Görkəmli Azərbaycan ədibi, Xalq yazıçısı Anar Rzayevin anadan olmasının 85-ci ildönümü münasibətilə Türkiyənin paytaxtı Ankarada Beynəlxalq Türk Mədəniyyət Təşkilatı – TÜRKSOY, Azərbaycan Respublikasının Ankaradakı Səfirliyi, Azərbaycan Yazıçılar Birliyi və Türk Ədəbiyyatı Vəqfinin birgə təşkilatçılığı ilə yubiley mərasimi keçirildi.
TÜRKSOY-un baş katibi Sultan Raev çağdaş türk ədəbiyyatının ən tanınmış yazarlarından biri olan Azərbaycan Yazıçılar Birliyinin sədri Anarı anadan olmasının 85-ci ildönümü münasibətilə təbrik edərək onun ortaq türk mədəni irsinə töhfəsini vurğuladı: “Türk cümhuriyyətlərində fikir və sənət sahəsində yetişmiş çağdaş yazıçı və şairlər müxtəlif mövzulu əsərlərində keçmişimizi və indimizi ustalıqla işləmiş, ortaq mədəni gələcəyimizin üfüqünə ümid işarələri vermişlər. Onlardan biri də Azərbaycan türklərinin ideya və sənət sahəsində layiqli nüfuz qazanmış müdrik ağsaqqalı Anardır. Onun əsərləri qardaş türk xalqlarının dillərinə və bir çox başqa dillərə tərcümə edilərək türk mədəniyyətinin zəngin ədəbiyyatına töhfələr verib”.
Sultan Raev Anara 85 illik yubileyi münasibətilə TÜRKSOY-un 30 illik yubiley medalını təqdim etdi.
Türk Ədəbiyyatı Vəqfi İdarə Heyətinin sədri Serhat Kabakçı bildirdi ki, Anarın anadan olmasının 85 illiyi münasibətilə təşkil etdilən bu tədbir türk mədəniyyətinin mühüm dəyərlərini qoruması deməkdir. Ölkəmizin Ankaradakı səfirliyinin müşaviri Eldar Əliyev Xalq yazıçısı Anarın Azərbaycan ədəbiyyatının inkişafında xidmətlərindən, türk dünyasının ədəbi-mədəni birliyinin möhkəmlənməsinə göstərdiyi köməkdən söhbət açdı.
TÜRKSOY çevrəsində yubileyinin təşkilinə görə minnətdarlığını bildirən Anar dedi: “Bu təşkilatın qurulmasına az da olsa töhfə verdiyimi xatırlamaq mənim üçün xoşdur. Türk birliyinin dünya gücünə çevrilməsində onun rolu və təsiri artır. Yaradıcılığıma və təşkilati fəaliyyətimə verilən yüksək qiymət isə məmnunluqla yanaşı, məni ümumtürk birliyinə xidmətlərimi artırmağada ruhlandırır”.
Mərasimdə yubiliyarın “Çağın önündə bir yazıçı: Anar” və “İki əsrin qovşağında: Anar” kitablarının təntənəli təqdimatı oldu. Azərbaycan Yazıçılar Birliyinin sədr müavini Rəşad Məcid, yazıçılar İmdat Avşar, Pərvin Nurəliyeva və Günel Anarqızı təqdim edilən nəşrlər barədə mülahizələrini söylədilər, yazıçıya möhkəm cansağlığı və yeni yaradıcılıq uğurları arzuladılar.
Yubiley təntənəsinin bədii hissəsi solistlər Aynaz Rəhimzadə, Elçin Hətəmli (tar) və Areş Nəzəri (nağara) triosunun Anar Rzayevin anası Nigar Rəfibəyli və atası Rəsul Rzanın şeirlərinə bəstələnmiş və Azərbaycanın türk dünyasında məşhur olan mahnılarından ibarət konsertlə davam etdi.
Xalq yazıçısı Anar qəzetimiz üçün kiçik müsahibəsində bildirdi:
–Yubileyimin TÜRKSOY kimi nüfuzlu bir qurumun iqamətgahında keçirilməsi mənim üçün çox önəmlidir. Bu təşkilat yaranmazdan əvvəl çıxışlarımdan birində vurğulamışdım ki, o, türk dövlətləri arasında UNESCO kimi fəaliyyət göstərən, türk xalqlarının mədəniyyətinə, incəsənətinə önəm verən bir qurum olmalıdır. Bir müddət sonra TÜRKSOY yarananda onun ilk baş direktoru mənim də çox yaxın dostum olan məşhur azərbaycanlı sənətçi Polad Bülbüloğlu, ikinci baş katibi isə çox yaxın dostum, qazax musiqiçisi Düsen Kaseinov oldu. Təşkilatın hazırkı baş direktoru da yaxın dostum, Qırğızıstanın Xalq yazıçısı Sultan Raevdir. Mən musiqiçilərə qarşı deyiləm, amma TÜRKSOY-un bir yazıçı tərəfindən idarə olunması məni çox sevindirir.
Qırğızıstana da məni dərin sevgi bağlayır. Stalin repressiyaları zamanı qohumlarım Azərbaycanı tərk etmək məcburiyyətində qalanda, onların bir qismi könüllü olaraq yaşamaq üçün Türkiyəyə gəlib, digər hissəsi isə Qırğızıstana sürgün edilib. Mənin Qırğızıstan və qırğız xalqı ilə xüsusi yaxınlığım isə dünya şöhrətli qırğız yazıçısı Cingiz Aytmatov və hazırda TÜRKSOY-un baş katibi olan Sultan Raev kimi çox önəmli yazıçı dostlarla bağlıdır. Çingiz Aytmatovla dostluq əlaqələrim unudulmazdır. Həmişə bir-birimizə kitab hədiyyə edəndə Aytmatov kitabını mənə “Kiçik qardaşım Anara”, mən isə “Böyük qardaşım Cingizə” deyə imzalayardıq”.
Mehparə SULTANOVA
Ankara