Milli Məclisin Sədri Sahibə Qafarova Polşa Respublikasına rəsmi səfəri çərçivəsində Varşava Universitetində “Dialoq və həmrəylik: Azərbaycanın əməkdaşlıq və inkişafa baxışı” mövzusunda məruzə ilə çıxış edib.

Parlamentin Mətbuat və ictimaiyyətlə əlaqələr şöbəsindən redaksiyamıza bildi­rilib ki, S. Qafarova əvvəlcə Azərbaycan xalqının qədim tarixi və zəngin ənənələri haqqında məlumat verib. Milli dövlətçiliyi­nin 5 min illik tarixi olduğunu qeyd edən Sədr Azərbaycan ərazisində mövcud ol­muş çoxsaylı dövlətlər, 1918-ci il mayın 28-də müsəlman Şərqində elan edilmiş ilk demokratik parlament respublikası – Xalq Cümhuriyyəti, onun həyata keçirdi­yi milli tədbirlər barədə danışıb. 1991-ci ildə müstəqilliyin bərpası ilə tariximizdə yeni bir dövrün başlandığını vurğulayan parlament Sədri müstəqillik illərində ölkə­mizin əldə etdiyi möhtəşəm nailiyyətləri auditoriyanın diqqətinə çatdırıb.

Milli Məclisin Sədri daha sonra bildi­rib ki, 30 ildən artıqdır ki, BMT-nin üzvü kimi Azərbaycan beynəlxalq hüququn norma və prinsiplərini beynəlxalq arena­da yeganə davranış qaydaları kimi qəbul edərək, qarşılıqlı etimad və maraqlar əsasında çoxvektorlu əməkdaşlığa və bərabərhüquqlu tərəfdaşlığa önəm verir, dünyada dialoq və həmrəyliyə dəstək göstərir. Ölkəmiz 155 üzv dövlətin dəstə­yi ilə 2012-2013-cü illər üçün BMT Təh­lükəsizlik Şurasının qeyri-daimi üzvü seçilib. Azərbaycan BMT ilə yanaşı, Qo­şulmama Hərəkatı, Avropada Təhlükə­sizlik və Əməkdaşlıq Təşkilatı, Avropa Şurası, İslam Əməkdaşlıq Təşkilatı, Türk Dövlətləri Təşkilatı, Qara Dəniz İqtisadi Əməkdaşlıq Təşkilatı və digər beynəlxalq və regional qurumların da üzvüdür. 

Paramentin Sədri Azərbaycanın Av­ropanın enrji təhlükəsizliyinə töhfəsindən, 30 il Ermənistanın işğalı altında olan 20 faiz ərazisini öz gücü ilə azad etmə­sindən, Qarabağ və Şərqi Zəngəzurda törədilmiş kütləvi erməni vandallığın­dan söhbət açıb. O, Ermənistanın son hərbi-siyasi təxribatları barədə məlumat verib, işğaldan azad edilmiş torpaqlarda həyata keçirilən quruculuq işlərindən də danışıb. 

Sonda Azərbaycan Milli Məclisinin Sədri Sahibə Qafarovaya Varşava Uni­versitetinin Fəxri diplomu və medalı təq­dim edilib. 

Əliqismət BƏDƏLOV, “Xalq qəzeti”