Dünən NATO-nun Brüsseldəki mənzil-qərargahında Rusiyanın Avropada ən böyük quru sərhədləri olan dövlətlərdən biri Finlandiya Respublikası təntənəli surətdə quruma üzv qəbul olunub. Bu barədə BBC müxbirləri məlumat yayıb.
Xəbərdə deyilir ki, əvvəlcə Finlandiyanın xarici işlər naziri Pekka Haavisto ölkəsinin alyansa qəbul ərizəsini və digər tələb olunan sənədləri ABŞ-ın Dövlət katibi Entoni Blinkenə təqdim edib.
Şimali Atlantika Alyansına (NATO) üzv ölkələrin xarici işlər nazirlərinin iştirakı ilə keçən tədbirə Finlandiya Prezidenti Sauli Niinisto da qatılıb. NATO-nun Baş katibi Yens Stoltenberq ali qonağı, eləcə də bütün tədbir iştirakçılarını salamlayıb.
Alyansın baş katibinin sözlərinə görə, “Finlandiyanın üzvlüyə qəbulu bu ölkəni daha güvənli və güclü edəcək”. Finlandiya Prezidenti, öz növbəsində, onun dövlətinə və xalqına göstərilən etimada görə təşəkkür edib və ölkəsinin nümunəvi NATO üzvü olacağına əminlik ifadə edib.
ABŞ-ın NATO-dakı nümayəndəsi Julian Smit deyib ki, “bu gün, həqiqətən çox əlamətdar bir gündür. Belə ki, Finlandiya Qərb dövlətləri və xalqları ilə ümumi dəyərləri paylaşan kifayət qədər güclü, nüfuzlu bir dövlətdir”. Xanım siyasətçi, həmçinin bildirib ki. gələn ilin iyulunda NATO-nun Litvada keçiriləcək sammitində İsveçin də alyansa üzv qəbul olunacağına böyük ümidlər bəsləyir.
Dünən Brüsseldə jurnalistlər qarşısında çıxış edən ABŞ-ın Dövlət katibi Entoni Blinken qeyd edib ki, baş verənlərə görə, bəlkə də yeganə haldır ki, ruslara, hətta bir “təşəkkür” düşür. Ona görə ki, onlar sanki Rusiyanın təcavüzü səbəbindən bunun baş verəcəyini əvvəlcədən görürdülər.
Xatırladaq ki, Finlandiyanın şərqdə Rusiya ilə 1340 kilometr (832 mil) uzunluğunda sərhədi var. Rəsmi Helsinki ötən ilin mayında, yəni Rusiyanın Ukraynaya təcavüzündən cəmi üç ay sonra İsveç ilə birlikdə NATO-ya daxil olmaq planını açıqlayıb.
Qeyd edək ki, alyansın Nizamnaməsinin 5-ci maddəsinə görə, qurumun hər hansı bir üzvünə hücum bütün alyansa təcavüz kimi dəyərləndirilir. Finlandiya sakinləri Rusiyanın militarist siyasətindən narahat olaraq NATO-ya üzv olmaq qərarına gəldilər. Belə ki, əhalinin 80 faizi Suomi (finlər öz vətənlərini belə adlandırır) ölkəsinin NATO-ya üzv olmasını dəstəkləyib.
Lakin İsveçin üzvlüyə qəbulu Türkiyə tərəfindən bloklanıb. Ankara hesab edir ki, Stokholm ölkə ərazisində kürd terrorçularına və tərəfdarlarına qeyri-qanuni surətdə sığınacaq verərək onları himayə edir.
Qeyd edək ki, Macarıstan da hələlik İsveçə bu məsələdə razılıq verməyib. Budapeşti İsveç rəsmilərinin Macarıstan hökumətinin başçısı Viktor Orbanı tez-tez avtoritar idarəçilikdə günahlandırması narazı salır.
Beləliklə, Finlandiya NATO-nun sayca 31-ci üzvüdür. Helsinki buna çox qısa müddətdə, cəmi on aya nail oldu. Bununla da, Rusiyanın NATO-ya üzv dövlətlər ilə birbaşa sərhədləri birdən-birə iki dəfə artıb.
Yeri gəlmişkən, dünən NATO-nun yaranmasının 74 illiyi tamam olub. Xatırladaq ki, alyans 1949-cu ildə “soyuq müharibə”nin ən qızğın dövründə sovet təhlükəsindən müdafiə məqsədilə təşkil olunub. O vaxtdan genişlənərək dünyanın ən böyük hərbi blokuna çevrilib.
Qeyd etmək lazımdır ki, Finlandiyanın NATO-ya üzv olması qurumun şərqə doğru genişlənməsinə kəskin etiraz edən rəsmi Moskva üçün heç də arzuolunan hadisə deyil. Prezident Vladimir Putin 2021-ci ilin fevralında Rusiya ordusunun Ukraynaya hücumundan əvvəl Qərb dövlətlərinə bu barədə dəfələrlə xəbərdarlıq edib, bu “səhv” addımdan çəkindirməyə çağırıb.
Bu günlərdə Kremlin mətbuat katibi Dmitri Peskov bildirib ki, Moskva Brüsseldə baş verənləri diqqətlə izləyir və NATO-nun şərqə doğru genişlənməsini öz milli maraqları üçün təhdid hesab edir.
İki gün əvvəl Rusiyanın xarici işlər nazirinin müavini Aleksandr Qruşko xəbərdarlıq etmişdi ki, NATO Finlandiyada yeni hərbi resurslar yerləşdirərsə, o zaman Rusiya özünün milli təhlükəsizliyini təmin etmək üçün “əlavə addımlar” atacaq. Bu ölkənin Belarusdakı səfiri Boris Qrızlov isə bildirib ki, Rusiya Belarusun qərbində taktiki nüvə raketləri yerləşdirmək niyyətindədir.
BBC şərhçisi qeyd edib ki, bu xəbər NATO üzvü olan Polşada və digər Şərqi Avropa dövlətlərində ciddi narahatlıq doğurub. Bununla bağlı NATO-nun Baş katibi Yens Stoltenberq deyib ki, hələlik Rusiya ərazisində nüvə silahlarının yerdəyişməsi müşahidə olunmayıb.
Brüsseldə NATO-ya üzv ölkələrin xarici işlər nazirləri ukraynalı həmkarları Dmitri Kuleba ilə görüşərək Kiyevi uzun müddət ərzində də müdafiə etməyə hazır olduqlarını bildiriblər. Macarıstanın etiraz etməsinə rəğmən, NATO-Ukrayna birgə komissiyasının iclası keçirilib və orada bir daha Ukraynaya dəstək ifadə olunub.
Sonda xatırladaq ki, 5,6 milyon əhalisi olan Finlandiya ərazisinə (338,4 min kvadratkilometr) görə Avropanın ən böyük ölkələrindən biridir. Burada təxminən, 179 minə yaxın böyük-kiçik ada, bir o qədər göl var. Finlandiya 1995-ci ildən Avropa İttifaqının üzvüdür, dörd il sonra isə avrozonaya qoşulub.
Maraqlı cəhətlərdən biri də odur ki, Finlandiyada təqribən 200 qəzet, 320 jurnal nəşr olunur. Finlər dünyada yaponlarla bərabər, ən çox qəzet oxuyan ölkədir.
Məsaim ABDULLAYEV,
“Xalq qəzeti”