2024-cü il fevralın 7-nə təyin edilmiş növbədənkənar Azərbaycan Respublikası Prezidenti seçkilərində ilk dəfə səs verəcək Naxçıvan Dövlət Universitetinin nəzdində olan Texniki Kollecdə tələbə-gənclər üçün seçki hüququ ilə bağlı maarifləndirici infosessiya keçirilib.
Texniki Kollecin direktoru Asəf Ruşanov bu il ilk dəfə səs verəcək gəncləri seçkilərdə səsvermə hüququ qazanmaları münasibətilə təbrik edib.
Sonra 4 saylı Naxçıvan şəhər Dairə Seçki Komissiyasının sədri Çingiz Həsənli gənclərə səsvermə proseduru, seçki gününədək və seçkilər zamanı bilməli olduqları zəruri hüquqi məsələlər haqqında məlumat verib və tələbələri maraqlandıran sualları cavablandırıb.
Görüş Azərbaycan Tələbə Gənclər Təşkilatları İttifaqının təşkilatçılığı və Mərkəzi Seçki Komissiyasının dəstəyi ilə gerçəkləşib. İnfosessiyanın keçirilməsində məqsəd seçki sistemi, seçicinin hüquq və vəzifələri barədə gənclərin maarifləndirilməsi, habelə baş tutacaq seçkilərdə ilk dəfə seçici kimi iştirak edəcək tələbələrin məlumatlılıq səviyyəsinin və seçici fəallığının artırılmasıdır.
Analoji maarifləndirmə tədbiri Naxçıvan Dövlət və “Naxçıvan” universitetlərində də keçirilib.
Əliqismət BƏDƏLOV
XQ
