“GL Group” neft kompaniyası Azərbaycanda ilk dəfə olaraq quruda üfüqi quyunun qazılmasını nəzərdə tutan özəl qazma proqramının icrasına start verib. Qrupun üzvü olan Salyan Oil Limited-in “Kürsəngi” və “Qarabağlı” yataqlarının dərin qatlarında həyata keçirdiyi bu proqrama 4 min metrlik vertikal quyunun, 5 min metrlik dərin vertikal quyunun və horizontal hissəsi ən azı 400 metr olacaq 4 min 400 metrlik horizontal quyunun qazılması daxildir.
Qazma proqramı “Kürsəngi” və “Qarabağlı” yataqlarında 14 il əvvəl dayandırılmış qazma işlərini yenidən bərpa etməklə yanaşı, həm də müasir innovativ texnologiyalardan yararlanaraq hasilatı artırmaq üçün strateji fürsətdir. Bu məqsədlərə çatmaq üçün “GL Group” tanınmış beynəlxalq və yerli sənaye ekspertlərini proqrama cəlb edərək, eyni zamanda, lokal və qlobal podratçı təşkilatlarla strateji əməkdaşlığa başlayıb. Bu, dünyanın ən qabaqcıl təcrübələrinin proqramın hər bir mərhələsində tətbiqinə, məhsuldarlığın yüksəldilməsinə, əməliyyatların səmərəliliyinin artırılmasına və mümkün risklərin azaldılmasına imkan verəcəkdir.
Xatırladaq ki, “GL Group” kompaniyası Azərbaycanın Salyan rayonunda “Kürsəngi” və “Qarabağlı”, Abşeron yarımadasında “Buzovna-Maştağa”, “Qala” və “Zirə” də daxil olmaqla beş neft və qaz yatağında əməliyyatlar aparır. Şirkətlər qrupunun portfelinə “Salyan Oil Limited” və “Taghiyev Operating Company” əməliyyat şirkətləri, həmçinin neft-qaz sənayesində texniki xidmətlər göstərən “GL Technical Services” şirkəti daxildir. “GL Group” 2024-cü ildə ilk beynəlxalq layihəsinə imza ataraq Türkiyənin Trakya hövzəsində yüksək perspektivli qaz yatağında 100 faiz pay sahibi olan Kanadanın “Gazelle Energy Limited” şirkətinin 25 faiz payını satın alıb.
