Azərbaycanın milli brendi “ASAN xidmət” qısa zaman ərzində beynəlxalq səviyyədə nüfuz qazanıb. Artıq bir sıra ölkələr ASAN-ın təcrübəsindən yararlanmağa başlayıblar. Vətəndaş məmnunluğunun təmin olunmasına yönəlmiş bu xidmət növünün beynəlxalq miqyasda genişlənməsi və tətbiqinə başlanılması, əlbəttə ki, Azərbaycanın böyük uğurudur. BMT-də Azərbaycanın təşkilatçılığı ilə plenar sessiyanın keçirilməsi və tədbir çərçivəsində ASAN-ın fəaliyyəti barədə məlumatların verilməsi, müzakirələrin aparılması isə ölkəmizin sosial innovasiyalar sahəsində böyük uğurunun beynəlxalq səviyyədə tanınmasıdır. 

Müasir dünyada idarəetmə sistemlə­rinin müasirləşirdirilməsi getdikcə daha çox yeni modellər tələb edir. Prezident İlham Əliyevin idarəetmənin təkmilləşdi­rilməsi istiqamətində həyata keçirdiyi ar­dıcıl islahatlar bu problemə yeni yanaş­maların yaradılmasına yönəlib. Heç kimə sirr deyil ki, müasir idarəetmə modelinin prinsiplərindən biri də şəffaflıqdır. Məhz dövlət orqanlarının fəaliyyətində şəf­faflığın, onların işinin səmərəliliyinin və çevikliyinin təmin edilməsi, innovativ tex­nologiyaların tətbiqi ilə keyfiyyətin yük­səldilməsi, korrupsiyanın qarşısının alın­ması məqsədilə 2012-ci il iyulun 13-də və sentyabrın 5-də müvafiq sərəncam­lar imzalanıb. Bu sərəncamlara əsasən, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və “ASAN xidmət” təsis edilib. Qısa müddət ərzində yeni yaradılmış effektiv, müasir idarəetmə modeli beynəlxalq ictimaiyyə­tin də diqqətini çəkir. BMT-də Azərbayca­nın təşkilatçılığı ilə ASAN-ın fəaliyyətinə həsr olunan plenar sessiyasının keçiril­məsi də bunun əyani sübutdur.

Ümumiyyətlə, “ASAN xidmət” ilk dəfə deyil ki, BMT miqyasında diqqət mərkə­zinə düşür. Hələ 2015-ci ildə Kolumbiya­nın Medellin şəhərində “ASAN xidmət” “Dövlət xidmətlərinin göstərilməsinin təkmilləşdirilməsi” kateqoriyasında1-ci yerə layiq görülərək xüsusi mükafat və diplomla təltif olunub. Forum çərçivəsin­də keçirilən sərgidə ən çox “ASAN xid­mət” iştirakçıların marağına səbəb olub və bu model təşkilatçılar tərəfindən döv­lət xidmətlərinin göstərilməsi baxımın­dan unikallığına görə xüsusi qeyd edilib. 2019-cu ildə isə Azərbaycanın BMT ya­nında daimi nümayəndəsi Yaşar Əliyevin qurumun Baş katibi Antonio Quterreşə “ASAN xidmət”in fəaliyyətinə dair ünvan­ladığı məktub Baş Assambleyanın sənə­di kimi yayılıb. Həmin məktub Dayanıqlı İnkişaf üçün İnformasiya və Kommuni­kasiya Texnologiyaları: Cənub ̶ Cənub Əməkdaşlığı, sosial inkişaf mövzuları üzrə BMT Baş Assambleyası Gündəliyi­nin bəndləri əsasında dərc olunub. 

Qeyd etmək zəruridir ki, Dayanıq­lı İnkişaf üçün 2030 Gündəliyi və bü­tün Dayanıqlı İnkişaf Məqsədlərinə nail olunması əhəmiyyətli rola malikdir. Ha­zırda “ASAN” İndoneziya, Monteneqro, Mərakeş, Uqanda, Özbəkistan və digər ölkələrdə fəaliyyət göstərən oxşar bey­nəlxalq agentlik və qurumlarla fəal əmək­daşlıq edir. 

BMT-də “ASAN xidmət”in fəaliyyətinə həsr olunan növbəti tədbir də Nyu-York­da keçiriləcək. “Report”un ABŞ bürosu xəbər verir ki, “ASAN xidmət”in sədri Ülvi Mehdiyev BMT-nin Nyu-Yorkdakı Baş Qərargahında keçiriləcək İqtisadi və Sosial Şuranın (ECOSOC) Dövlət İdarə­çiliyi üzrə Ekspertlər Komitəsinin 22-ci sessiyasında iştirak edəcək. Sessiya çərçivəsində Ü.Mehdiyevin “Dayanıqlı İn­kişaf Məqsədlərinə nail olmaq və davamlı inkişaf üçün BMT-nin səmərəli idarəçilik prinsiplərinin tətbiqi” mövzusunda çıxışı nəzərdə tutulub. 

Tədbir çərçivəsində, həmçinin Dövlət Agentliyi və BMT-nin İqtisadi və Sosial Məsələlər üzrə Departamentinin birgə təşkilatçılığı ilə “İnsanyönümlü dizayn və birgə idarəetmə vasitəsilə dövlət xidmət­lərinin göstərilməsinin transformasiyası” mövzusunda plenar sessiyası keçirilə­cək. Ölkəmizin ev sahibliyi edəcəyi ple­nar sessiyada Azərbaycan Prezidentinin təşəbbüsü ilə yaradılmış “ASAN xidmət”, eləcə də “ASAN xidmət indeksi” və Döv­lət Agentliyinin digər fəaliyyət istiqamət­ləri ilə üzv ölkələrin təmsilçilərinə məlu­mat veriləcək, beynəlxalq ekspertlərin iştirakı ilə mövzu ətrafında müzakirələr aparılacaq.

“Xalq qəzeti”