Serbiyada 192 yeniyetmə atletimiz 18 növdə yarışacaq
Azərbaycan idmançılarını yeni sınaq gözləyir. Beynəlxalq Məktəb İdmanı Federasiyasının (ISF) təşkilatçılığı ilə Serbiyada aprelin 4-də start götürəcək beynəlxalq multi-idman yarışında 15 yaşadək atletlərimiz mübarizə aparacaq. Ölkəmiz bu oyunlarda 192 idmançı ilə təmsil olunacaq.
Gənclər və İdman Nazirliyinin İdman şöbəsinin Regionlarla iş sektorunun müdiri Elvin Zeynallı qəzetimizə bildirdi ki, idmançılarımız yarışda 22 növdən 18-də iştirak edəcəklər. Komandamız oyunlara aprelin 5-də kamandan oxatma üzrə yığmamızın mübarizəsi ilə start verəcək:
– Builki gimnaziadada əsas yeniliklərdən biri odur ki, yarış 7 şəhərdə keçiriləcək. Komandamızın iştirak edəcəyi yarışlar – idman gimnastikası Novi-Sad, kamandan oxatma, 3x3 basketbol, çimərlik voleybolu, boks, şahmat, tennis Zlatibor, badminton, parabadminton, üzgüçülük, paraüzgüçülük, stolüstü tennis Ujiçe, taekvondo, karate Pojeqa, cüdo, güləş Luçani, qılıncoynatma Nova-Varoş, nəhayət atletika Priboy şəhərlərində təşkil ediləcək.
Ötən il analoji yarışda əldə edilən nailiyyətlərdən danışan E.Zeynallı qeyd etdi ki, komandamız 160 idmançı ilə mübarizə aparıb, 23-ü qızıl, 26-sı gümüş və 28-i bürünc olmaqla, ümumilikdə, 77 medal qazanıb. Bu nəticə ilə ölkəmiz ümumi sıralamada 7-ci yeri tutub. Yığmamız mükafatları güləş, cüdo, boks, bədii və aerobika gimnastikası, güləş, taekvondo, qılıncoynatma, paracüdo, paraüzgüçülükdə əldə edib. Ondan əvvəlki gimnaziadada isə komandamız cəmi 2 medal qazanmışdı.
Elvin Zeynallının sözlərinə onu da əlavə edək ki, Bəhreyn Krallığının paytaxtı Manama şəhərində təşkil edilən ötən gimnaziadada komandamız 16 növ üzrə yarışlarda mükafatlar uğrunda mübarizə aparmışdı. Budəfəki yarışda isə yığmamız daha çox idman növündə və daha geniş heyətlə iştirak edir.
Güləş komandamızın məşqçisi Həsrət Məmmədyarov budəfəki yarışda sərbəst güləş üzrə 10 qızın mübarizə aparacağını söylədi:
– Təbii ki, daha yüksək nəticələr gözləyirik. Ötən gimnaziadada 4 qız güləşçi ilə təmsil olunduq. Onlardan 3-ü medal qazandı. Qızlarımızı yarışa yaxşı hazırlamışıq. Onların hər biri Serbiyaya mükafat üçün gedəcək. İştirakçılardan həmişəki kimi, Rusiyanı əsas rəqiblərdən biri hesab edirik. Amma bizim komandamız da zəif deyil.
Yunan-Roma güləşi üzrə məşqçi Əbülfət Məmmədov da 15 yaşadək güləşçilərin mübarizəsində fərqlənəcəklərinə ümid etdiyini dedi:
– Ölkədaxili yarışlarda yaxşı nəticə göstərən güləşçiləri seçmişik. Ən nüfuzlu turnirlərdə Azərbaycan güləşçiləri həmişə fərqləniblər. Ümid edirik ki, istədiyimiz nəticəni əldə edə biləcəyik. Yarışda 9 çəki dərəcəsi üzrə 10 güləşçi ilə təmsil olunacağıq.
Beynəlxalq arenalarda ən nüfuzlu yarışlarda fərqlənən komandamızdan bu dəfə də uğurlu nəticələr gözləyirik. Nazirliyin nümayəndəsi Elvin Zeynallı da komandamızın qələbəyə kökləndiyini bildirdi:
– Bütün idman növləri üzrə ən güclülər yığmaya cəlb edilib. Yarışa hazırlıq lazımi səviyyədədir. Federasiyalardan götürdüyümüz proqnozlar da bunu göstərir. Bütün idman növləri üzrə – ən əsas da güləş, cüdo, boks, taekvondo üzrə uğurlu nəticələr gözləyirik. Komandamız qələbəyə köklənib. İdmançılarımızın gimnaziadada uğurla iştirak edəcəyinə inanırıq.
Leyla QURBANOVA
XQ
