“Azərişıq” Açıq Səhmdar Cəmiyyəti investisiya layihəsi çərçivəsində regionların elektrik şəbəkələrində yenidənqurma və əsaslı təmir işlərini davam etdirir.
QurumunTədbirlər Planına uyğun olaraq hazırda Şirvan şəhərində 35 kilovoltluq 754.1, 754.2 və 756 saylı hava xətlərinin keçdiyi ərazidə əsaslı təmir-bərpa və yenidənqurma işləri həyata keçirilir. Artıq 35 kilovoltluq hava xətlərinin keçdiyi ərazidə dəmir dayaqlar basdırılıb və müasir tipli, izolyasiyalı kabel xətləri çəkilib. İş prosesi zamanı təhlükəsizlik tədbirləri nəzərə alınaraq xətlər və dayaqlar əhalinin sıx məskunlaşdığı ərazilərdən çıxarılaraq daha əlverişli yerlərdən çəkilir.
Xatırladaq ki, Şirvan şəhərinin və Hacıqabul rayonunun əksər hissələrindən keçən elektrik xətləri ötən əsrin ortalarında çəkilib. 60–70 il istismar edildiyi üçün bu xətlərin əsaslı yenidənqurmaya ehtiyacı var idi. Müasir elektrik şəbəkəsinin qurulduğu ərazilərdə sakinlər dayanıqlı və fasiləsiz elektrik enerjisi ilə təmin olunurlar. Şirvan Regional Enerji Təchizatı və Satış İdarəsinin əhatə etdiyi şəhər və rayonlarda yenidənqurma işləri getdikcə intensiv xarakter alır.
“Azərişıq” ASC-nin investisiya proqramına uyğun olaraq ölkənin bütün regionlarında bir sıra kənd və qəsəbələrin elektrik şəbəkəsi də yenilənir. Məqsəd abonentlərin dayanıqlı və fasiləsiz elektrik enerjisi ilə təmin olunması ilə yanaşı, həm də elektrik enerjisi itkilərini minimuma endirməkdir.
XQ