Bu gün Azərbaycan milli futbol komandası final mərhələsi 2024-cü ilin yayında Almaniya stadionlarında keçiriləcək Avropa çempionatının seçmə mərhələsində dördüncü dəfə meydana çıxacaq. Rəqibimiz brüsselli qonaqlar, beynəlxalq futbol dairələrində adı hörmətlə çəkilən Belçika yığmasıdır. “Dalğa Arena”da görüşə saat 17-də start veriləcək. Oyunda ədaləti Nenad Minakoviçin başçılığı ilə serbiyalı hakimlər briqadası qoruyacaq.

Turnir cədvəlində tərəflərin göstə­riciləri fərqlidir. Təbii ki, onların düşər­gələrində əhval-ruhiyyə də müxtəlif­dir. Martda seçmə yarışlarının start görüşlərində Avstriya və İsveçdən evə ağır məğlubiyyətlərlə (müvafiq surətdə 1:4 və 0:5) qayıtmış Azər­baycan futbolçuları yayın əvvəlində “doğma divarlar” arasında Estoniya ilə oyunda da ümidi doğrultmamış, yalnız heç-heçə ilə kifayətlənmişlər (1:1), hərçənd həmin axşam pərəs­tişkarları komandadan qələbə göz­ləyirdilər. Üç görüşdə cəmi 1 xal, əlbəttə ki, bizi qane edə bilməz. Üç oyunda 7 xal qazanan Belçika isə öz göstəricisindən tam razı olmasa da, hər halda, Avstriyanın (4 oyun, 10 xal) başçılıq etdiyi turnir cədvəlində ikinci mövqedədir.

Azərbaycan millisinin italyan baş məşqçisi Canni De Byazinin öz fut­bolçularını ağır “Belçika sınağına” necə hazırlaşdırdığını oyunun gedi­şində müəyyən edə biləcəyik. Amma rəqib nə qədər möhkəm komanda kimi tanınsa da, ona qarşı layiqli mü­barizə aparmaq, uğurlu nəticəyə nail olmaq mümkündür. Artıq zəif oyun­lar seriyasını dayandırmaq lazımdır. Hətta qələbələrin hesabını açmaq vaxtının çatdığını da düşünə bilərik.

Xarici klublarda çıxış edən milli futbolçularımız Mahir Emrelinin Xor­vatiyada Zaqreb “Dinamo”su heyə­tində, Musa Qurbanlının İsveç çem­pionatında “Yurqorden”in tərkibində, Ramil Şeydayevin Tailandda son vaxtlar yaxşı snayper keyfiyyətləri nümayiş etdirmələri futbol həvəskar­larımıza bugünkü oyuna daha ürəklə, daha böyük gözlənti ilə getmək üçün az əsas vermir. Deməli, ümidimizi itir­məyək.

Onu da xatırladaq ki, hələlik ko­mandamızın hesabında cəmi 2 qol var. Erkən baharda yarımmüdafiəçi Emin Mahmudov Avstriya matçında fərqlənmiş, yayın əvvəlində müdafiə­çi Anton Krivotsyuk Bakıda Estoniya ilə görüşdə yaddaqalan baş zərbəsi ilə hesabı bərabərləşdirmişdi. İndi isə sentyabr ayındayıq. Qızıl payıza yax­şı oyun və yaxşı nəticə ilə başlamaq pis olmaz.

Bu axşam komandamızın çıxış etdiyi “F” qrupunda daha bir görüş olacağını da diqqətinizə çatdıraq. Es­toniya futbolçuları isveçli rəqiblərini qəbul edəcəklər. Azərbaycan yığma­sı da oktyabrın 13-də növbəti oyunda Estoniyanın qonağı olacaq.

Oqtay BAYRAMOV,
Əməkdar jurnalist