Növbədənkənar prezident seçkiləri ilə əlaqədar hazırlıq işləri davam edir. Seçki məntəqələri, demək olar ki, hazırlıq işlərini başa çatdırmaq üzrədir. Hazırda bildirişlərin paylanılması prosesi davam edir. 49 saylı Abşeron ikinci seçki dairəsinin əhatəsindəki seçki məntəqələrində də seçkinin mütəşəkkil başa çatması üçün bütün imkanlardan istifadə olunur. Dairə üzrə yaradılan 38 seçki məntəqəsində hazırlıq işləri Mərkəzi Seçki Komissiyasının təlimatları üzrə aparılır. Builki seçkilərdə dəqiqləşdirilmiş seçici siyahısı üzrə 49 min 579 nəfər qeydə alınıb.
Dairədən verilən məlumata görə, 18 yaşına çatan 34 seçici ilk dəfə səsvermə hüququndan istifadə edə biləcək. Onlarla maarifləndirmə söhbətləri aparılmış və seçki prosesinə hazırlanmışdır. Dairə üzrə yaşlı seçicilər də müəyyənləşdirilib. Yaşı 80-dən çox olanı seçicilərin 764 nəfəridir.
Dairə Seçki Komissiyasının sədri Rafəddin Nağdəliyev söhbət əsnasında bildirdi ki, Azərbaycan xalqı suverenliyini tam bərpa etdikdən sonra ilk dəfə seçkilərə hazırlaşır. Mərkəzi Seçki Komissiyası aşağı seçki komissiyasının üzvləri üçün genişmiqyaslı maarifləndirmə proqramı həyata keçirir. Məntəqə seçki komissiyasının üzvləri üçün keçirilən treninqlər isə yekunlaşıb. Treninqlərdə seçki gününə dair sənədlərin tərtibi, prosesin gedişi, seçici–məntəqə komissiya üzvünün münasibətləri və digər vacib məsələlər izah olunur. Təlimlərə məntəqə seçki komissiyalarının bütün üzvləri cəlb olunub.
Treninqləri Mərkəzi Seçki Komissiyasının təşkil etdiyi “Trenerlər üçün treninq” kursunda iştirak etmiş dairə komissiyalarının üzvləri aparır. Hər bir iştirakçıya Mərkəzi Seçki Komissiyası tərəfindən hazırlanan “Seçki günü üçün yaddaş” kitabçası, eləcə də səsvermənin nəticələri haqqında protokol nümunəsi və bir sıra digər zəruri metodiki vəsaitlər, əyani materiallar təqdim olunub.
DSK sədri deyib ki, seçki prosesinin şəffaflığını təmin etmək məqsədi ilə altı məntəqədə müşahidə kameraları quraşdırılıb. Seçki günü məntəqələrdə səsvermə prosesi haqqında məlumatların cəmiyyətə çatdırılması üçün yerli və beynəlxalq müşahidəçilərin, media subyektlərinin fəaliyyətinə qanunvericiliyə uyğun şərait yaradılacaq, səsvermə prosesinin yüksək səviyyədə təşkili təmin olunacaq.
Əliqismət BƏDƏLOV
XQ
