Hər futbol qarşılaşması qələbə, azarkeşlərin tələblərini ödəyəcək ən yaxşı nəticə əldə etmək uğrunda mübarizədir. Bununla belə, vacib görüşlərdə reqlamentə uyğun olmayan hallar ciddi cərimələrə çevrilir. Xüsusilə də meydanda ölkə üçün əhəmiyyətli oyun keçirilən zaman komanda üzvlərindən gözlənilən səbrli davranışlar nümayiş etdirilməyəndə proses arzuolunmayan istiqamətdə inkişaf edir. Bununla yanaşı, yüksək səviyyəli beynəlxalq yarışlarda tələb olunan standartlara əməl olunmaması ölkənin imici baxımından da arzuolunan hal deyil. Söhbət “Qarabağ” futbol klubuna UEFA tərəfindən edilmiş ciddi xəbərdarlıqdan gedir.
Qol.az-ın xəbərinə görə, Avropa Liqasının pley-off mərhələsinin “Qarabağ” – “Braqa” cavab oyununda azərbaycanlı blogerlərin qaydalara zidd şəkildə stadiondan çəkilişlər aparması və ümumi çəkiliş qaydalarını pozması UEFA-nın Ağdam təmsilçisinə ciddi xəbərdarlıq etməsinə səbəb olub. Klubun mətbuat xidmətinin rəhbəri Anar Hacıyev Qol.az saytına müsahibəsində xəbəri təsdiqləyib, ancaq UEFA-nın klubu cərimələmədiyini bildirib. Amma klub funksioneri ümid etdiyini də gizləməyib ki, ali futbol təşkilatı “Qarabağ”ı cərimələməyəcək. Ümid etmək yaxşıdır, amma ciddi qaydalara uymayanda cərimə mütləq gələcək. UEFA kimi təşkilatlar da belə halları bağışlamır. Futbol həm də böyük pullar deməkdir, oyunun yayım hüququndan milyonlar qazanılır. Eksklüzivlik itəndə pul da itirilir ki, bu da UEFA tərəfindən adekvat qərarlar qəbul edilməsinə səbəb olur. A.Hacıyev də etiraf edir ki, UEFA-nın sırf media hüquqlarına sahib şirkətlərlə bağlı çox ciddi yanaşması var və çəkiliş hüququ, sadəcə, media hüquqlarına sahib şirkətlərə məxsusdur. Klub funksionerinin sözlərinə görə, kənar hər hansı bir şəxs, televiziya və ya şirkət oyundan görüntülər çəkib onu yayımlamaq hüququna sahib deyil.
Amma “Qarabağ” – “Braqa” oyunundan sonra eksklüzivlik prinsipi pozuldu. Oyunla bağlı videogörüntülər dəqiqələr sonra müxtəlif saytlarda, sosial şəbəkələrdə yayımlandı. Bundan başqa, oyun çəkilişini aparan şəxslər də UEFA qaydalarını pozdular. Reqlamentə görə, çəkiliş qrupunun üzvləri oyun zamanı onlara ayrılmış sektoru tərk edə bilməzlər. A.Hacıyevin sözlərindən belə çıxır ki, “Qarabağ” – “Braqa” matçında çəkiliş aparan şəxslərin tez-tez bu ərazini tərk etmələri, hətta qol anında meydana daxil olmaları UEFA tərəfindən ciddi qayda pozuntusu kimi qeydə alınıb və bununla bağlı Ağdam təmsilçisinə xəbərdarlıq olunub. İllərdir ki, Azərbaycanı Avropa meydanlarında layiqlə təmsil edən klubun yayım məsələsində belə boşluqlara yer verməsi heç də xoş hal deyil. Bu, peşəkarlığa kölgə salan diqqətsizlikdir. Milyonların izlədiyi matçda oyun zamanı kənar şəxslərin meydana daxil olmaları ciddi nöqsandır və UEFA bu nöqsana hər zaman göz yummur. Biz də arzulayırıq ki, cərimə gəlməsin. Amma ciddi nöqsanlara yol verib sonra da UEFA-nın mərhəmət göstərəcəyinə ümid etmək, razılaşın ki, peşəkarlıqla üst-üstə düşmür.
“Qarabağ” – “Braqa” matçının nəticəsi bütün azərbaycanlıların sevincinə səbəb oldu. Portuqaliyanın tanınmış klubunun mübarizədən kənarlaşdırılması futbolumuz adına böyük uğurdur. Ancaq oyun zamanı klubun bəzi üzvlərinin səbrsiz davranışı qəbuledilməzdir. Xüsusilə də məşqçilər korpusunun bəzi üzvlərinin hakimliyə əndazəyə sığmayan etiraz jestləri təəssüf doğurmaya bilməz. Heç kimə sirr deyil ki, futboldan siyasi təbliğat və ya etiraz vasitəsi kimi istifadə oluna bilər. Amma futbol həm də milli kimliyi, mədəni müxtəlifliyi və sosial həmrəyliyi ifadə etmək vasitəsidir. Futbol müxtəlif xalqlar və qruplar arasında dialoq və sülh platforması, eyni zamanda, mədəniliyin etalonudur. Səbrli olmaq, bəlkə də, ən böyük mədənilik göstəricisidir. Təbii ki, futbol şahmat deyil, səslə-küylə oynanılan, emosiyalarla zəngin olan idman növüdür. Amma gəlin razılaşaq ki, emosiyaların coşduğu bir vaxtda səbrliliyin, etik normalara uyğun davranışın nümayişi də peşəkarlığın zirvəsidir. Unutmaq lazım deyil ki, futbola milyonlar baxır, buna görə də, haqlı olsa belə, klub funksionerinin emosiyaları cilovlaya bilməməsi klubun peşəkarlığına, imicinə zərbədir.
Bizim “Qarabağ” klubunun tarixi nailiyyətinə kölgə salmaq niyyətimiz yoxdur. Sadəcə, milyonların önündə istər meydanda, istərsə meydandan kənarda reqlamentə uyğun davranış göstərmək zəruridir. Qarşıdan Azərbaycan çempionunu Avroliqanın 1/8 final mərhələsində “Bayer”lə çox çətin oyun gözləyir. Almaniya çempionatının liderinə qarşı oyunda komandamızdan gözəl nəticə gözləyirik. Ümid edirik ki, Bundesliqa təmsilçisi ilə oyunda zərərli emosiyalara yol verilməyəcək və peşəkarlıq barədə müzakirələrə yol açılmayacaq. Özündənrazı “Köhnə qitə”nin titullu komandalarına qarşı güclü iradə nümayiş etdirmək lazımdır. Avropa klubları rəqibi özündən çıxarmaqda mahirdirlər. Ona görə də, kiçik insident belə böyük uğura kölgə sala bilər.
XQ