Yeni dərs ili qaçqınlıq taleyi yaşamış Mehriban ana ilə qızı Şəbnəm üçün xüsusilə sevindiricidir. Laçına dönmək arzusu, nəhayət, gerçəyə çevrildi. Özü də Şəbnəm vaxtilə nəsillikcə oxuduqları Laçın şəhər 2 nömrəli tam orta məktəbində tədris işləri üzrə direktor müavini kimi fəaliyyətə başlayıb. Övladları Dəniz və Günəş də təzə məktəbdə dərsə gediblər.

Mehriban nənə yenicə qo­vuşub məskunlaşdıqları doğ­ma evin eyvanından məktəbə baxıb kövrəlir. Bunun səbəbi var. Axı, uzun illər onun anası Şəfiqə Baxışova və həyat yol­daşı Tofiq Əhmədov məhz bu məktəbin müəlimləri olublar. Özü də, uşaqları da burada oxuyublar. Bu gün rəhmət­lik Şəfiqə və Tofiq müəllimin ruhları şaddır. Söhbət zamanı öyrənirik ki, fədakar müəllim, cəfakeş el anası olmuş Şəfiqə Baxışovanın gözəl natiqliyi, yazı üslübu olub. “Şərəf nişa­nı” ordeninə, “Qabaqcıl maarif xadimi” nişanına layiq görülüb. İndi nəvəsi Şəbnəm onun yolu­nu davam etdirir. 

İingilis dili müəllimi olan Şəbnəm Cəbrayıl bura köçənə qədər Ağcabədinin Taxtakörpü qəsəbəsindəki tam orta məktəbdə çalışıb. "Şagirdlərimin oxumaq həvəsi, gələcəyə olan inamı, vətənə, millətə olan bağlılığı məni hər zaman qürurlandırır” – deyən Şəbnəm müəllim indi doğma yurddakı 2 nömrəli şəhər tam orta məktəbində direktor müa­vinidir. Onun ürək sözləri:

– Böyük Qayıdış proqra­mına uyğun olaraq, həsrəti ilə böyüdüyüm doğma Laçına qayıtmaq əsl səadətdir. Mənim üçün Laçında yaşamaq, Laçın­da xidmət etməkdən üstün tuta biləcəyim heç bir vəzifə ola bil­məz! Elə buna görə də könüllü olaraq Taxtakörpü qəsəbə tam orta məktəbində direktorluq­dan imtina edərək Laçında, bilavasitə möhtərəm Preziden­timiz İlham Əliyevin açılışını etdiyi bu məktəbdə çalışmağı üstün tutdum. 

Şəbnəmin həyat yoldaşı Orxan Cəbrayıl bildirdi:

– Bilik Günü münasibətilə Şəbnəmi, Dənizlə Günəşi, bu məktəbdə ilk zəngin sədasına yığışan hər kəsi təbrik edirəm!

Onu da qeyd edək ki, Bilik Günü ərəfəsində Bank Res­publikanın əməkdaşları Laçın şəhərinə səfər edərək balaca­lara məktəb ləvazimatlarından ibarət çantalar hədiyyə ediblər.