Parlament sədrlərinin növbəti görüşü 

Cenevrədə Parlament Sədrlərinin VI Ümumdün­ya Konfransı Təşkilat Komitəsinin 1-ci iclası çərçi­vəsində Azərbaycan və Ermənistan parlamentlərinin sədrlərinin ikinci görüşü keçirilib. 

Görüşdə Azərbaycan və Ermənistan arasında aparılan sülh danışıqları fonunda iki ölkənin parla­mentlərinin sülh prosesinə necə dəstək verə biləcəyi ilə bağlı məsələlərin müzakirəsi davam etdirilib. 

Görüş konstruktiv atmosferdə keçib. Tərəflər parlamentlər arasında dialoqun davam etdirilməsi barədə razılığa gəliblər.

Milli Məclisin Pİ ilə Anlaşma Memorandumu 

İsveçrənin Cenevrə şəhərində Azərbaycan Res­publikası Milli Məclisi ilə Parlamentlərarası İttifaq arasında Birləşmiş Millətlər Təşkilatının İqlim Də­yişikliyi üzrə Çərçivə Konvensiyası Tərəflər Kon­fransının 29-cu sessiyası – COP29 çərçivəsində Parlament görüşünün təşkili ilə əlaqədar Anlaşma Memorandumu imzalanıb. Sənədi Milli Məclisin Sədri Sahibə Qafarova və Parlamentlərarası İtti­faqın Baş katibi Martin Çunqonq imzalayıblar.

Mərasimdə çıxış edən Sahibə Qafarova sənə­din əhəmiyyətini qeyd edərək deyib ki, bu, COP29 çərçivəsində keçiriləcək tədbirlərə parlament plat­formasında dəstək verəcək. Onun sözlərinə görə, bu tədbir parlamentarilərə fikir mübadiləsi aparmağa və iqlim dəyişikliyi ilə mübarizədə təkliflərlə və yeni fikirlərlə çıxış etməyə imkan yaradacaq. 

O bu sənədin Milli Məclis ilə aparılan danışıqlar nəticəsində ərsəyə gəldiyini bildirərək parlament gö­rüşünün parlament diplomatiyası və qlobal çağırış­lara qarşı birgə mübarizə baxımından da tarixi bir hadisə olacağını söyləyib.

BMT-nin Cenevrə ofisində görüş

Cenevrədə işgüzar səfərdə olan Milli Məclisin Sədri Sahibə Qafarova BMT-nin bu şəhərdəki ofisi­nin Baş direktoru Tatyana Valovaya ilə görüşüb.

BMT-nin Cenevrədəki ofisindəki “Azərbaycan otağı”nda keçirilən görüşdə bu təşkilatla ölkəmiz arasında münasibətlərə dair müzakirələr aparılıb. Qeyd edilib ki, Azərbaycan BMT və onun institutları ilə yaxından əməkdaşlıq edir. Görüşdə müasir qlo­bal çağırışların həllində parlament ölçüsünün əhə­miyyəti diqqətə çatdırılıb.

“Azərbaycan otağı”nın Heydər Əliyev Fondu tərəfindən bərpa olunduğu vurğulanaraq, fondun çoxşaxəli fəaliyyəti yüksək qiymətləndirilib, o cümlə­dən, Heydər Əliyev Fondunun BMT-nin layihələrin­də fəal iştirakı təqdir edilib.

Spiker bu sessiya çərçivəsində Parlamentləra­rası İttifaqla Milli Məclisin birgə təşkilatçılığı ilə ke­çiriləcək parlament konfransı haqqında da məlumat verib.

Görüşdən məmnunluğunu bildirən BMT-nin Ce­nevrədəki ofisinin Baş direktoru Tatyana Valova­ya Azərbaycanın BMT üçün bir sıra istiqamətlərdə əməkdaşlıq baxımından mühüm tərəfdaş olduğunu diqqətə çatdırıb. 

Baş direktor Azərbaycanın COP29-a evsahibliyi etməsindən məmnunluğunu ifadə edərək ölkəmizin “yaşıl enerji” sahəsində atdığı uğurlu addımların əhəmiyyətini vurğulayıb.

Əliqismət BƏDƏLOV
XQ