Ötən illərdə bu məqsədlə 2,5 milyon manat vəsait xərclənib

BP şirkətinin ölkəmizin Qərb bölgəsində, Bakı–Tbilisi–Ceyhan əsas ixrac neft boru kəmərinin keçdiyi ərazilərdə reallaşdırdığı sosial layihələr barədə Gəncə şəhərinə və Samux rayonuna təşkil olunmuş mediaturda jurnalistlərə ətraflı məlumat verilib.

KİV təmsilçilərinə bildirilib ki, Azər­baycanda iri neft-qaz layihələrinin ope­ratoru olan BP şirkəti tərəfdaşları ilə birlikdə bir sıra sosial təşəbbüslərə də yaxından dəstək verir, icmaların inkişa­fına sərmayələr yönəldir. Bakı–Tbilisi–Ceyhan əsas ixrac boru kəməri boyunca reallaşdırılan sosial layihələr bu baxım­dan diqqəti xüsusilə cəlb edir.

BP və tərəfdaşları hesab edirlər ki, Xəzərdəki layihələrin uğurlu olması regi­on ölkələri insanlarına onun əhəmiyyətli faydalar gətirməsindən asılıdır. Buna nail olmaq üçün BP və onun tərəfdaşları ölkəmizdə, o cümlədən həyata keçirilən əməliyyatların qonşuluğunda yerləşən icmalarda mühüm sosial investisiya la­yihələrini davam etdirirlər. Bu layihələr yerli potensialın yaradılması, təhsil, ic­maların inkişafı, sahibkarlıq, ətraf mühit, idman, mədəni irsin tədqiqi və təbliği kimi sahələrə yönəlib.

Mediaturda qeyd edilib ki, cari ilin birinci yarısında BP və tərəfdaşları Azərbaycanda belə sosial investisiya la­yihələrinə 1 milyon dollardan artıq vəsait xərcləyiblər. Həmin layihələrə 13 təhsil proqramı, yerli bacarıqların yaradılması­nı və sahibkarlığın inkişafını dəstəkləyən 4 layihə və ətraf mühit üzrə bir təşəb­büs daxil idi. Ümumilikdə isə, fəaliyyətə başladığı vaxtdan indiyədək BP şirkəti özünün və əməliyyatçısı olduğu birgə layihələrdəki tərəfdaşları adından ölkə­mizdəki sosial sərmayə layihələrinə, təqribən, 109 milyon ABŞ dolları vəsait xərcləyib.

Ölkə iqtisadiyyatının güclənməsinə dəstək məqsədilə reallaşdırılan həmin layihələr ayrı-ayrı bölgələrdə yerli baca­rıqların yaradılmasına və sahibkarlığın inkişafına önəmli töhfələr verir. “Gələcə­yini qur”, “Yaşıl ürək”, “Şirin qızıl”, “Kənd yerlərində sahibkarlığa dəstək”, “Autizm Mərkəzinin potensialının gücləndirilmə­si” və s. şirkətin tərəfdaşları ilə birlikdə həyata keçirdiyi sosial layihələrdəndir. Bu layihələrin coğrafiyası paytaxtın Qa­radağ rayonundan başlayaraq Abşeron, Sumqayıt, Hacıqabul, Şirvan, Kürdəmir, Ucar, Ağdaş, Yevlax, Ağcabədi, Goran­boy, Gəncə, Samux, Şəmkir, Tovuz, Ağs­tafa, Qazax, Daşkəsən və Şəkiyədək ge­niş bir ərazini əhatə edir. Bununla yanaşı, şirkət ötən müddətdə Qobustan, Xaçmaz və Qəbələ rayonlarında da bir sıra icma əsaslı layihələrə maliyyə dəstəyi və tex­niki yardımlar göstərib.

Sonda bildirilib ki, Şəmkir, Samux və Qobustan rayonlarında həyata keçirilən “Yaşıl ürək” və “Şirin qızıl” layihələri çər­çivəsində ötən müddətdə 316 hektar əra­zidə, ümumilikdə, 167 min 900 ağac əki­lib. Sözügedən layihələrin əsas məqsədi torpaqların eroziyasının və səhralaşma­nın qarşısını almaqla karbon tullantıla­rının kompensasiya olunmasıdır. BP və tərəfdaşlarının qonşu icmalarda bacarıq və səriştələri artırmaqla onların davamlı inkişafı üçün imkanların yaradılmasına dəstək olmaq öhdəliyinin bir hissəsi kimi, bu layihələrin icrasına indiyədək 2 milyon 496 min 100 manat xərclənib.

Mirbağır YAQUBZADƏ
XQ