Azərbaycan Respublikasının Prezidenti İlham Əliyevin təsdiqlədiyi regionların sosial-iqtisadi inkişafı Dövlət Proqramına uyğun olaraq Ağstafa rayonunun sərhədyanı bölgəsində yerləşən 3 kəndinin içməli su təchizatı yaxşılaşdırılır.
Dövlət investisiyası hesabına həyata keçirilən layihə rayonun Köhnəqışlaq, Tatlı və Yaradullu kəndlərini əhatə edir. Bu kəndlərdə indiyə qədər mərkəzləşdirilmiş içməli su təchizatı sistemləri mövcud olmayıb. Köhnəqışlaq kəndində bulaqlardan, Tatlı və Yaradullu kəndlərində isə suvarma üçün nəzərdə tutulan subartezian quyularından istifadə edilib. Əhali içməli suya olan tələbatını uzaq məsafədən daşımaqla ödəyib.
Təsdiqlənmiş layihəyə uyğun olaraq Tatlı və Yaradullu kəndlərinin su təchizatı yeni qazılacaq subartezian quyuları vasitəsilə həyata keçiriləcək. Köhnəqışlaq kəndinə isə içməli su mövcud bulaqdan veriləcək. Layihə çərçivəsində nasos stansiyaları və su anbarlarının, eləcə də əhalinin ümumi istifadəsi üçün bulaqların inşası nəzərdə tutulub. Artıq 5,9 kilometr magistral və 38 kilometr şəbəkə su xətlərinin tikintisi yekunlaşmaq üzrədir. Nasos stansiyalarının və anbarların tikintisi isə davam etdirilir. Ağstafa rayonunun 3 kəndində əhalinin ümumi istifadəsi üçün 256 ədəd bulaq quraşdırılacaq.
Tikinti–quraşdırma işlərinin 2023-cü ilin yay aylarında başa çatdırılması nəzərdə tutulur. Layihənin icrası Ağstafa rayonunun adıçəkilən kəndlərində 4 minədək sakinin içməli su təminatının yaxşılaşdırılmasına imkan yaradacaq.
“Xalq qəzeti”