erkən nikah, məişət zorakılığı, sağlam həyat tərzi və reproduktiv sağlamlığın, milli-mənəvi dəyərlər və vətənpərvərlik, insan hüquqlarının təbliği, eyni zamanda, dövlət proqramları və milli fəaliyyət planlarının müvafiq bəndlərinin icrası məqsədilə bir sıra tədbirləri keçirilib. Komitə yerli icra hakimiyyətləri orqanları ilə səmərəli əməkdaşlıq əlaqələri qurub. Komitənin tövsiyəsi ilə bütün bələdiyyələrdə Gender Komissiyaları yaradılıb”.
Hesabatla bağlı çıxış edən deputatlar illik məlumatı yüksək qiymətləndirib, sənədin peşəkar səviyyədə tərtib olunduğunu, bütün sahələr üzrə detallı təhlillərin aparıldığını qeyd etdilər və hesabat qənaətbəxş hesab olundu.
Təklif edildi ki, Əmək Məcəlləsinə ailəli və uşaqlı qadınların işə 1 saat gec gəlib, 1 saat tez getməsi ilə bağlı maddə salınsın.
Sonra gündəlikdəki qanun layihələri müzakirə olunaraq müvafiq qərarlar qəbul edildi.
Spiker iclasın sonunda çıxış edərək 4 gündən sonra may ayının 28-də ölkəmizdə Müstəqillik Gününün qeyd ediləcəyini bildirdi . O dedi ki, 106 il bundan əvvəl Azərbaycan Xalq Cümhuriyyətinin elan olunması xalqımızın zəngin dövlətçilik potensialının yeni tarixi şəraitdə təzahür etməsi idi. Demokratik və dünyəvi dövlət quruculuğu yolunda atılan inamlı addımlar təkcə ölkəmizin deyil, bütün müsəlman Şərqinin siyasi təkamülündə mühüm rol oynayıb. Xalqımız Azərbaycan Xalq Cümhuriyyətinin yaratdığı ənənələrdən bəhrələnərək 1991-ci ildə dövlət müstəqilliyini bərpa etmişdir.
1993-cü ilin iyun ayında xalqın təkidli tələbi ilə ali hakimiyyətə qayıdan Ulu öndər Heydər Əliyevin misilsiz idarəçilik məharəti, əzmkarlığı və yorulmaz səyləri nəticəsində dövlətin qarşısında dayanan ağır problemlər həll edildi, Azərbaycan sistemli böhrandan çıxıb ardıcıl inkişaf yoluna qədəm qoydu. Ümummilli liderimizin inkişaf strategiyasını layiqincə davam etdirən Prezident İlham Əliyevin həyata keçirdiyi daxili və xarici siyasət Azərbaycanı gələcəyə inamla baxan, geniş bir bölgədə söz sahibi olan qüdrətli dövlətə çevirmişdir”.
Sonra Milli Məclis Azərbaycan Prezidenti İlham Əliyev və Birinci vitse-prezident Mehriban Əliyevanı 28 May Müstəqillik Günü münasibətilə təbrik etdi. S.Qafarova təklif etdi ki, bununla bağlı Prezident İlham Əliyev və Birinci vitse-prezident Mehriban Əliyevaya Milli Məclis adından təbrik məktubu göndərilsin.
Əliqismət BƏDƏLOV
XQ
