Azərbaycan cüdoçuları 2023-cü ildə müxtəlif nüfuzlu yarışlarda tarixi qələbələr qazanıblar.
Tatami ustalarımız il ərzində bütün yaş qrupları üzrə fərdi və komandalar arasında keçirilən beynəlxalq yarışlarda 237 medala sahib olublar. Bunlardan 74-ü qızıl, 53-ü gümüş, 110-u bürünc mükafatlardır.
Bu nailiyyətlərin əldə edilməsində yeniyetmə cüdoçuların xüsusi payı var. Belə ki, Azərbaycanın yeniyetmələrdən ibarət komandası Avropa Gənclərinin Olimpiya Festivalında, qitə və dünya çempionatında və digər mötəbər turnirlərdə yüksək səviyyədə çıxış edərək ən güclü yığma adını qazanıblar. Bu il ərzində komanda 37-si qızıl, 22-si gümüş, 44-ü bürünc olmaqla 103 medal qazanıb.
Avropa Gənclər Olimpiya festivalının fərdi yarışlarında 3 qızıl, 2 gümüş və 4 bürünc medal əldə edən cüdoçularımız həm əyarına, həm də medal sayına görə 1-ci yerdə qərarlaşıblar. Bu, qızlar arasında mötəbər yarışlarda ədə etdiyimiz ilk nəticə idi. Portuqaliyanın Odivelas şəhərində yeniyetmələrin Avropa çempionatının qarışıq komanda yarışlarında cüdoçularımızın qızıl medalı da tarixi nəticədir. Millimiz, həmçinin fərdi yarışlarda 6 qızıl və 3 bürünc medal olmaqla, 9 mükafat qazanıb və medal əyarına görə ümumi hesabda və oğlanlar arasında birinci, qızlar arasında isə dördüncü yeri tutub. Bu millimizin indiyədək iştirak etdiyi Avropa çempionatlarında həm medalların sayına, həm də əyarına görə ən yaxşı nəticədir. Xorvatiyanın Zaqreb şəhərində yeniyetmələr arasında keçirilən dünya çempionatında komandamız son 10 ildə ilk dəfə qızıl medal əldə etdi. 2 qızıl, 3 gümüş və 3 bürünc medal olmaqla, ümumilikdə 8 medal qazanan komandamız bu nəticə ilə bütün komandaları qabaqlayaraq birinci yerdə qərarlaşıb. Mundialın baş mükafatını qazanan Xədicə Qədəşova isə cüdo tarixinin ilk qadın dünya çempionu kimi tarixə düşüb.
Portuqaliyanın Odivelas şəhərində keçirilən gənclərin dünya çempionatında Vüsal Qələndərzadənin (73 kq) çempionluğu son 5 ildə gənclərin dünya çempionatında ilk qızıl medal kimi tarixə düşüb. Qətərin Doha şəhərində dünya çempionatında kişilər arasında Zelim Kotsoyev (100 kq) bürünc mükafata layiq görülüb. Fransada kişilər arasında Avropa çempionatında Hidayət Heydərov (73 kq) və Zelim Kotsoyevin (100 kq) çempion adına layiq görülmələri də əldə olunan böyük nailiyyətlər sırasındadır.
Yeniyetmə cüdoçulardan ibarət Azərbaycan millisinin baş məşqçisi Rüstəm Alimli “XQ”yə müsahibəsində bu il yeniyetmə idmançıların həm Avropa, həm də dünya çempionatında rekord sayda medallar qazandığını bildirdi:
– Zaqrebdə (Xorvatiya) keçirilən dünya çempionatının fərdi yarışlarında komandamız tarixi nəticə əldə edərək 2 qızıl, 3 gümüş və 3 bürünc medal olmaqla, ümumilikdə 8 medal qazanıb. Portuqaliyada Avropa çempionatında komandamız 5 qızıl 2 bürünc medal qazandı. Azərbaycan cüdo tarixinin 50 ili ərzində belə nəticə olmayıb. Bu yeniyetmələr gələcəkdə gənclər, daha sonra böyüklərdə yaxşı çıxış edəcəklər. Bəzi yeniyetmə cüdoçularımız, məsələn, Avropa çempionu Sahib Məhəmmədov U-23 Avropa çempionatında bürünc medal qazandı. Yeniyetmələrin daha bir Avropa çempionu, 17 yaşlı Ramazan Əhmədov gənclərin qitə çempionatında final uğrunda mübarizə apardı. Gənclərdən ibarət yığmada təcrübəli məşqçilər Elxan Məmmədovun rəhbərliyi altında çalışırlar. İnanıram ki, bu yeniyetmələr daha da inkişaf edib böyük qələbələr qazanacaqlar.
Məşqçi növbəti ildə komandadan daha yaxşı nəticələr gözləyir:
– Elə idmançılar var ki, onların hələ 18 yaşları yoxdur və ona görə də, gələn il də yeniyetmələrdə çıxış edəcəklər. Onlardan Avropa çempionu Mirxaliq İsgəndərov, dünya çempionu Nihad Məmişovu misal göstərmək olar. Növbəti ildə cüdoçularımızdan daha böyük nailiyyətlər gözləyirik. Bunun üçün əsas da var, potensial da.
Leyla QURBANOVA
XQ