Bu gün Bakıda Cənub Qaz Dəhlizi Məşvərət Şurası çərçivəsində nazirlərin 10-cu iclası və Yaşıl Enerji Məşvərət Şurası çərçivəsində nazirlərin 2-ci iclası keçiriləcək.
Energetika Nazirliyinin məlumatına görə, toplantıya Azərbaycan və Avropa İttifaqı daxil olmaqla 23 ölkə, 6 beynəlxalq təşkilat, 44 şirkət qatılacaq. Tədbirdə nazirlər, nazir müavinləri və digər yüksək səviyyəli nümayəndələr iştirak edəcəklər.
Toplantı açılış sessiyasından sonra “Cənub Qaz Dəhlizi və Yaşıl enerji üzrə Nazirlər sessiyası”, “Cənub Qaz Dəhlizi sessiyası: Gələcəğə baxış” və “COP 29 fonunda yaşıl enerji sessiyası: Bərpa olunan enerjinin imkanlarından istifadə” üzrə plenar sessiyalarla davam edəcək. Həmçinin Məşvərət Şurası çərçivəsində “Azərbaycan Respublikası, Gürcüstan, Rumıniya və Macarıstan Hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında Saziş”in icrası məqsədilə nazirlərin 6-cı iclası və “Dənizdə külək enerjisindən istifadənin inkişafı” üzrə Azərbaycan–Avropa İttifaqı dəyirmi masası keçiriləcək.Tədbir çərçivəsində, həmçinin “yaşıl enerji” sahəsində sənədlərin imzalanması nəzərdə tutulur.
İclasın sonunda Cənub Qaz Dəhlizi Məşvərət Şurası çərçivəsində nazirlərin 10-cu iclası və Yaşıl Enerji Məşvərət Şurası çərçivəsində nazirlərin 2-ci iclasının yekunlarına dair mətbuat konfransı keçiriləcək.
Xatırladaq ki, Cənub Qaz Dəhlizi Məşvərət Şurası çərçivəsində nazirlərin ilk toplantısı 2015-ci il fevralın 12-də keçirilib. Bu il isə enerji sahəsində önəmli platforma sayılan tədbirin 10 yaşı tamam olur. Artıq ənənəvi xarakter almış Cənub Qaz Dəhlizi Məşvərət Şurasının ötən iclasları müzakirə olunan məsələlər, aparılan diskussiyalar baxımından xeyli maraqlı və yaddaqalan olub. Elə iştirakçıların say tərkibinin ildən-ilə genişlənməsi, tədbirə bir sıra yeni ölkələrin dövlət və hökumət nümayəndələrinin qatılması da tədbirə olan beynəlxalq maraqdan irəli gəlir.
Cənub Qaz Dəhlizi Məşvərət Şurası çərçivəsində nazirlərin iclasının keçirilməsi, eləcə də Yaşıl Enerji Məşvərət Şurası çərçivəsində nazirlərin 2-ci iclasının baş tutması Azərbaycanın Avropanın enerji təminatında getdikcə artmaqda olan rolununun bariz nümunəsidir. İqtisadiyyatını getdikcə şaxələndirərək inkişaf etdirən Azərbaycan Avropanın enerji təhlükəsizliyini təkcə neft-qaz potensialı ilə də deyil, həm də alternativ enerji mənbələri hesabına təmin etməsi işində əhəmiyyətli addım atıb.
Bu baxımdan Cənub Qaz Dəhlizi Məşvərət Şurası çərçivəsində nazirlərin 10-cu toplantısından gözləntilər daha çoxdur. Bir sıra ölkələrin nazirlərinin, beynəlxalq enerji şirkətlərinin nümayəndələrinin və digər qonaqların iştirakı ilə keçiriləcək budəfəki iclasda Avropa bazarına daha çox qaz nəql edilməsi ilə bağlı imkanların nəzərdən keçiriləcəyini, bununla bağlı geniş fikir mübadiləsinin aparılacağını təxmin etmək olar.
İlham ŞABAN,
Neft Araşdırmaları Mərkəzinin rəhbəri
Cənub Qaz Dəhlizi Məşvərət Şurası çərçivəsində nazirlərin 10-cu toplantısı və Yaşıl Enerji Məşvərət Şurası çərçivəsində nazirlərin 2-ci iclasına maraq olduqca yüksəkdir. Əvvəlki illərdə olduğu kimi, bu dəfə də iştirakçıların sayında artım var. Builki tədbirdə dövlətlərdən fərqli olaraq şirkətlərin sayında daha çox artım müşahidə olunur.
Bu baxımdan Almaniya şirkətlərinin Bakı toplantısına olan yüksək marağı diqqət çəkir. Belə ki, bu ölkəni təmsil edən şirkətlərin nümayəndələrindən ibarət böyük bir qrup neçə gündür ki, Azərbaycandadır. Alman qonaqlarla Azərbaycanın İqsadiyyat və Energetika nazirliklərində bir sıra görüşlər keçirilib. Eyni zamanda, fevralın 28-də Prezident İlham Əliyev onların bir qismini qəbul edib. Bütün bu görüşlərdə enerji təhlükəsizliyi məsələsi, neft bumunun artdığı bir şəraitdə “yaşıl enerji” komponentlərindən istifadə ilə bağlı söhbətlərin aparılması diqqət çəkir. Fikir mübadiləsi zamanı emissiyaların azaldılması üçün Azərbaycanın sənaye obyektlərində alman texnologiyalarının quraşdırılması sahəsində birgə əməkdaşlıq məsələlərinin önə çəkilməsinə xüsusi diqqət ayrılıb. Eyni zamanda, ölkəmizdə istehsal olunacaq “yaşıl enerji”nin ixracını nəzərdə tutan infrastrukturun yaradılması ilə bağlı işlər də danışıqların əsas mövzularından olub. Söhbət bu ilin dekabr ayında müfəssəl texniki-iqtisadi əsaslandırma layihəsinin hazırlanacağı Qara dəniz sualtı kabel xəttindən gedir. Düşünürəm ki, Azərbaycanın “yaşıl” sərvətini Avropa İttifaqı ölkələrinə çıxaracaq böyük enerji ixracı infrastrukturunun yaradılmasına və onun gücünün artırılmasına Avropa iqtisadiyyatının lokomotivi olan Almaniya da öz töhfələrini verə bilər.
Cənub Qaz Dəhlizi Məşvərət Şurasının 10-cu toplantısından bir qədər əvvəl Avropa Yenidənqurma və İnkişaf Bankı Azərbaycanın Maliyyə Nazirliyinə 30 milyon dollar dəyərində kredit ayrılmasının yaxın zamanlarda təsdiqini gündəmə gətirdi. Sözügedən layihəni dövlətin enerji generasiyası və nəqlində maraqlarını təmin edən “AzərEnerji” icra edəcək. Həmin vəsait yarımstansiyaların daha da təkmilləşdirilməsinə, yenidən qurulmasına sərf olunacaq ki, bu da elektrik enerjisində itkilərin azaldılmasına imkan yaradacaq. Azərbaycanda elektrik enerjisi istehsalının 93 faizi tükənən təbii sərvət, yəni təbii qazın yandırılması hesabına başa gəlir. Bütün bu işlər isə elektrik istehsalında təbii qazın isarfını əhəmiyyətli dərəcədə azaldacaq.
Məlum olduğu kimi, bir neçə gün bundan əvvəl belə bir maraqlı açıqlama verildi ki, İtalyanın “Ansaldo Energia” şirkəti tərəfindən Mingəçevirdə inşa olunan stansiya 2025-ci ildə istismara verildikdən sonra enerji sektorunda istifadə ediləcək qazın həcmi 1,2 milyard kubmetr azalacaq. Yeri gəlmişkən, hər il Azərbaycanda enerji sektoruna 5 milyard kubmetrə yaxın təbii qaz yönəldilir. Mövcud sistemlərin yenilənməsi, müasir texnologiyalara əsaslanan elektrik stansiyalarının tikintisi enerji məqsədləri üçün yandırılan qazın xeyli azaldılmasına imkan verəcək.
Düşünürəm ki, bu, karbon emissiyalarının azaldılmasına ən böyük töhfəmiz olardı. Digər tərəfdən, enerji strukturunda apardığımız islahatlar hesabına yeni bir mənbə əldə etmək yaranır. Ondan sonra AÇG-nin dərin qatlarından, “Abşeron” və digər yataqlardan çıxarılacaq həcmlər bizə 100 faiz imkan verir ki, Cənub Qaz Dəhlizinin genişləndirilməsi zamanı o resursları iki dəfə artıra bilək. Bununla da, hər hansı bir 3-cü tərəfin köməyi olmadan Avropadakı istehlakçıların sabit, dayanıqlı enerji təminatını həyata keçirək.
Mirbağır YAQUBZADƏ
XQ