Dekabrın 22-də Sahibə Qafarovanın sədrliyi ilə Milli Məclisin payız sessiyasında növbəti plenar iclası keçirilib. İclası açan S.Qafarova bildirib ki, 2 gün sonra, dekabrın 24-də Prezident İlham Əliyevin doğum günüdür.
Spiker diqqətə çatdırıb ki, qədim dövlətçilik ənənələrinə malik olan Azərbaycan öz tarixinin ən şanlı dövrlərindən birini yaşayır. Biz siyasi, iqtisadi və hərbi qüdrəti ilə geniş bir bölgədə söz sahibi olan dövlətimizlə qürur duyuruq. Son 30 ildə ölkəmizin inkişafı yolunda ən böyük maneə olan bir problem artıq keçmişdə qalıb. 2020-ci ilin payızında 44 günlük Vətən müharibəsi və bu il sentyabrın 20-də antiterror tədbirləri nəticəsində əzəli tarixi torpaqlarımız olan Qarabağın və Şərqi Zəngəzurun işğalına son qoyulub, dövlətimizin ərazi bütövlüyü və suverenliyi tam bərpa edilib.
Qeyd edilib ki, bütün bu uğurların təməlində Ulu öndər Heydər Əliyevin inkişaf strategiyasını layiqincə davam etdirən dövlət başçısı möhtərəm cənab İlham Əliyevin uzaqgörən daxili və xarici siyasət xətti dayanır. Məhz onun fenomenal liderlik məharəti, idarəçilik bacarığı, əzmi və cəsarəti sayəsində Azərbaycan dünyanın sayılıb-seçilən dövlətləri sırasına çıxıb. Dövlətimizin başçısı xalq və Vətən yolunda müstəsna xidmətləri ilə öz adını Azərbaycan tarixinə qızıl hərflərlə yazıb.
S.Qafarova bildirib ki, ölkəmizin sürətli və dinamik iqtisadi inkişafı xalqımızın və dövlətimizin xoşbəxt gələcəyini təmin edən möhtəşəm layihələri reallaşdırmağa imkan verir. Məhz bunun nəticəsidir ki, Azərbaycan bu gün Qarabağda öz miqyasına görə heyrət doğuran bərpa-quruculuq işlərini əzmlə həyata keçirir. Ali Baş Komandanın rəhbərliyi ilə xalqımız döyüş meydanlarında göstərdiyi hünərləri bu gün tikinti meydançalarında da nümayiş etdirir. Keçmiş məcburi köçkün soydaşlarımız 30 il həsrətində olduqları ata-baba yurdlarına dönürlər.
Prezident İlham Əliyevin təşəbbüsü və iştirakı ilə dekabrın 21-də Xankəndi şəhərində baş tutan tədbirlər Azərbaycanın öz torpaqlarının əsl sahibi olduğunu, “Qarabağ Azərbaycandır!” həqiqətini bir daha bütün dünyaya çatdırdığını vurğulayan spiker təklif edib ki, doğum günü münasibəti ilə möhtərəm cənab Prezidentə Milli Məclis adından təbrik məktubu ünvanlansın.
Sonra iclasda cari məsələlərlə bağlı müzakirələr keçirilib. Çıxış edən deputatlar ölkəmizin bütün istiqamətlərdə, o cümlədən siyasi, iqtisadi, mədəni, sosial sahələrdə böyük nailiyyətlər əldə etdiyini, Prezident İlham Əliyevin məqsədyönlü fəaliyyəti nəticəsində xalqımızın sarsılmaz inamını və dəstəyini qazandığını vurğulayıblar. Deputatlar postmünaqişə dövründə dövlətimizin qarşısında duran vəzifələrin uğurla həyata keçirildiyini, Azərbaycanın qalib dövlət olmaqla yanaşı, Cənubi Qafqaz regionunun lider dövlətinə çevrildiyini bildiriblər. Bu il 20 sentyabr tarixinin lokal antiterror tədbirləri ilə suverenliyimizin və ərazi bütövlüyümüzün tam bərpası günü kimi yadda qaldığı qeyd edilib. Bununla yanaşı, bəzi qüvvələrin məkrli plan və niyyətlərinə baxmayaraq, ölkə Prezidentinin səyləri və qətiyyəti sayəsində bu gün sülh müqaviləsinin bağlanması üçün heç bir maneənin olmadığı bildirilib. İlham Əliyevin rəhbərliyi ilə Azərbaycanın gələcəkdə də yeni-yeni nailiyyətlər əldə edəcəyinə inam ifadə olunub.
Sonra S.Qafarova gündəlikdə 27 məsələnin olduğunu söyləyib. O, birinci məsələnin “Azərbaycan Respublikası Hökuməti ilə İraq Respublikası Hökuməti arasında hava əlaqəsi haqqında Saziş”in təsdiq edilməsi barədə qanun layihəsi olduğunu deyib. Spiker qeyd edib ki, beynəlxalq sənədlə bağlı olduğuna görə, qanun layihəsi “Normativ hüquqi aktlar haqqında” Konstitusiya qanununun tələbinə əsasən bir oxunuşda qəbul ediləcək. Qanun layihəsi səsə qoyularaq qəbul edilib.
Parlamentin Sədri növbəti 17 məsələnin üçüncü oxunuşda qanun layihələri olduğunu deyib. Qanun layihələri barədə birinci və ikinci oxunuşlarda irəli sürülən təklif və rəylərin nəzərə alındığı diqqətə çatdırıldıqdan sonra sənədlər səsə qoyularaq qəbul edilib.
Sonra birinci vitse-spiker, Hüquq siyasəti və dövlət quruculuğu komitəsinin sədri Əli Hüseynli“Polis haqqında”, “Yetkinlik yaşına çatmayanların baxımsızlığının və hüquq pozuntularının profilaktikası haqqında” və “Ümumi təhsil haqqında” Azərbaycan Respublikasının qanunlarında dəyişiklik edilməsi barədə qanun layihəsini (üçüncü oxunuş) təqdim edib. O, layihənin birinci və ikinci oxunuşlarda deputatlar tərəfindən dəstəkləndiyini, əlavə heç bir təklifin olmadığını deyib və səsə qoyulmasını xahiş edib.
Qanun layihəsi üçüncü oxunuşda qəbul edilib.
Sonra Hüquq siyasəti və dövlət quruculuğu komitəsinin üzvü Kamal Cəfərov “Məhkəmə ekspertizası fəaliyyəti haqqında” Azərbaycan Respublikasının Qanununda dəyişiklik edilməsi barədə (üçüncü oxunuş) qanun layihəsi ilə bağlı məlumat verib. Deputat məsələyə dair heç bir əlavə təklifin olmadığını deyib və səsə qoyulmasını xahiş edib.
Parlamentin Sədri gündəliyin növbəti iki məsələsinin ölkə Prezidentinin bir məktubu ilə parlamentə daxil olduğunu və mahiyyətcə bir-birinə yaxınlığını diqqətə çatdırıb. Əmək və sosial siyasət komitəsinin sədri Musa Quliyevin məlumatından sonra qanun layihələri səsə qoyularaq qəbul edilib.
Gündəlikdəki digər qanun layihələri də müzakirələrdən sonra qəbul edilib.
Əliqismət BƏDƏLOV
XQ