Energetika Nazirliyinin məlumatına görə, Bakıda Cənub Qaz Dəhlizi və Yaşıl Enerji Məşvərət şuraları çərçivəsində Azərbaycan Respublikası Hökuməti və “Enerso Cəbrayıl” və “Clean Energy Jabrayil” məhdud məsuliyyətli cəmiyyətləri arasında respublikamızda hər biri 50 MVt gücündə iki Günəş Elektrik Stansiyası layihəsi ilə bağlı investisiya müqavilələri imzalanıb.
Energetika Nazirliyi və “Nobel Energy Limited” şirkəti arasında Naxçıvan şəhərində 30 MVt gücündə Günəş Elektrik Stansiyasının qiymətləndirilməsi, inkişafı və həyata keçirilməsi ilə bağlı icra müqaviləsini isə energetika nazirinin müavini Elnur Soltanov və “Nobel Energy Limited” şirkətinin baş direktoru Vüqar Səmədli imzalanıblar.
“Yaşıl enerji zona”larının inkişafı baxımından mühüm önəm daşıyan layihələrin reallaşması nəticəsində, ümumilikdə, illik 268 milyon kVt-saat elektrik enerjisi istehsalı gözlənilir ki, bu da 59 milyon kubmetr qaza qənaət edilməsinə və 128 min ton karbon emissiyasının azaldılmasına imkan yaradacaq.
