Özbəkistanın “Tukımachı Sanoat Tekstıl” MMC Azərbaycanda təsis etdiyi “TST Textile Group” şirkəti Azərbaycanda pambıqçılıq klasteri layihəsinin icrasına başlayıb. Bu məqsədlə şirkətə İmişli rayonunda 5 min hektar torpaq sahəsi ayrılıb. Müasir pambıqçılıq təsərrüfatı, pambıq emalı, iplik, toxuculuq, tikiş və yağ istehsalı müəssisələrinin daxil olduğu pambıqçılıq klasterinin yaradılması layihəsinin ilkin investisiya həcmi, təxminən, 90 milyon manatdır.
Bununla yanaşı, Füzulidə 100 hektar ərazidə “Özbəkistan–Azərbaycan Dostluq Bağları” layihəsi icra ediləcək. Özbəkistan tərəfindən “Uzgreenagro” LLC (MMC) və Azərbaycan “Zəfər Bağları” MMC-nin birgə təsis etməyi planlaşdırdığı “Özbəkistan–Azərbaycan Dostluq Bağları” MMC tərəfindən həyata keçiriləcək. Layihəyə 5 milyon manatadək vəsaitin investisiya olunması nəzərdə tutulur. Bu vəsaitin 50 faizini Özbəkistan, 50 faizini isə Azərbaycan yatıracaq.
Bağda müxtəlif növ meyvə ağacları, o cümlədən Özbəkistandan gətirilmə tinglərin əkilməsi nəzərdə tutulur. Layihənin növbəti mərhələsində bağların genişləndirilməsi və məhsulların dərin emalının qurulması planlaşdırılır. Həmçinin gələcəkdə istehsalatın genişlənməsi çərçivəsində digər yeni fəaliyyət sahələri də yaradıla bilər. Bağçılıq fəaliyyəti nəticəsində əldə olunan məhsulların ilkin olaraq Azərbaycan və Özbəkistan bazarına çıxarılması, daha sonra digər bazarlara birgə ixracı planlaşdırılır.
