Avropa İttifaqının (Aİ) beynəlxalq tərəfdaşlıq üzrə komissarı Yozef Sikela Qazaxıstan mediasına müsahibəsində bildirib ki, nəqliyyat məsələləri Aİ ilə yanaşı, Qazaxıstan və bütün regionun maraqları baxımından prioritetdir. Çünki ticarət və bazarlara çıxış inkişafın, eləcə də əhaliyə daha yaxşı şərait yaradılmasının açarıdır.
Onun sözlərinə görə, nəqliyyat sahəsində əsas məqsədlərdən biri Orta Dəhliz ilə Asiyadan Avropaya yüklərin daşınması müddətini 15 günə endirməkdir ki, bu da regionun iqtisadi-ticari inkişafı üçün mühüm amilə çevriləcək.
Sikela əlavə edib: “Bu, həm də texnologiya sahəsində təcrübə mübadiləsinə və yüksək keyfiyyətli iş yerlərinin yaradılmasına gətirib çıxaracaq. Biz artıq nəqliyyat infrastrukturunu dəstəkləmək üçün Avropa İnvestisiya Bankı ilə 200 milyon avroluq kredit sazişi imzalamışıq”.
Həm də Trans-Xəzər Beynəlxalq Nəqliyyat Marşrutu kimi tanınan Orta Dəhliz Qazaxıstan, Xəzər dənizi, Azərbaycan, Gürcüstan və Türkiyə vasitəsi ilə Çin və Avropa ölkələrini birləşdirir.
