Türkiyədə Ankara–Sivas yüksək sürətli qatar xəttinin tikintisi yekunlaşıb. “TurkicWorld”un məlumatına görə, aprelin 26-da bu münasibətlə açılış mərasiminin keçirilməsi nəzərdə tutulub.
Xatırladaq ki, inşasına 2007-ci ildə başlanılan və uzunluğu 393 kilometr olan və 66 kilometr uzunluğunda 49 tunelə, 611 körpü və suötürücüyə, 217 ədəd alt keçidə malik xətdə qatar saatda 250 kilometr sürətlə hərəkət edəcək və marşrut 8 dayanacaqdan ibarət olacaq. Məlumat üçün qeyd edək ki, bu layihə əsasında təxminən 110 milyon kubmetr qazıntı işi görülüb, 30 milyon kubmetr doldurma istehsalı reallaşdırılıb. Prezident Rəcəb Tayyib Ərdoğanın iştirakı ilə aprelin 26-da istifadəyə veriləcək ümumi dəyəri 10 milyard lirə olan qatar xətti Ankara ilə Sivas arasındakı məsafəni 603 kilometrdən 405 kilometrə endirməklə səyahət vaxtını azaldacaq.
Qeyd edək ki, 2009-cu ildə Ankara–Eskişehir xəttinin istifadəyə verilməsi ilə Türkiyə yüksək sürətli qatar texnologiyasının tətbiqinə başlayıb. Daha sonra bu xəttin ardınca 2011-ci ildə Ankara–Konya, 2013-cü ildə Əskişəhər–Konya, 2014-cü ildə Ankara–İstanbul və Konya–İstanbul xətləri istifadəyə verilib. Nəhayət, 2022-ci ilin yanvar ayında Konya–Karaman xətti işə salınıb. Türkiyəli mütəxəssislərin bildirdiyinə görə, Ankara–Sivas yüksək sürətli qatar xəttinin tikinti layihəsi Prezident Rəcəb Tayyib Ərdoğanın rəhbərliyi ilə gerçəkləşdirilib və türk əsrinin lokomotiv təşəbbüslərindən biri kimi dəyərləndirilib.
Qardaş ölkənin nəqliyyat və infrastruktur naziri Adil Karaismailoğlu bu meqalayihə haqqında deyib: “Ankara–Sivas yüksək sürətli qatar xəttinin istismara verilməsi bu bölgəyə böyük töhfə verəcək, eyni zamanda, beşillik strateji planda nəzərdə tutulan bu nəqliyyat layihəsinin vaxtında reallaşdırılması Türkiyənin nüfuzunu daha da gücləndirəcək”.
Yeri gəlmişkən, son 20 ildə Türkiyədə nəqliyyat layihələrinin reallaşdırılması nəticəsində mühüm uğurlar əldə edilib. Bu potensiala əsaslanılaraq, dəmir yolu sektorunda 2035-ci ildə 220 milyon, 2053-cü ildə isə 448 milyon ton yükdaşımaya nail olmaq qarşıya önəmli vəzifə kimi qoyulub.
Sonda Türkiyənin dəmiryolu, ümumiyyətlə, nəqliyyat sektorunda son 20 ildə əldə edilən uğurları diqqətə çatdırmaq istərdik:
– beynəlxalq reytinq agentlikləri tərəfindən Ankara–İstanbul və Ankara–Konya yüksək sürətli qatar xəttinin çəkilişinə əsasən, qardaş ölkə Avropada 6, dünyada 8 ölkədən biri kimi qeydə alınıb;
– Türkiyə nəqliyyat və kommunikasiya sahələrində 1 trilyon lirə dövlət sərmayəsi həyata keçirib;
– Karayolunda bölünmüş yolun uzunluğu 6 kilometrdən 101 kilometrə, avtomobil yolunun uzunluğu 28 kilometrdən 340 kilometrə çatdırılıb.
– Türkiyədə tunellərin ümumi uzunluğu 50 kilometrdən 631 kilometrə, körpülərin və viyadüklərin uzunluğu 311 kilometrdən 710 kilometrə qədər artırılıb;
– 12 min 803 kilometrlik dəmir yolu şəbəkəsi tamamilə yenilənib, mövcud xətlərdə siqnalizasiya və elektrikləşdirmə işlərində əhəmiyyətli irəliləyiş əldə olunub;
– Bakı–Tbilisi–Qars dəmiryolu xətti sayəsində Qərbi Avropadan Uzaq Asiyanın ən ucqar nöqtəsinə qədər fasiləsiz qatar xidmətinin göstərilməsinə başlanıb;
– qardaş ölkədə hava limanlarının sayı 26-dan 56-ya çatdırılıb;
– 50 ölkədən və 60 istiqamətdən beynəlxalq uçuşların sayı 127 ölkəyə və 329 istiqamətə artırılıb;
– İstanbul Hava Limanı dünyanın ən yaxşıları arasında ikinci, Avropanın ən işlək aeroportları siyahısında birinci yerdə qərarlaşıb;
– Türkiyənin xarici ticarətində dəniz nəqliyyatının payı 4 dəfə yüksəlib.
Vaqif BAYRAMOV, “Xalq qəzeti”
.jpg)
