Bir müddət bundan öncə belə bir məlumat yayılmışdı ki, OnePlus şirkəti 16 avqust tarixində təqdim edəcəyi “OnePlus Ace 2 Pro” smartfonunda maksimal RAM yaddaşının həcmini 24 GB-a yüksəldəcək.
Qlobal KİV xəbər verir ki, müəyyən müddət ərzində bu məlumatın doğruluğuna hətta məşhur insayderlər də şübhə etmirdilər. İndi isə həmin məlumat şirkət tərəfindən rəsmi şəkildə təsdiqlənib.
Şirkət rəsmisi qeyd edib ki, təmsil etdiyi qurum yeni smartfon dövrünə qədəm qoyur. Bundan sonra flaqman smartfonlarda 24 GB RAM istifadə ediləcək. 16 GB-lıq RAM göstəricisi isə artıq tarixə qovuşacaq.
Mənbə əlavə edib ki, “OnePlus Ace 2 Pro” smartfonunun LPDDR5X standartlı 24 GB RAM-a və UFS 4.0 standartlı 1 TB-lıq daxili yaddaşı olacaq.
Aytən NƏCƏFOVA, “Xalq qəzeti”