Trans-Adriatik Boru Kəməri (TAP) vasitəsilə 2026-cı ildən başlayaraq əlavə həcmdə qaz nəqli üzrə yeni sazişlər imzalanıb. Bu barədə TAP konsorsiumdan məlumat verilib. Məlumata görə, 2023-cü il yanvarın 22-də də məcburi təkliflərin verilməsi prosesi tamamlandıqdan sonra TAP konsorsiumu genişlənmənin birinci mərhələsinə başlayıb. 

2026-cı ildən başlayaraq uzunmüd­dətli sazişlər çərçivəsində boru kəməri ilə ildə əlavə olaraq 1,2 milyard kubmetr qaz nəql etmək barəsində qərar qəbul olunub. Müvafiq yeni sazişlər artıq im­zalanıb. Bundan əlavə, Yunanıstanın Kipoy ərazisindəki kompressor stansiya­sında təqribən 15 MVt gücündə bir kom­pressor qurğusunun əlavə edilməsi və oradakı avadanlığın müasirləşdirilməsi nəzərdə tutulub.

Qeyd edək ki, Cənub Qaz Dəhlizinin Avropa hissəsi olan TAP vasitəsilə hər il İtaliyaya 8 milyard kubmetr, Yunanıs­tan və Bolqarıstanın hər birinə isə 1 mil­yard kubmetr həcmində qaz nəql olunur. Azərbaycan qazının Cənub Qaz Dəhlizi vasitəsilə Avropaya nəqlinə 2020-ci il dekabrın 31-də başlanılıb. Həmin vaxt Azərbaycan tarixdə ilk dəfə öz təbii qa­zını boru kəmərləri ilə Avropa bazarına çıxarıb. Eyni zamanda, təbii qazın ən iri idxalçısı olan Avropa bazarına birbaşa çıxışla Azərbaycan öz ixrac imkanlarını da şaxələndirməyə nail olub.

“Xalq qəzeti”