Dünən Naxçıvanda 8 Mart Beynəlxalq Qadınlar Günü münasibətilə təntənəli toplantı keçirilib.
Muxtar Respublika Ailə, Qadın və Uşaq Problemləri üzrə Dövlət Komitəsinin təşkil etdiyi mərasimin əvvəlində Azərbaycan Respublikası Prezidentinin səlahiyyətli nümayəndəsi Fuad Nəcəfli və iştirakçılar istedadlı qadınların rəsm və əl işlərindən, ailə təsərrüfatı məhsullarından, eləcə də qadın müəlliflərin kitablarından ibarət sərgiyə baxıblar. Məclisdə Naxçıvan Televiziyasının hazırladığı “Naxçıvan Muxtar Respublikası – 100: Azərbaycanın inkişafında qadınların rolu” filmi nümayiş etdirilib.
Toplantıda Fuad Nəcəfli ölkəmizdə həyata keçirilən dövlət qadın siyasətinin uğurlarından söz açaraq muxtar respublika qadınlarını beynəlxalq bayram münasibətilə təbrik edib, onlara yeni müvəffəqiyyətlər arzulayıb. Qadın əməyini müstəqil Azərbaycanın yumşaq gücü adlandıran natiq Birinci vitse-prezident Mehriban xanım Əliyevanın rəhbərliyi ilə xalqımızın milli dəyərlərinin, adət-ənənələrinin dünya miqyasında təbliği, qorunması və inkişaf etdirilməsi istiqamətində görülən çoxsaylı tədbirlərdən söz açıb.
Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin sədri Ramilə Seyidova qeyd edib ki, bu gün dövlət qadın və gender siyasəti Naxçıvan Muxtar Respublikasında da uğurla həyata keçirilir. O, qadınlara göstərilən diqqət və qayğıya görə Prezident İlham Əliyevə minnətdarlığını bildirib.
Sonra muxtar respublikanın ictimai-siyasi həyatında fəal iştirak edən bir qrup qadına müxtəlif nominasiyalar üzrə diplomlar təqdim olunub.
Mərasim bədii hissə ilə davam edib.
XQ