Növbədənkənar prezident seçkiləri 30 ildən sonra işğaldan azad edilmiş Qarabağımızda da keçiriləcək. Bu, hər bir azərbaycanlını, xüsusən də doğma torpaqlara qayıtmış sakinlərin böyük səbirsizliklə gözlədikləri gündür.
Növbədənkənar prezident seçkilərinin toy – bayram şəraitində gözləyənlər sırasında Talış kəndinin sakinləri də var. Kənd sakinləri Suqovuşan qəsəbəsindəki seçki məntəqəsində səs verəcəklər. 97 saylı Tərtər-Naftalan-Goranboy seçki dairəsində 59 seçki məntəqəsi yaradılıb. Həmin məntəqələrdən ikisi işğaldan azad edilmiş ərazilərdə yerləşir. Kəndlərdən biri də Tərtər rayonunun Talış kəndidir. Bu kənd Qarabağ iqtisadi rayonunda ilk bərpa olunan kənddir. Kənddə 4 yol-kommunikasiya şəbəkəsi tam olaraq qurulub.
Kənd sakinləri uzun illərin həsrətindən sonra nəhayət, ötən ilin martında doğma ata-baba yurdlarına qayıdıblar. Burada sakinlər üçün hər cür şərait yaradılıb. Kənddə Novruz, Qurban, Həmrəylik Günü və Yeni il bayramlarını qeyd edən sakinlər növbədənkənar prezident seçkilərinin keçiriləcəyi günü səbirsizliklə gözləyirlər. Onlar həmin günün əsil bayram olacağını deyirlər. Çünki bu seçkilər işğaldan azad edilmiş ərazilərimizdə ilk dəfə keçiriləcək. Talış kənd sakinləri böyük həvəslə, qalib ölkənin qalib vətəndaşları kimi seçki məntəqəsinə gedərək səsvermədə iştirak edəcəklər.
Əliqismət BƏDƏLOV
XQ