Paris-2024 Olimpiya Oyunlarında qrup mərhələsinin birinci turunda Argentina və Mərakeş yığmaları arasında keçirilən oyunda iğtişaşlar baş verib. “Tycsports.com” saytının məlumatına görə, cənubi amerikalılara qarşı aqressiv olan azarkeşlər oyunun iki saata qədər yarımçıq kəsilməsinə səbəb olublar.
İkinci hissəyə əlavə olunan 14-cü dəqiqədə Cristian Medina argentinalıların ikinci qolunu vurduqdan sonra tribunadan bir neçə mərmi uçub və azarkeşlər meydançaya qaçıblar. Hakim komandaları paltardəyişmə otaqlarına aparıb və oyuna iki saat fasilə verilib. Sonda oyundankənar vəziyyət səbəbindən qol qəbul olunmayıb. Komandalar qalan dəqiqələri oynamalı olublar və nəticədə Mərakeş 2:1 hesabı ilə qalib gəlib.
Oyundan sonra Argentina Futbol Federasiyası (AFA) Beynəlxalq Futbol Federasiyasının (FİFA) intizam komissiyasına şikayət edib. O, beynəlxalq təşkilatdan matç iştirakçılarının təhlükəsizliyini təmin etmək üçün lazımi tədbirlərin görülməsini tələb edib.